Romans 15 - Muklom

Miq dak sha tasungrang

¹ Hiqtang bara kam na arong, hiqtang aa anung tey tang sha nong ching, etho hiqtang ni hiqtang sha tasungrang ching ang moq.

² Hiqtang wang thaji eq adak miqtang ma jaqhal rangma, etho kam na ròng ma nong ching.

³ Chammatakoi Khristo aa tho piq ni piq tha tasungrang moq angta, etharin asang likwit na thawit aa thimal, “Nim junnam tey junnam sha i khom na angta.”

⁴ Chamtan raaq jakho wang thawit ta, eshi tang sha hiqtang tatal rangma ang aa, irimal ang eq asang likwit wang thanan nia tin tharong kap eq hiqtang aa tungmang cham kap i.

⁵ Etho thanan nia tin tharong kottey Shkewa nim ma Khristo Jesu raaq tathak mal nim ni nim jaktung na ashey tin ang eq cham tong aa.

⁶ Irimal ang jo nim ashey tin ang eq etho raaq shey ang eq hiqtang Teyhungwa Jesu Khristo Wa nia Shkewa sha tasapsey ni.

Gentile tang ma tungtang qhal

⁷ Chammal Khristo aa nim han taphin shimal hun nim aa tho ashey eq ashey ma han inn, irimal ang jo Shkewa ma phun amun angna.

⁸ Chammatakoi nga bat phang, Shkewa asing sha takhi ma Khristo sha Jehudi tang rangma qha angta, irimal ang eq bari rangtum raa tey aa wa tang ma kota eshi tang sha achìng angna.

⁹ Etho Gentile tang tho Shkewa tinsit tungkang o piq sha phun amun na. Asang likwit na thawit aa mal, “Eshirangma nga Gentile tang jaktung na nang sha tasapsey phanáng, Nga ba miing tasapsey sungsey sey náng.”

¹⁰ Etho wey bat aa, “Nim thaji Gentile tang, umiq tang jamoq sungrang ang inn.”

¹¹ Wey bat aa, “Nim thaji Gentile tang, Teyhungwa shi tasapsey inn; Mung thaji miqtang, piq shi tasapsey inn.”

¹² Etho Isaiah bat aa, “Jesse phi aa lí ashey takhi na, piq aa Gentile tang sha jaktáng o shing ma kapha na, piq o Gentile tang aa tungmang shing na.”

¹³ Tungmang kottey Shkewa nim kam tungkang o nim sungrang nia nungmay wang cham tashey phin, irimal Asang Tsija tarong wang nim tungmang shi cham chen chey aa.

Paul aa chamma ka aa

¹⁴ I pho nia no tang, nim tho thanga jaqhal wang etho thaji thung aa tal wang tong inn ta nga usam eq ang. Nim aa ashey eq ashey ma tho jin tatal eq inn.

¹⁵ Etharin iri likwit na nga nim ma chamlilang raaq na tasik bat rangma rapney rong eq, Shkewa ngama kot ta eshi ráng manchan tungkang o wit táng.

¹⁶ Gentile tang rangma Khristo Jesu thoksil battey ang rangma Shkewa ngama iri ráng manchan raa kot ta. Gentile tang Asang Tsija wang sang eq Shkewa tasungrang pinthong angma piq aa ngama Gentile tang ma tungtang qhal phanchan jaksom kot ta.

¹⁷ Eshirangma Shkewa wang jaksom tung aa raaq na, nga Khristo Jesu sho nga sungrang ang.

¹⁸ Khristo aa Gentile tang rangma iraaq nia ijaksom tungkang o Shkewa relnáng thoksol ma chamlang somta sha shingchak eq nga chamlang tung aa raaq ma tho bat ma tarong ahung.

¹⁹ Umal etho patja jaksom tarong wang etho Shkewa Tsija tarong tungkang o iri tang raa angta. Eshirangma nga Jerusalem wang Illyricum náng thula nga Khristo tungtang qhal thaji tha phanchan táng.

²⁰ Bari miqtang eq Khristo tung aa raaq sam moq eshina tungtang qhal phanchan rangma itinthin, irimal ang eq miqdak him thòng kho o nga nak cham hun ang.

²¹ Asang likwit na thawit aa, “Barima piq tung aa raaq bat moq angta, ning aa piq sha khina, barey tat moq angta, ning aa sam na.”

Paul Rome náng kat

²² Eshirangma nga nim rel náng katma juk daqhan táng taphang.

²³ Etharin thanga iri mung tang na thaji na ijaksom uthun sey angta etho pang daqhan wang nga nim relnáng katma nuk táng.

²⁴ Eshirangma Spain náng ka ang jo nim rel wang ka náng, etho nim jamoq tachong eq nga sungrang ang jo tho nim nong som eq jaqhing sha qhing náng ta tathin ang.

²⁵ Etharin thanga Teyhungwa miqtang sha nong ma Jerusalem náng ka ang.

²⁶ Chammatakoi Jerusalem wang Teyhungwa miqtang jaktung na tangshit tang rangma, Macedonia nia Achaia miq eq amaan dan lik aa ngin kotma tathin ta.

²⁷ Ning aa sungrang wang iri tang raa tathin ta, etharin ning aa irimal som hun eq ching angta. Chammatakoi tsija raaq na Gentile tang aa Jehudi tang sunmaan sha kapta; irimal ang jo hanngam raaq na Gentile tang aa ning sha unong eq ching.

²⁸ Eshirangma nga iri jaksom raa thun som eq etho ning ma iri lik aa ngin kot eq nim rel wang ang eq Spain náng kanáng.

²⁹ Nga nim relnáng thuphang jo, Khristo thaji sunmaan jamoq thupha náng ta nga usam eq ang.

³⁰ I pho nia no tang, hiqtang Teyhungwa Jesu Khristo tungkang o etho Asang Tsija tinmat tungkang o nga nim ma tasik bat phang, i rangma Shkewa ma romtam ma ijamoq kara inn.

³¹ Nga Judea haq hanmoq tey wang lun rangma etho nga Jerusalem náng bara ngin som kat ang, esha Teyhungwa miqtang eq tin kot eq cham som aa ta romtam chu inn.

³² Irimal ang jo nga Shkewa mongtham wang nim relnáng sungrang jamoq ka eq nim jamoq nángtong náng.

³³ Nungmay kottey Shkewa nim thaji jamoq cham tong aa. Amen.