Romans 11 - Muklom

Shkewa Israel ma tinshit

¹ Nga pit phang, Shkewa umiq tang sha shing chak eq ta i? Baluk o tho ang moq! Nga tho Israel miq, Abraham phi aa lí etho Benjamin phan wang.

² Piq aa jakho wang hun samtey umiqtang tha shingchak moq angta. Asang likwit eq Elijah raaq chamta bat aa shi sam min i - Israel sha miiksuk eq piq aa Shkewa ma tinthanin eq bat aa.

³ “Teyhungwa, ning aa ba rangsamal tang tha tatik chakta etho ba rongthung tang tha pan chak ta; nga chen hun dak táng etho ning aa irollung sha tatik eq ma tho ubi eq aa.”

⁴ Shkewa wang piq aa chamlang thawel kapta? “Baal jakho na bon moq tey hayat sanat miqtang nga i rangma shing táng.”

⁵ Irimal wang iri rangham otho, ráng manchan wang taltey amaan dan miq udak atha.

⁶ Ira ráng manchan wang, jaksom wang ang moq, eshimal ang moq angta jo Shkewa ráng manchan sha thang wang asing ráng manchan ang moq ang wang ta.

⁷ Irimal ang ajo chamlang aa? Israel tang aa chamlang bita, esha ning aa kap moq angta; utal tey eq esha kapta etho adak tang ma tin tachan kot ta.

⁸ Asang likwit na thawit aa, “Thaney saal náng thula Shkewa ning ma mángtik tsija kot ta etho ning aa miik eq jin khi moq etho naq eq jin tat moq.”

⁹ David aa bat aa, “Ning kut aa kan sha ning rangma bey etho thaman phan cham ang na, esha thabot nia tsamnang cham ang na.

¹⁰ Khi moq angma ning miik shi cham nak ti na, Pattuk rangma ning shi chongbon ma tsam na.”

¹¹ Nga pit phang, ning qhat eq uthun angma thabot ta i? Baluk o tho ang moq! Chammatakoi ning aa ngarey som tungkang o Israel miq thangeljo ma, Gentile tang aa lunwan kapta.

¹² Ning ngarey tungkang o mingkang rangma ajong sunmaan thuta etho ning ma akum sha Gentile tang ma ajong sunmaan ang ching angta jo Israel miqtang shey lunwan kap ajo esha chamtan sunmaan angna.

Gentile tang aa lunwan kap aa

¹³ Nga nim Gentile tangma iri raaq raa bat phang. Nga Gentile tangma apostle ang ang jo, nga ijaksom ma tharangka ang ang.

¹⁴ Chammal eq tho nga imiqtang ma thangeljo eq ning wang chamtey thalun eq náng ta nga tungmang shing ang.

¹⁵ Ning shingchak sha mingkang kara ma angta jo, ning aa han ajo chammal angna? Esha utiktey tang ma rollung angna!

¹⁶ Phang banlo sha asang angta jo thaji unat eq ta ban sha tho asang. Uchíng sha asang ang ajo uking sha tho eshimal hun.

¹⁷ Urim olive bangking wang kingshey ni sha duk chak eq jat olive bangking sha esho tharap ta. Nim Gentile tang sha eshi jat olive bangking mal etho thanga nim sha urim olive bang jamtey mal rimram kap inn.

¹⁸ Irimal ang ajo duk eq ta eshi bangking shiwang wang nim ajong ta nak tathin inn. Nim aa irimal tathin inn jo iri sam inn, nim aa uchíng sha thalang min, uchìng eq nim sha thalang phin.

¹⁹ Nim aa bat inn, “Nga sha tharap ma uking sha dukta.”

²⁰ Asing. Ning aa han moq tungkang o duk chak ta etho nim han tungkang o lang inn. Eshirangma nak tharangka inn. Etharin ucho ang inn.

²¹ Shkewa asing uking uphak tha shing moq angta jo nim sha tho shing moq angna.

²² Eshirangma Shkewa tinnin nia tinqhat shi siin inn! Bara ngakwang angta ning ma utinqhat, etharin nim piq jamoq rap inn jo nim jamoq tinnin. Nim piq jamoq rap min ang inn jo nim thaduk eq chak pha nin.

²³ Etho ning aa hanmoq sha shing chak ajo ning sha ning uking sho wey tharap na chammatakoi Shkewa ning sha wey jin tharap eq na.

²⁴ Nim sha dangjang wang jat olive bangking mal, bara thaduk eq chak ta, irimal ang eq tho urim eq ta olive bangking sho tharap ta. Irimal ang jo asing bangking sha ning bang sho tharap ma Shkewa chamtan nuk na.

Israel tang ma Shkewa tinshit

²⁵ I pho nia no tang, nim ni nim tung aa raaq na tharangka ang moq angma nim iri apu ashim raaq raa samtol ma nga nuk ang. Gentile tang wet chol sha Shkewa relna thuwey moq ling, Israel miqtang tin sha chet roq angna.

²⁶ Irimal wang thaji Israel tang aa lunwan kapna; Asang likwit na thawit aa, “Thaluntey Zion wang thupha na, etho piq aa alik tang sha Jacob phi aa lí tang wang phal chak na.

²⁷ Ning jamoq i raaqkhak sha ira hun angna, Nga ning ngarey sha lat chak náng.”

²⁸ Ning aa tungtang qhal sha chik tungkang o ning Shkewa ralwa tang ma angta, etharin esha Gentile tang ma jaqhal ma angta. Etharin ning tey aa wa tang sha Shkewa tal tungkang o ning thanga tho piq tinmat miqtang.

²⁹ Shkewa ujakkot wang etho uhal eq ta eshiwang baluk otho kaley moq.

³⁰ Nim Gentile tang jakho Shkewa raaq tat min ang tin; etharin thanga nim aa Shkewa tinshit kap inn, chammatakoi Israel miqtang Shkewa raaq sha tat moq angta.

³¹ Eshimal hun nim aa tinshit kap tungkang o Israel miqtang aa Shkewa raaq tat moq, irimal ang eq ning atho Shkewa tinshit thanga kapna.

³² Shkewa thaji ma tinshit takhi rangma, piq aa thaji miqtang sha raaq tat moq mong o tángsak shing ta.

Shkewa sha shumnuk

³³ Shkewa asam atol nia thung atal shi chamtan ma ajong aa! Piq khaphung nia lam sha samtol ma chamtan hal aa!

³⁴ Asang likwit na bat aa, “Teyhungwa thung shi utang eq sam aa? Utang piq ma jaqhal raaq bat eq tataltey ang aa?

³⁵ Piq aa thawel kot rangma, utang eq jakho piq ma kot aa?”

³⁶ Piq ching kowang etho piq tungkang o etho piq rangma hun thaji sha hunta. Piq phun amun shi pattuk rangma cham ang aa! Amen.