Revelation 1 - Muklom

Phang tung aa raaq

¹ Jesu Khristo takhi raaq sha iri likdap ro thawit aa. Kalo chamlang angna eshi raaq sha usanga tang ma takhi ma Shkewa piq ma iri takhi raa kot ta. Khristo aa urangkamwa tha takat eq piq tungkang o usanga John thima iri raaq raa tasam ma kot ta.

² John aa chamlang khita eshi tang sha bat kot ta. Iri tang raa Shkewa raaq tang etho Jesu Khristo miikkhi.

³ Utang eq iri raaqtóng raaq raa phat aa, etho irina bat aa sha tat aa ning sha sunmaan, chammatakoi rangham sha arelna.

Sanat mondoli tang ma John raaq bat

⁴ John ching kowang Asia mung sanat mondoli tang ma: Shkewa ching kowang nim rangma ráng manchan nia nungmay cham ang aa, bara ang aa etho bara angta etho bara ukat angtey; etho piq tongching jakho na eshi sanat tsija tang ching kowang,

⁵ etho Jesu Khristo ching kowang nim rangma ráng manchan nia nungmay cham ang aa, bara kamtey miikkhi kottey, etho phang utik wang wey jey tey, etho mingrip mungrang lungwang tang jaktáng o shingtey. Piq aa hiqtang ma tinmat shing aa, etho piq aa utahi tungkang o hiqtang sha ngarey wang thalun taphi.

⁶ Hiqtang ashey mung angma etho uwa Shkewa rangma tingwa tang angma piq aa hiqtang raa hunta. Piq rangma phun amun nia tarong shi salwet cham ang aa! Amen.

⁷ Siin inn, piq phun tang jamoq kapha; thaji miik eq piq sha khina, utang eq piq tasam ta, ning aa tho piq tha ukhi eq na, etho mingkang thaji miqtang ma piq tungkang o tin tashit na. Irimal hun cham ang aa! Amen.

⁸ Teyhungwa Shkewa bat aa, “Nga hun Alpha nia Omega etho bara ang aa, etho bara angta etho bara ukat ang phana. Nga thaji pheynáng eq Ajong.”

Khristo takhi

⁹ Nga John, bara nim no, etho tsamnang na etho Shkewa mungtan na etho nim jamoq Jesu o tinthaman eq jakho náng ka ang. Etho nga Shkewa raaq rangma etho Jesu rangma miikkhi tungkang o Patmos ta miing aa jung jaktung haq na ang táng.

¹⁰ Teyhungwa saal o Tsija nga raa lota phang, etho iji kona lirong tom ajong thara atha kap tat táng.

¹¹ Ira batta, “Bara nang aa khi u, eshi likdap sho ka eq sanat mondoli tang relnáng takat u: Ephesus, Smyrna, Pergamum, Thyatira, Sardis, Philadelphia etho Laodicea.”

¹² Esho bara nga ma bat phang tha esha siin rangma ungik ang táng, etho sanat hun aa cha nalpang shingching khi táng;

¹³ Eshi nalpang shingching jaktungna Miqna Sa mal ashey miqwa khi táng, bara ujaa náng thula khat sam eq, etho utiik shina hun aa cha khat samta.

¹⁴ Piq kho wang khorun tha kelwut hanrun mal apung angta, etho esha ngelti mal apung angta, etho umiik tha wal jung mal angta.

¹⁵ Ujaa tha waljung ajong thináng so eq chìng mal khìngta; etho uraaq tha jajong aa jung thara qhat aa thimal angta.

¹⁶ Piq jakqha kot jak thina sanat taset som chey ta, etho unung wang thani kothina jantong thalat ta; etho usham sha rangney rangsal mal phakta.

¹⁷ Nga piq tha khi ang tho, ujaa relna amáng mal ngak wang táng, etho piq aa nga tha ujak qha eq lo eq bat taphang, “Nak cho u; nga Phang nia Uthun.

¹⁸ Nga atharang. Nga utik ang táng, etho thanga siin u, nga pattuk rangma atharang. Utik nia utiktey mingrip mungrang sha i jaktáng na.

¹⁹ Eshirangma bara nang aa khitu eshi tang shi ka u; bari raaq raa thanga ang chey aa etho bari raaq raa iri jio angna eshi tang shi ka u.

²⁰ Nang aa ijakqha kona khitu sanat taset etho sanat hun aa cha nalpang shingching apung ashim raaq tha ira; sanat taset tang sha sanat mondoli rangkamwa tang, etho sanat nalpang shingching tang sha sanat mondoli tang.”