Romans 16 - Muklom

Paul aa unokwa tang ma jak tachap kot aa

¹ Hiqtang no miqnu etho Cenchreae mondoli unongtey nu Phoebe rangma nga nim ma batphang.

² Chammal Teyhungwa miqtang sha rimrang ching eshimal piq shi rimrang inn. Piq ma chamlang raa aa shi unong eq inn, chammatakoi daqhan miqtang ma etho nga ma tho unong eq taphang.

³ Khrsito Jesu jaksom na ijamoq somlot tey Priscilla nia Aquila ma jak tachap.

⁴ Ning aa i rangma ning rollung sha kota. Ning ni rangma nga kechu ajong kot ang, etho Gentile thaji mondoli tang aa tho kechu ajong kot aa.

⁵ Ning ni him na thajotey mondoli ma tho jak tachap. Inokwa Epenetus ma jak tachap. Piq aa Asia mung na phang Khristo ma kamtey.

⁶ Mary ma jak tachap, piq aa nim rangma daqhan somlo ta.

⁷ Andronicus etho Junia ma jak tachap. Ning ni ijamna tongtey Jehudi etho ijamoq chuk náng wang ta. Apostle tang jaktung na ning ni sha rangka aa, etho i jakho o ning ni Khristo jiphantey angta.

⁸ Ampliatus ma jak tachap, piq Teyhungwa na itinmat nokwa.

⁹ Urbanus ma jak tachap, piq Khristo jaksom ijamoq somlot tey etho itinmat nokwa Stachys ma tho jak tachap.

¹⁰ Apelles ma jak tachap, piq Khristo na tunlang aa ta takhi ta. Aristobulus himtey tang ma jak tachap.

¹¹ Herodion ma jak tachap, piq ijamoq tongtey Jehudi. Narcissus himtey tang bari miqtang raa Teyhungwa na ning ma jak tachap.

¹² Tryphaena etho Tryphosa ma jak tachap, ning ni Teyhungwa o ahan jaksom somlo aa. Inokwa Persis ma jak tachap, piq aa tho Teyhungwa o ahan jaksom somlo ta.

¹³ Rufus ma bara Teyhungwa o talchol etho piq nu bara nga ma tho inu. Ning ni ma jak tachap.

¹⁴ Asyncritus, Phlegon, Hermes, Patrobas, Hermas, etho ning jamoq tongtey ning no nia naa tang ma jak tachap.

¹⁵ Philologus nia Julia, Nereus etho uno miqnu etho Olympas etho ning jamoq tongtey thaji Shkewa miqtang ma jak tachap.

¹⁶ Nim jaktung na asang eq takhi lot inn. Nim thaji ma Khristo thaji mondoli tang ching kowang jak tachap.

Uthun raaq

¹⁷ Thanga i no nia pho tang, nga nim ma tinthanin eq bat phang, nim jaktung na taphal ral kottey etho nim aa kap tin eshi tatal sha ang moq ang eq, adak tatal kot eq nim kam sha thanung tey wang rangtun eq tong inn. Ning wang alo na tong inn.

¹⁸ Irimal miq eq hiqtang Teyhungwa Khristo sha nong moq, u wok rangma nong aa; raaq nup nia nungmay raaq wang ning aa miqpot tang sha dip aa.

¹⁹ Nim aa raaq tat tin raaq sha thaji miq eq kap tat ta; eshirangma nga nim tung aa raaq ma sungrang ang etharin nim jaqhal rangma asam atol etharin jashit rangma miqpot angma nga tathin aa.

²⁰ Nungmay kottey Shkewa eq thangwa sha nim jaa khung na kalo tachak nak na. Hiqtang Teyhungwa Jesu ráng manchan nim ma cham ang chey aa.

²¹ Ijamoq somtey Timothy etho ijamoq tongtey Jehudi tang Lucius, Jason, etho Sosipater, ning ching kowang, nim ma jak tachap kot aa.

²² Iri likwit raa wittey nga Tertius Teyhungwa o nim ma jak tachap.

²³ Gaius ching kowang nim ma jak tachap kot aa, nga uhim na tong ang, etho uhim na mondoli tang thajoq aa. Mung lik aa ngin shingtey Erastus etho ino Quartus ching kowang nim ma jak tachap kot aa.

²⁴ Hiqtang Teyhungwa Jesu Khristo tinshit nim ma cham ang chey aa. Amen.

Uthun Romtam

²⁵ Hiqtang Teyhungwa ma phun amun! Nga Jesu Khristo tung aa raaq phanchan táng eshi tungtang qhal mal etho nimpang ning aa pang daqhan nángduk tapu angta apu ashim asing sha thalak ta tungkang o nim sha nim kam alam o Shkewa jin thalang eq phin.

²⁶ Etharin thanga eshi asing sha rangsamal tang likwit tungkang o thalak ta etho pattuk Shkewa raaqkhat tungkang o esha thaji phan ajat aa samtol ma kot ta, irimal ang eq Gentile tang kam eq tattey cham ang aa.

²⁷ Ashey dang Shkewa ma barey hun thaji samtoltey, Jesu Khristo tungkang o pattuk phun amun cham ang chey aa! Amen.