Romans 3 - Muklom

¹ Irimal ang ajo Jehudi tang ang eq chamlang kap ni? Etha ang moq o hankhup qhan thang chamlang aa?

² Uphan wang daqhan ang aa. Phang tha Shkewa uraaq tha Jehudi tang ma kot ta.

³ Etharin ning wang chamtey kam moqtey ang ajo chamlang angna? Ning aa kam moq ang ajo Shkewa asing shi thanghung angna i?

⁴ Baluk otho ang moq! Shkewa sha asing etho thaji miqtang sha alik. Asang likwit na thawit aa, “Raaq wan ajo nang sha asing ta takhi ching; Etho khaphung rangham o nang aa ujin eq ching.”

⁵ Etharin hiqtang aja jaksom shey Shkewa asing jaksom sha jaqhal eq takhi i jo hiqtang aa chamlang ta raaq ni? Shkewa hiqtang ma kha eq thaja som aa i? (Ira nga miqna thong aa ley o bat ang.)

⁶ Baluk otho ang moq! Shkewa asing ang moq ang ajo piq aa mingkang shi chamal eq phung na?

⁷ Etharin i alik tungkang o Shkewa asing sha piq phun amun rangma ahan takhi ajo, nga sha thanga tho ngarey ta raaq eq chamma shing aa?

⁸ “Jaqhal khong rangma hiqtang aa jashit som ni” ta chamma bat mi angni? Nga irimal raaq ang ta bat eq chamtey eq nga junnam phang. Ning sha aja ta shing ching.

Utang tho asing miq ang moq

⁹ Irimal ang ajo, hiqtang Jehudi tang eq Gentile tang wang aqhal ta uthun raaq bat ni i? Baluk otho ang moq! Jehudi tang nia Gentile tang thani sha ngarey tarong jaktáng na ta nga nim ma takhi chol.

¹⁰ Asang likwit na thawit aa; “Asing miq utang tho ahung, ashey tho ahung.

¹¹ Utang tho asam atol ahung; utang tho Shkewa bitey ahung.

¹² Thaji Shkewa wang wel ta; Thaji alik ma khong aa; Utang tho jaqhal somtey ahung, ashey tho ahung.

¹³ Ning ruttung tha alak máng bung ching mal; Ning phali wang alik raaq khong aa; Ning nungbil wang pu tang umanhey raaq mal khong aa.

¹⁴ Ning nung tha manthun nia raaq kha eq sheyti aa.

¹⁵ Ning jaapha tha tahi takhong ma kalo tun aa.

¹⁶ Ning lam na uthun nia tsamnang.

¹⁷ Ning aa nungmay lam sha sam moq.

¹⁸ Ning miik jakho Shkewa ma cho ahung.”

¹⁹ Thong eq chamta bat aa sha thong jaktáng na tongtey rangma bat aa sha hiqtang aa usam eq i, irimal ang eq thaji nung sha shushu angna etho thaji mingkang sha Shkewa khaphung o angna.

²⁰ Chammatakoi thong jaksom wang utang tho Shkewa jakho na miq asing ang moq angna, etharin thong tungkang o hiqtang aa ngarey usom eq ti ta usam eq i.

Asing sha kam tungkang o

²¹ Etharin thanga thong ahung ang eq Shkewa asing sha takhi aa. Iri tung aa raaq thong nia rangsamal tang aa miikkhi kot aa.

²² Thaji kamtey tang rangma ang eq Jesu Khristo o kamtey tungkang o Shkewa asing miq ta shing aa. Chammatakoi eshina Jehudi tang nia Gentile tang dandey ahung.

²³ Thaji eq ngarey somta etho Shkewa phun amun wang alo na angta.

²⁴ Etharin Khristo Jesu aa ngarey thang kot eq thaji sha aqhap ma shing ta. Eshirangma Shkewa u ráng manchan tungkang o thaji sha asing miq ta shing ta.

²⁵ Shkewa Jesu tha ngarey kaley pinthong angma kot chak ta. Jesu aa utahi tasal eq urollung sha pinthong ma kot chak ta ta kam ajo miqtang sha Shkewa jakho na asing ma ang aa; irimal somlo eq Shkewa u asing sha takhi aa, chammatakoi nimpangning aa somlota ngarey miqtang sha tharo tatsam moq angta.

²⁶ Irimal somlo eq thaney nap aa piq aa chamlang somlo ma ta aa eshina ning sha thajoq ma piq aa tathin ta. Irimal ang eq piq ni piq aa hun asing etho Jesu sho kamtey tang sha asing sho shingtey ta takhi aa.

²⁷ Irimal ang ajo hiqtang chamlang ma tharangka i? Chamlang ma tho ang moq! Bari thong tungkang o irimal somlo ni? Hiqtang aa thong sha utat eq i ta irimal somlo ni i? Ang moq, etharin hiqtang kam tungkang o irimal somlo ni.

²⁸ Eshirangma hiqtang kam tungkang o Shkewa jakho na asing miq ma ang i, esha thong tat tungkang o ang moq ta hiqtang aa usam eq i.

²⁹ Shkewa shi Jehudi tang Shkewa chen i? Gentile tang Shkewa ang moq i? Inn, Gentile tang Shkewa tho ang ang aa.

³⁰ Shkewa ashey hun, piq hankhup qhantey ma kam tungkang o etho hankhup qhan moq tey ma tho eshi kam tungkang o asing miq ta shing aa.

³¹ Irimal ang eq hiqtang aa thong sha kam tungkang o shing chak eq i? Baluk tho ang moq! Hiqtang aa kam tungkang o thong tahom i.