Romans 6 - Muklom

Ngarey rangma tik, Khristo o tong

¹ Irimal ang ajo hiqtang chamta raaq ni? Ráng manchan daqhan cham ang aa ta hiqtang aa ngarey som chey ro eq i?

² Baluk o tho ang moq! Hiqtang ngarey rangma utik sey ang ti jo, chamal eq ngarey som eq wey tong chey ni?

³ Hiqtang bara Khristo Jesu o junglam ti, hiqtang utik jamoq urum ang ti ta nim aa sam min i?

⁴ Eshirangma junglam tungkang o hiqtang piq jamoq bing taphi, etho utik o rum ti, irimal ang eq Khristo wa phun amun tungkang o utik wang wey thajey ta shimal hiqtang tho anal rollung o tong ni.

⁵ Hiqtang utik sho piq jamoq rum tungkang o piq wey jey ta thimal hiqtang wey jey eq tho piq jamoq rum ni.

⁶ Hiqtang aking ngarey hanphung sha Khristo jamoq bólq o botchak ta ta hiqtang usam eq i, irimal ang eq hiqtang rollung na ngarey tarong màngti ta etho hiqtang ngarey qha ang eq wey tong mi sey angni.

⁷ Chammatakoi utang utik ang ajo piq ngarey wang aqhap sey.

⁸ Etho hiqtang Khristo jamoq utik ang ti jo piq jamoq tho utong ang ni ta hiqtang aa uhan eq i.

⁹ Chammatakoi Khristo utik wang weyjey angta etho wey ti moq sey angna ta hiqtang aa usam eq i. Thang wang utik eq piq tha jaktáng o shing moq sey angna.

¹⁰ Etho piq tita tho ngarey rangma jukshey dang tita; etharin piq Shkewa rangma atharang ang eq tong aa.

¹¹ Eshimal hun nim tho nim ni nim ngarey rangma amàng, etharin Shkewa rangma Khristo Jesu o atharang ta tathin inn.

¹² Nim aa ngarey hanphung ngikjuk sha phan ma ngarey eq nim hanphung shi jaktáng o shing ma nak kot inn.

¹³ Nim hanphung uking uphak shi aja jaksom rangma ngarey ma nak kot inn. Etharin nim ni nim utik wang weyjey ang ti ta sam eq Shkewa ma kot inn etho nim ni nim hanphung iking uphak shi asing jaksom rangma Shkewa ma kot inn.

¹⁴ Ngarey sha nim tangteywa ang ching ang moq, chammatakoi nim thong jaktáng na ang min etharin ráng manchan jaktáng na.

Asing qha

¹⁵ Irimal ang ajo chamlang aa? Hiqtang thong jaktáng na ang hunga ráng manchan jaktáng na ta ngarey sha somlo i? Baluk otho ang moq!

¹⁶ Nim aa chamtey miq raaq tat rangma nim ni nim sha qha mal kot inn jo, nim sha piq qha ta nim aa sam min i? Nim ngarey qha ma jin ang inn bara utik náng thu aa, ang moq ang jo Shkewa raaq jin tat eq aa bara asing náng thu aa.

¹⁷ Etharin Shkewa ma kechu ajong cham ang aa! Chammatakoi phang tho nim ngarey qha ang tin jo tho, thanga tin wang nim aa kap tin eshi tatal sha tat inn.

¹⁸ Nim ngarey wang aqhap sey etho asing qha sey.

¹⁹ Nim miq ang eq usam eq ma anung rangma nga salwet raaqtathak bat phang. Phang tho nim aa nim ni nim sha anaan etho aja qha ang eq kot tin shimal, thanga nim ni nim shi asang rangma asing qha ang eq kot inn.

²⁰ Nim ngarey qha ang tin tho, asing kowang aqhap ang tin.

²¹ Bari raaq wang thanga nim rakri ang inn, ning wang eshi rangham tho nim aa chamlang kap tin? Chammatakoi eshi tang ma uthun sha utik.

²² Etharin thanga ngarey wang nim aqhap sey etho Shkewa qha sey. Thanga nim aa asang rollung kap inn etho eshi uthun sha pattuk rollung.

²³ Chammatakoi ngarey jakthang sha utik, etharin Shkewa jakkot sha hiqtang Teyhungwa Khristo Jesu o pattuk rollung.