Romans 8 - Muklom

Tsija tungkang o chammal eq tong aa

¹ Eshirangma thanga bara Khristo Jesu na, ning ma aja ta shing moq.

² Chammatakoi Khristo Jesu tungkang o rollung kottey Tsija thong shey nim sha ngarey nia utik thong wang taqhap taphin.

³ Bari jaksom raa hanngam tungkang o anung ang eq thong sha jin som moq angta, eshi jaksom sha Shkewa som ta. Usa may tha ngarey hanngam mal ang eq ngarey pinthong ang rangma takat eq hanngam o ngarey aja ta shingta.

⁴ Irimal ang eq hiqtang o bara hanngam mal tong moq ang eq, Tsija mal tong aa, thong shimal ang ching sha hiqtang o tahom ang aa.

⁵ Hanngam tin nuk o tongtey miqtang shey hanngam tinthin sho ning ni ning thung atal sha shing aa. Etharin Tsija tin nuk o tongtey miqtang shey Tsija tinthin o ning ni ning thung atal sha shing aa.

⁶ Hanngam thung atal kot sha utik, etharin Tsija o thung atal kot sha rollung nia nungmay.

⁷ Hanngam o thung atal kottey sha Shkewa ralwa chammatakoi ning aa Shkewa thong tat moq etho jin ang moq hun.

⁸ Barey hanngam raaq sha tat aa, ning aa Shkewa sha jin tasungrang moq.

⁹ Etharin nim hanngam o tong min; Shkewa Tsija nim o tong ajo nim Tsija na tong nin. Barima Khristo Tsija ahung ang ajo ning sha Khristo miq ang moq.

¹⁰ Etharin Khristo nim o tong ajo ngarey tungkang o nim hanphung sha utik angma ta etha otho asing tungkang o Tsija shey nim ma rollung kot aa.

¹¹ Barey Jesu sha amáng wang wey thajey ta, eshi Shkewa Tsija sha nim o tong aa ta ang ajo, Khristo sha utik wang thaluntey shey nim o tong aa Tsija tungkang o nim utik phan hanphung ma rollung kot na.

¹² Eshirangma i no nia pho tang, hanngam raaq tat eq hiqtang tong ching ta ang moq.

¹³ Chammatakoi nim hanngam raaq tat eq tong inn jo utik ang nin; etharin Tsija wang hanphung ngarey jaksom sha tatik inn jo nim atharang tong nin.

¹⁴ Barey Shkewa Tsija ji sha phan aa, ning sha Shkewa susa tang.

¹⁵ Shkewa nim ma kot ta Tsija shey nim sha qha ma shing moq etho nim sha tacho tey ang moq, etha otho Tsija shey nim sha Shkewa sa tang ma hun aa etho Tsija tarong wang hiqtang aa Abba, Iwa ta raaq eq hal i.

¹⁶ Hiqtang Shkewa susa tang ta Asang Tsija piq ni piq atho hiqtang tsija jamoq miikkhi kot aa.

¹⁷ Thanga hiqtang usa tang ang ijo hiqtang raa sa may; etho hiqtang Khristo jamoq Shkewa phun amun sa may ang i. Etharin hiqtang phun amun sa may ang ijo piq tsamnang jamoq tho atha ang ching.

Inapja rollung phun amun

¹⁸ Hiqtang o bara phun amun takhi ma ta aa, eshi relna thaneynap tsamnang raa chamtho ang moq ta nga tathin ang.

¹⁹ Phanghun eq rapney tungmang wang Shkewa susa tang takhi rangma ban chey aa.

²⁰ Phanghun eq umongtham wang ang moq ang eq Shkewa tin nuk mongtham wang manthun mong na angta. Etharin tungmang ang eq,

²¹ phanghun sha tho uthun qha wang aqhap ang eq, Shkewa susa tang phun amun aqhap sha kap na.

²² Thaji phanghun thanga náng thula sa chang ma taksa aa thimal takho takhang sha hiqtang aa usam eq i.

²³ Phanghun chen ang moq, hiqtang tho bari relna Tsija phang tingo, thanga hun tinmong na qhap eq ringrak i; Shkewa hiqtang sha usa ta shing ma etho hiqtang thaji hanphung sha taqhap rangma ban eq qhap chey i.

²⁴ Iri tungmang tungkang o hiqtang aa lunwan kapti; etharin bari tungmang sha jin khi eq i, esha asing tungmang tho ang moq. Hiqtang aa khi phan shima utang eq tungmang na?

²⁵ Etharin hiqtang aa bara khi mi esha tungmang ijo esha tin thanan eq ban ni.

²⁶ Eshimal Tsija eq tho hiqtang anung o nong phi. Romtam chamal eq chuk ching ta hiqtang aa sammi etharin Tsija hun jin bat mi raaq tang wang hiqtang rangma tin thanin eq romtam chu aa.

²⁷ Tin siintey Tsija tinthin chamlang aa sha usam eq aa. Chammatakoi Tsija eq Shkewa miqtang rangma utin mongtham mal romtam chu aa.

²⁸ Shkewa ma tinmat tey etho utin mongtham wang haltey rangma thaji raaq sha jaqhal ang aa ta, hiqtang aa usam eq i.

²⁹ Shkewa jakho wang tal ta miqtang sha usa Miqwasa mal angma piq aa adak eq shing ta, irimal ang eq daqhan sapho na tang jaktung wang piq sha phokho sa angna.

³⁰ Bara piq aa adak eq shing ta ning tha piq aa halta; bara piq aa halta ning sha asing miq angma shingta; bara asing miq angma shingta ning ma uphun amun sha kot ta.

Shkewa thun moq phan tinmat

³¹ Hiqtang iri tung aa raaq chamlang ta raaq ni? Shkewa hiqtang ching kona ang ajo utang eq hiqtang sha jin miiksuk phani?

³² Piq aa usa Miqwasa tha hiqtang ma kot hunga shing moq angta, etharin hiqtang ma piq sha kot chakta. Irimal ang ajo piq jamoq hiqtang ma thaji sha kotmoq angna i?

³³ Shkewa talchol tey tang shima utang eq aja ta raaq na? Shkewa hun ning sha asing miq ta shing aa.

³⁴ Ning sha utang eq aja ta shing na? Khristo Jesu bara utik angta, amáng wang weyjey angta etho Shkewa jakqha kona - piq aa hiqtang rangma romtam chu aa.

³⁵ Khristo tinmat wang utang eq hiqtang sha jin phal pha ni? Tsamnang, tia tintashit tia tahikham, tia shong aa cham, tia chamlal junglal, tia ucho upan ang ching tia jantong thaji shey hiqtang sha jin phal eq phani i?

³⁶ Asang likwit na thawit aa, “Ba rangma í salwet utik relna ang i; Í tikwat eq ma som kat aa kelwut mal.”

³⁷ Hiqtang ma tinmat tey tungkang o iri thaji raaq tang na ujintey wang tho ajong.

³⁸ Chammatakoi Shkewa tinmat wang hiqtang sha cham eq tho jin phal phami ta nga usam eq ang. Utik tia rollung, rangkamwa tang tia thangwa tang, thaney nap rollung tia inapja rollung, tia jaktáng o shingtey,

³⁹ aluk tia anim tia thaji phanghun wang chamlang tangwang sha Shkewa tinmat bara hiqtang Teyhungwa Jesu Khristo tungkang o hiqtang ràng, eshiwang hiqtang sha jin phal phami.