Romans 12 - Muklom

Atharang pinthong

¹ I pho nia no tang, nga nim ma Shkewa tinshit tasik eq tinthanin eq bat phang, nim hanphung shi atharang, asang etho Shkewa nuk aa shimal pinthong kot inn; ira hun nim ma asing shumnuk.

² Iri mingkang miq dangjang mal nak ang inn, etharin nim thung anal ang eq nim dangjang shi cham kaley aa. Irimal ang ajo nim aa Shkewa tin sha sam nin; piq nim rangma aqhal, khakla, etho unuk ang eq tin shing aa.

³ Bari ráng manchan raa nga ma kot taphang nga eshi ráng manchan tungkang o, nim ma bat phang: nim ni nim tung aa raaq sha chamtan ahan tathin ching, eshiwang ahan nak tathin inn, etharin chamal eq Shkewa thaji ma kam phal kota eshi kam mal nim ni nim tung aa raaq jaqhal eq phung inn.

⁴ Hiqtang ashey hanphung na daqhan uking uphak ang aa etho adak adak uking uphak ma adak adak jaksom ang aa;

⁵ Eshimal hun hiqtang bara daqhan ang i, Khristo na ashey hanphung ang eq hiqtang ni hiqtang jaktung na ashey uking uphak.

⁶ Hiqtang ma kotaphi eshi ráng machan mal hiqtang ma adak adak jakkot kota. Utang eq raaqtóng ma jakkot kapta, piq aa kam eq raaqtóng bat ching.

⁷ Unong eq ma jakkot kapta jo unong eq ching, tataltey angma ang ajo tatal eq ching;

⁸ Tinthajong tey angma ang ajo, piq aa tinthajong ching; ukottey angma ang ajo tin lak eq kot ching; solwa angma ang ajo piq aa ahan jaksom som ching; tinshit takhitey angma ang ajo piq aa sungrang jamoq somlo ching.

⁹ Tinmat sha alik ang ching ang moq; anaan sha chikrik eq ching; bara jaqhal shi taching lo inn.

¹⁰ Jaqhal eq tinmat shi shing inn; ashey eq ashey sha rangka ma tin shing inn.

¹¹ Ajung nak ang inn etharin achet achan jaksom somlo inn. Nim tin nim mong thaji shiwang Teyhungwa jaksom shi somlo inn.

¹² Tungmang sho sungrang eq tong inn; tsamnang na thanan shing inn; romtam na arong tong inn.

¹³ Teyhungwa asang miqtang ma chamlang ràa aa, eshi tangma ning shi nong inn; adak miqtang ma nim him shi alak shing inn.

¹⁴ Tahitham tey tang ma sunmaan kot inn; ning ma sunmaan hun kot ching, mantun nak kot inn.

¹⁵ Sungrang tey tang jamoq sungrang ang inn etho uqhaptey tang jamoq uqhap ang inn.

¹⁶ Nim ni nim jaktung na tin ashey shing inn. Tharangkatey ma nak ang inn, etharin tinnintey tang jamoq tong ma nuk inn; nim aa phanrip samtol i ta nak tathin inn.

¹⁷ Jashit kaley utang jamoq tho jashit nak som inn; bara thaji miiksiin na jaqhal, esha somlot ma tathin inn.

¹⁸ Chamtan náng jin angna, nim thaji miqtang jamoq nungmay eq tong inn.

¹⁹ I no nia pho tang, mangkho chuk nak chu inn; eshi raaq shi Shkewa tinkhat na shing inn. Asang likwit na thawit aa, “Teyhungwa bat aa, ‘Mangkho chuk sha i jaksom, nga hun thawel kot náng.’”

²⁰ Iri kaley, “Nim ralwa sha chamlal na ang ajo piq ma til shi taphak sat inn, junglal na ang ajo piq ma jung thaling inn; irimal som ajo nang aa piq kho shina rakri walkhil sha thajung nu.”

²¹ Anaan shey nang shi nak thajin u, jaqhal wang jashit shi jin inn.