Philippians 3 - Muklom

Asing Khristo

¹ Uthun ma, i no nia pho tang, nim Teyhungwa na sungrang ang inn. Eshi raaq sha jukni juktom nim ma wit ma nga ma tsamnang ahung, etho ira nim rangma utáng eq ching angna.

² Jashit jaksom tey hi tang wang etho hankhup qhantey tang wang rangtun eq tong inn.

³ Hiqtang raa hun asing hankhup qhan kap chol tey tang, chammatakoi hiqtang aa Shkewa sha u Tsija wang tasapsey i, etho Khristo Jesu na tharangka kot aa, etho hiqtang aa hankhup o tungmang shing mi.

⁴ Nga asing somlo táng shina tho tharangka jin shing eq ang. Utang eq piq ni piq jaksom shina tungmang shima tinthin atha ang jo nga piq jaksom wang tho ahan jin somlo eq náng.

⁵ Saal ashat tho i hankhup qhan ta, nga Israel miq etho Benjamin phan ajat wang, nga raa Hebrew miq mey hun. Jehudi thong na bat ijo nga Phorisi.

⁶ Ngeljo eq bat inn jo, nga mondoli tahitham tey miq, etho thong tat tung aa raaq bat inn jo nga jat moq.

⁷ Etharin bara nga ahan kap ching angta, thanga eshi thaji tang sha Khristo tungkang o chamtho ahung ta tathin ang.

⁸ Iri tang raa chen ang moq, jakho chamlang somti eshi tang sha chamtho qhak moq etho Jesu Khristo sha i Teyhungwa ta sam ang jo hun thaji wang aqhal etho rapney thangchan. Piq rangma nga iri tang thaji raa shingchak táng etho eshi tang sha chamtho qhak moq ta nga tathin ang, irimal ang eq nga Khristo sha kap náng,

⁹ etho nga piq jamoq kara ang náng. Thangwang nga ma thong tang sha tat eq kap aa eshi asang sha ahung. Thanga nga ma Khristo ma kam eq kot aa, eshi asing sha hun ang aa, bara Shkewa wang kam tungkang o miqtang sha kap i.

¹⁰ Nga Khristo sha sam ma nuk ang, etho piq wey jey tarong sha nga kap ma, etho piq jamoq tsamnang nan rangma etho piq tik na rum ma somlo ang.

¹¹ Nga chamal eq tho utik wang wey jey ang ching.

Paul aa Philiphi tang ma piq mal tong ma bat aa

¹² Nga kap sey tang ta etha ang moq ajo khakla sey ta bat phamong; etharin nga eshi tang sha kap ma salwet somlo ang, bari rangma Khristo Jesu aa nga tal ta phang.

¹³ I no nia pho tang, nga kap sey táng ta tathin mong, etharin nga ashey jaksom somlo ang, chuwang angta tang sha lak chak eq jakho na chamlang ang ta shináng thuk ma thak somlo chey ang.

¹⁴ Nga khongpha kap rangma thaksi eq jol ang, iri kongpha raa mungtan na tong ma Shkewa eq Khristo Jesu na hiqtang ma hal taphi.

¹⁵ Eshirangma hiqtang wang chamtan Tsija na miqlang sey, ira tathin ching. Etho chamtey ma chamli tinthin adak atha ang ajo esha tho Shkewa ning ma takhi eq na.

¹⁶ Eshirangma hiqtang bari náng thuti, eshimal hun qhing ching.

¹⁷ I no nia pho tang, nim thaji nga qhing ang mal qhing inn. Nim aa í jiphan phin thimal í mal tongtey adak miqtang shi tho uphan eq inn.

¹⁸ Chammatakoi nga jukni juktom bat taphang raaq mal wey qhap eq bat phang, Khristo bólq rangma ralwa tang daqhan ang aa.

¹⁹ Ning walmungtan náng hun thun na, chammatakoi ning wok sha hun ning rangwa. Barima rakri ang ching, ning eshima tharangka ang aa. Ning tin sha mingkang tangwang tinthin na tham nak aa.

²⁰ Etharin hiqtang raa mungtan miq, etho hiqtang thaluntey Teyhungwa Jesu Khristo mungtan wang kat ban i.

²¹ Piq aa utarong wang thaji tangwang sha ujakkhung na jin shing eq aa, eshi tarong wang piq aa hiqtang mingkang hanngam sha piq aa phun amun hanngam mal kaley na.