Romans 5 - Muklom

Nungmay nia tungmang

¹ Eshirangma hiqtang kam wang asing miq ta ang ti jo hiqtang Teyhungwa Jesu Khristo tungkang o Shkewa jamoq karok kara ang i.

² Kam wang hiqtang Shkewa ráng manchan náng thula angta, eshina hiqtang thanga utong ang i. Etho Shkewa phun amun tungmang sho hiqtang tharangka ang i.

³ Esha cham ang moq, hiqtang tsamnang na tho tharangka ang i, chammatakoi tsamnang wang thanan khong aa ta hiqtang aa usam eq i.

⁴ Thanan wang jaqhal dangjang khong aa, etho jaqhal dangjang wang tungmang khong aa.

⁵ Etho tungmang eq hiqtang tharakri pha mi, chammatakoi Asang Tsija bara hiqtang ma kot taphi, piq tungkang o Shkewa tinmat sha hiqtang tin o qhanta.

⁶ Hiqtang nong ahung rangham tho Khristo khakla rangham tho ngarey tang rangma tita.

⁷ Asing miq rangma chamtey miq tik ma nuk moq angna; jaqhal miq rangma chamtey miq mok tik angna.

⁸ Etharin hiqtang ngarey miqtang ang ti rangham tho Khristo hiqtang rangma ti eq Shkewa hiqtang o utinmat sha takhi ta.

⁹ Hiqtang thanga utahi tungkang o asing miq ang ti jo piq tungkang o Shkewa ajong tinqhat wang chamlang ma wey lun mi ang i?

¹⁰ Hiqtang Shkewa ralwa ang rangham tho umiqwasa tik tungkang o hiqtang sha piq jamoq karok kara ang ti jo, kara sey ang jio Umiqwasa rollung tungkang o hiqtang chamlang ma wey lun mi ang ni?

¹¹ Ira chen ang moq, etharin hiqtang Teyhungwa Jesu Khristo tungkang o Shkewa hiqtang jamoq kara ti, eshirangma hiqtang sungrang ang i.

Adam nia Khristo

¹² Ashey miqwa tungkang o ngarey sha mingkang náng thutapha etho ngarey tungkang o utik sha thutapha etho irimal utik sha thaji miqna náng thuta chammatakoi thaji eq ngarey tha somlo ta.

¹³ Thong kot wey moq rangham tho ngarey tha mingkang na atha angta, etharin thong ahung tungkang o ngarey sha wet moq angta.

¹⁴ Etharin Adam wang Moses náng thula utik eq miqtang tha tho utik jaktáng o shing ta. Bari miq rey raaqkhat tat hunga Adam mal ngarey som moqtey miqtang sha tho utik jaktáng o shing ta. Adam, uthok ang pha miq mal angta.

¹⁵ Etharin Shkewa jakkot sha Adam ngarey mal ang moq. Chammatakoi ashey miq ngarey wang daqhan miq tita, etharin Shkewa ráng manchan eshiwang ajong etho ujakkot sha tho rapney jong aa. Etho ashey miq Jesu Khristo ráng manchan wang daqhan miqtang eq eshi jakkot sha kapta.

¹⁶ Shkewa jakkot sha ashey miqna ngarey som thang mal ang moq. Chammatakoi ashey ngarey tungkang o khaphung sha thuta etho miqna sha aja ta shing ta; etharin daqhan ngarey jio Shkewa jakkot sha thuta etho miqna sha asing ta shingta.

¹⁷ Ashey miqna ngarey tungkang o utik eq ashey miq tungkang o jaktáng o shing ta. Irimal ang jo bari miqtang rey Shkewa ahan ráng manchan nia asing jakkot wang kaptey tang, ning sho ashey miq Jesu Khristo tungkang o pattuk rollung na asing hun jaktáng o shing na.

¹⁸ Eshirangma ashey ngarey shey thaji miqtang sha aja ta shingta thimal, ashey asing jaksom sha thaji miqtang ma asing miq ta shing ta etho ning ma rollung kot ta.

¹⁹ Etho ashey miq eq raaq tat moq tungkang o daqhan miq ngarey ta angta shimal, ashey miq eq raaq tat tungkang o daqhan miq asing miq ma angna.

²⁰ Ngarey daqhan cham ang aa ta thong sha kot ta. Etharin barina ngarey daqhan angta, eshina Shkewa ráng manchan eshi pheynáng eq tho daqhan angta,

²¹ Eshirangma ngarey eq utik tungkang o miqna sha jaktáng o shingta shimal hun asing tungkang o Shkewa ráng manchan shey miqtang sha jaktáng o shing aa, irimal ang eq hiqtang Teyhungwa Jesu Khristo tungkang o hiqtang ma pattuk rollung sha kot na.