Philippians 4 - Muklom

Paul aa Philiphi tang ma raaqkhat kot aa

¹ Eshirangma ino miqnu nia miqwa tang, nga nim ma rapney nuk phang, etho usiin eq ma nuk ang. Nim aa ngama sungrang nia tharangka ma kot phin. I noknu nia nokwa tang, Teyhungwa o nim arong eq lang inn.

² Euodia nia Syntyche, nim ni ma bat phang, nim ni Teyhungwa miq, eshirangma ashey ashey raaq o kara eq tong shin.

³ Nang raa asing jaksomtey, nga nang ma bat phang, nang aa iri miqnu ni ri nong u. Chammatakoi ning ni aa Clement nia adak nongtey jamna tungtang aqhal phanchan ma ijamna rapney somlo ta. Ning thaji sha miing rollung likdap na.

⁴ Nim Teyhungwa miq ang tungkang o salwet sungrang inn. Nga wey bat phang sungrang ang inn.

⁵ Nim tinnin miq ta thaji eq sam ma kot inn, Teyhungwa kalo kapha na.

⁶ Chamlang raaq ma tho nak tathin inn, etharin thaji raaq shima romtam chu inn, etho kechu ajong kot eq nim raaq shi Shkewa ma bat inn.

⁷ Etho Shkewa nungmay sha bara utang miq eq tho jin sam moq, nim thung nia tin sha Khristo Jesu na thalun eq shing na.

⁸ Uthun o i no miqnu nia miqwa tang, bara asing, bara rangka eq ching, bara khakla, bara asang, barey sungrang kot aa, bara rapney qhal aa, bari tung aa raaq raa aqhal raaq, eshi tang shi tathin inn.

⁹ Nim aa bari raaq raa iching wang tatal tin, iching wang kap tin, iching wang tat tin, etho bara nga somlo ang tha nim aa khi tin, eshimal somlo inn. Etho nungmay kottey wa Shkewa nim jam na tong na.

Paul aa jakkot ma kechu ajong kot aa

¹⁰ Teyhungwa na nga rapney sungrang ang, chammatakoi daklot jio nim aa irangma wey tathin inn. Nim aa irangma salwet tathin inn ta nga usam eq ang, etharin nim aa nga nong ma lam kap lak min ang tin.

¹¹ Nga ma ngin ràa aa ta bat phamong, chammatakoi chamal ang jo tho eshina sungrang tong ma nga usam eq ang.

¹² Nga ngin hunga jin tong ang ma usam eq ang, etho ahan o tong ma tho jin sam eq ang; chamal rangham ang ajo tho, wok phutla phaksat ang jo tho, wokkam ang ang jo tho etho ahan ang eq etha ang moq o aney ang eq sungrang eq tong ma nga usam eq ang.

¹³ Khristo tarong kot tungkang o nga phanrip jin somlo eq ang.

¹⁴ Etharin nim aa nga tsamnang rangham sho nong sha jaqhal angta.

¹⁵ Nga tungtang qhal phanchan chey ang tho nga Macedonia shingchak katang rangham tho nim mondoli tang aa hun nga nong taphin. Iri raaq raa nim Philippi tang aa jaqhal eq sam inn.

¹⁶ Nga Thessalonica na tong rangham tho nim aa nga ma ràa aa tho wey nong taphin.

¹⁷ Nga jakkot kap ma nuk ang ta bat phamong. Etharin nim aa bara nong kot inn, eshima ahan jakkot cham kap inn ta nga tathin ang.

¹⁸ Thanga ngama chamlang ràa ta sha thaji kap sey táng, esha i ching na daqhan ang aa. Bara nim aa Epaphroditus jakkot takot tin tha, esha tho kap eq i ching na achang sey. Iri jakkot tang raa Shkewa tasungrang etho jaqhal hamting ang aa pinthong mal.

¹⁹ Etho i Shkewa nim ma chamlang ràa aa sha Khristo Jesu tungkang o thaji piq aa lik aa ngin nim ma kot pha nin.

²⁰ Hiqtang wa Shkewa ma phun amun shi pattuk rangma cham ang aa. Amen.

Paul uthun raaq bat

²¹ Khristo Jesu na Shkewa miqtang thaji ma jaktachap kot aa. I jamoq tongtey miqnu miqwa tang aa nim ma jak tachap kot aa.

²² Iri wang thaji Shkewa miqtang aa nim ma jak tachap kot aa. Iri náng eq tho ahan ajong lungwang him na tongtey miqtang aa jak tachap kot aa.

²³ Teyhungwa Jesu Khristo ráng manchan nim thaji jamna cham ang aa.