Philippians 2 - Muklom

Khristo mal tinin ang inn

¹ Khristo aa nim rollung ma tarong kot aa, utinmat eq nim ma nángtong kot aa, piq Tsija eq nim ma ashey eq ashey kara eq tatong phin, etho piq manchan etho tinmat eq ashey eq ashey relnáng thok sol eq thu ajo,

² I sungrang shi tahom inn. Iri rangma ashey tin ang eq tong inn, ashey tinmat hun shing inn, ashey tsija ang eq tong inn, ashey tinthin hun shing inn.

³ Nim ni nim rangma chen tathin ma tia tharangka takhi rangma chamtho nak somlo inn. Etharin tin thanin eq ashey ashey ma nim náng eq aqhal ta tathin inn.

⁴ Nim ni nim aqhal angma chen nak tathin inn, etharin miqdak tang jaqhal rangma tho tathin eq inn.

⁵ Chamal Khristo Jesu aa tathin tak ta thimal, nim tathin tak sha tho ang ching.

⁶ Khristo sha Shkewa hun angta, etha otho Shkewa rol ang chey roq angma tathin moq angta.

⁷ Etharin piq aa phanrip tang tha shingchak ta, etho piq sanga mal angta. Etho piq miqna ang eq chang ta,

⁸ Etho piq miqmal ang eq piq ni piq tha thanin chak ta. Utik náng thula Shkewa raaqkhat tat ta etho bólq na urollung tho kot eq ta.

⁹ Eshirangma Shkewa piq tha rapney ajong alang ma hunta. Etho thaji miing wang ajong miing tha piq ma kota

¹⁰ Eshirangma mungtan wang, mingkang haq wang, etho mingkang khung wang thaji phan sha Jesu miing o bon na.

¹¹ Etho thaji phan Wa Shkewa phun amun rangma, Jesu Khristo raa hun Teyhungwa ta raaq na.

Mingkang na wallit tang mal phang

¹² Inoknu nia nokwa tang, nga nim jamna ang táng rangham tho nim aa salwet i raaq tat tin. Thanga nga nim wang alo na ang táng rangham tho iraaq jaqhal eq tat ching. Nim thalun tahom ang rangma ucho nia mo eq somlo inn.

¹³ Chammatakoi nim unuk angma etho piq raaq tat ma Shkewa nim jaktung na somlo aa.

¹⁴ Japjo hunga etho thadan hunga thaji jaksom somlo inn,

¹⁵ irimal ang ajo, nim jatmoq ang eq etho asang ang eq Shkewa susa tang mal ang inn. Nim ahut alik nia ahan ngarey miqtang jaktung na tong inn jo tho nim rangkang wang taset tang mal lit ching.

¹⁶ Etho nim aa rollung raaq somlo inn. Irimal ang eq Khristo saal o iri raaq rima nga tharangka ang náng, i tatut jol nia jaksom tang sha thanghung na ang moq angta.

¹⁷ Nim kam jaksom Shkewa pinthong mal, iri pinthong kho o i tahi tasal ang ajo tho, nga sungrang ang náng etho nim thaji jamoq sungrang ang.

¹⁸ Eshimal nim tho sungrang ang inn etho i jamoq sungrang inn.

Timothy nia Epaphroditus

¹⁹ Nga kalo Timothy nim relnáng takat phanáng ta nga Teyhungwa Jesu ma tungmang ang. Irimal ang ajo nim tung aa raaq kap tat eq nga sungrang ang náng.

²⁰ I relna adak utang tho ahung, barey Timothy mal asing tin wang nim rangma tathin aa.

²¹ Chammatakoi thaji aa ning ni ning rangma chen tathin aa, utang eq tho Jesu Khristo raa tathin moq.

²² Etharin Timothy jaqhal dangjang sha nim aa usam eq inn. Chammal usa uwa jamna tong aa, eshimal hun piq tho tungtang qhal phanchan ma i jamoq rap nong aa.

²³ Nga chamal ang náng ta sam jio kalo hun Timothy sha nim relnáng takat phanáng ta nga tungmang ang.

²⁴ Etho nga tho kalo nim relnáng kapha náng ta Teyhungwa ma tungmang ang.

²⁵ Etharin i no Epaphroditus sha nim relnáng wey takat eq phana ta nga tathin ang. Piq ijamoq somtey nia thamol tey. Nim aa ngama ràa tok o nga nong ma piq i relnáng takat taphin.

²⁶ Piq aa nim siin ma rapney nuk aa. Nim aa piq taksa tung aa raaq tat eq tin, eshirangma piq tin rapney shit aa.

²⁷ Asing piq atak angta etho piq tik koko angta. Etharin Shkewa piq ma manchan ta. Piq ma chen ang moq, ngama tho manchan taphang. Ang moq ang ajo ngama tintashit pheynáng eq tho tintashit ang wang ta.

²⁸ Eshirangma nga piq sha takat ma rapney nuk ang. Irimal ang ajo nim aa piq sha wey khi eq sungrang ang inn etho i tinthin sha tho ukum angna.

²⁹ Eshirangma piq shi Teyhungwa miing o sungrang eq thawan inn. Etho piq shimal miqtang shi rangka inn.

³⁰ Chammatakoi Khristo jaksom na piq rollung sha tsamnang náng kot eq utik mal angta. Bari nong raa nim aa i rangma jin somlo min ang tin, esha tahom angma piq aa irimal somlo ta.