Romans 7 - Muklom

Thong wang qhap

¹ I pho nia no tang, nga cham ta batphang sha nim aa usam eq nin, chammatakoi nim thaji sha thong samtey. Baluk náng thula miqna atharang tong aa, eshináng thula miqna sha thong eq jaktáng na tatong aa.

² Raaq ni raaq tha rungsat chol miqnu sha uhimteywa atharang tong ling thong na piq jamoq tong aa. Etharin uhimteywa utik sey ang jo eshi thong wang aqhap sey.

³ Uhimteywa atharang ang eq piq adak miqwa jamoq rumjib shat ajo sathuk ta thamiing na. Etharin uhimteywa utik jio piq eshi thong wang aqhap sey, etho adak miqwa jamoq rungsat ajo sathuk ta thamiing moq angna.

⁴ Eshirangma i pho nia no tang, nim tho Khristo hanphung tungkang o thong rangma utik sey ang tin, etho thanga nim adak ràng sey, bara utik wang wey jey ta; irimal ang eq hiqtang Shkewa rangma cham tingo i.

⁵ Hiqtang hanphung na ang ti tho ngarey ngikjuk bara thong tungkang o angta, esha hiqtang hanphung sho somlo ta, irimal ang eq hiqtang aa utik tingo sha tatingo ti.

⁶ Etharin bari thong raa hiqtang ma chukna tongtey mal shingta phi, eshi thong rangma hiqtang utik sey angti, eshirangma hiqtang thong wang aqhap sey. Thawit chol aking lam wang thanga som mi sey, etharin Tsija anal lam sho somlo i.

Thong nia ngarey

⁷ Hiqtang chamta raaq ni? Thong shi ngarey i? Baluk otho ang moq! Etharin thong ahung na nga ngarey sha sing mong. Thong eq “Nak ngikjuk u” ta bat moq ang ajo nga ngikjuk tha sam mong ang wang táng.

⁸ Etharin raaqkhat tungkang o ngarey eq jaqhal kap eq nga o thaji ngikjuk sha takhong ta. Chammatakoi thong ahung na ngarey sha amáng.

⁹ Nga jakho o thong ahung na tong táng; etharin baluk o raaqkhat thuta pha tho ngarey wey jey ta,

¹⁰ etho nga utik sey ang táng. Eshi raaqkhat bara rollung kot ma shingta, i rangma utik tungkang ma angta.

¹¹ Chammatakoi ngarey eq raaqkhat tungkang o jaqhal kap eq nga tha dip taphang etho tikwat chak taphang.

¹² Eshirangma thong sha asang etho raaqkhat sha asang, asing, etho jaqhal.

¹³ Bara aqhal sha i rangma utik thoksom tapha i? Baluk otho ang moq! Etharin ngarey eq eshi jaqhal tangwang tungkang o i rangma utik tha takhong tey angta, irimal ang eq ngarey shi chamlang aa ta takhi ta. Etho raaqkhat tungkang o ngarey tha rapney shitti ta ta takhi ta.

¹⁴ Thong sha Tsija wang ta hiqtang aa usam eq i, etharin nga raa miqna phan etho ngarey jak o qha mal shang chak tey.

¹⁵ Nga chamlang somlo ang tha sammong, chammatakoi bara nga somlot ma nuk ang esha som mong, etharin bara nga chikrik ang esha hun somlo ang.

¹⁶ Barima nga nuk mong esha hun som ang jo, thong sha aqhal ta nga uhan eq ang.

¹⁷ Eshimal ang jo eshi somtey sha nga ang mong, etharin ihan mong na tong aa ngarey shey esha somlo aa.

¹⁸ I rollung na etho ngarey han mong na chamli jaqhal tangwang tong moq ta nga usam eq ang. Chammatakoi jaqhal sha som ma nga unuk ang ang etharin nga jin som mong.

¹⁹ Jaqhal jaksom barima nga nuk ang esha som mong, etharin jashit jaksom barima nga nuk mong esha somlo chey roq eq ang.

²⁰ Nga barima nuk mong esha nga somlo ang jo, eshi somtey sha nga ang mong, etharin ijamna tong aa ngarey shey esha somlo aa.

²¹ Eshirangma iri thong raa somlo aa ta nga usam eq ang: baluk o jaqhal jaksom ma nuk ang, nga jashit hun somlo ang.

²² I tinmong wang Shkewa thong shima sungrang eq tong ang.

²³ Etharin ihan mong o adak thong somlo ta tha nga kap khi ang; eshi thong sha ithung raaq tang miiksuk eq thamol aa. Etho eshey nga sha ngarey thong o khak shing phang.

²⁴ Nga itan khangrang ahung miqna! Iri utik ihanphung wang utang eq nga thalun pha náng?

²⁵ Shkewa ma kechu ajong! Piq aa hiqtang Teyhungwa Jesu Khristo tungkang o nga raa thalun phang. Irimal ang ajo i thung wang nga Shkewa thong qha, etharin ihanngam wang ngarey thong qha.