Philippians 1 - Muklom

Phang raaq

¹ Iri likwit raa Khristo Jesu sanga tang, Paul nia Timothy chingko wang. Philippi na tongtey Khristo Jesu ma uhantey tang, etho mondoli solwa tang nia nongtey tang ma iri likwit raa witchey ang.

² Hiqtang Wa Shkewa etho Teyhungwa Jesu Khristo ching wang nim ma ráng manchan nia nungmay cham ang aa.

Paul romtam nia kechu ajong

³ Baluk otho nga nim tasik phang, eshi thaji rangham o nga i Shkewa ma kechu ajong kot ang,

⁴ etho nga nim thaji rangma baluk o romtam chuk ang, nga sungrang eq romtam chu ang,

⁵ chammatakoi nim aa phang saal wang tha thaney náng thula tungtang qhal phanchan rangma nga nong taphin.

⁶ Shkewa nim jaktung o iri jaqhal jaksom raa phang somlo ta, etho Khristo Jesu saal o iri jaksom raa tathun náng thula piq aa somlo chey roq eq na ta nga han ang.

⁷ Nim thaji rangma nga irimal tathin raa khakla, chammatakoi nim thaji i tin na! Nga thanga chukna tong ang jo tho, etha ang moq ang ajo tho nga asing tungtang qhal phanchan ang jo tho Shkewa nga ma kot taphang ráng manchan sho nim tho rok rum phin.

⁸ Shkewa usam hun eq aa, Khristo Jesu aa chammal nim ma tinma aa, shimal nga tho nim ma tinma phang.

⁹ Nim thung jamoq etho jaqhal jashit sing sam eq nim tinmat chalot cham ang aa ta nga romtam chu ang.

¹⁰ Irimal ang eq nim thaji phey náng eq jaqhal sha jin tal inn etho Khristo saal o nim asang nia chamtho jashit ang moq ang eq angna.

¹¹ Nim rollung na asing tingo sha Jesu Khristo wang thu tapha sha nim jaktung na shey ching. Iri wang Shkewa ma tasapsey nia phun amun kapna.

Tungtang qhal rangma Paul chukna

¹² I pho nia no tang, i jamna chamlang angta, eshiwang tungtang qhal taqhong dang rangma nong taphin.

¹³ Ethirangma nga Khristo rangma chukna ta thaji lungwang him bantey tang etho irina thaji miqtang eq usam eq ta.

¹⁴ Nga chukna ang tungkang o ahan Teyhungwa hantey tang aa cho hunga tungtang aqhal phanchan ma tarong kap ta.

¹⁵ Asing eq chamtey miqtang ngeljo etho thadan ang rangma Khristo tung aa raaq phanchan aa. Etharin adak miqtang aa jaqhal tinthin eq phanchan aa.

¹⁶ Iri miqtang rey Khristo ma tinmat tungkang o phanchan aa, chammatakoi nga tungtang qhal thalun rangma chukna ta ning aa usam eq aa.

¹⁷ Chamtey miqtang eq Khristo tung aa raaq rangma jaqhal eq phanchan moq. Etharin ning ni ning aa ahan kap rangma phanchan aa. Nga chukna tong rangham na ngama ahan tsamnang kot rangma ning aa tathin aa.

¹⁸ Etharin chamtho ang moq! Jaqhal tinthin wang etha ang moq o jashit tinthin wang chamal ang ajo tho Khristo tungtang qhal raaq phanchan aa. Ethirangma nga sungrang ang etho sungrang ang chey náng.

¹⁹ Chammatakoi nim romtam nia Jesu Khristo Tsija nong wang i rangma chamlang angta eshi tang wang nga lun rangma angna ta nga usam eq ang.

²⁰ Nga baluk o tho rakri mong ang náng, etharin salwet urong ang náng ta nga tinmong wang rapney tathin eq tungmang shing ang, irimal ang jo thaji rangham angta thimal, thanga tho i rollung sha Khristo ma phun amun konáng. Nga atharang tong ang jo tho etha ang moq ang eq nga utik ang jo tho eshimal hun angna.

²¹ Chammatakoi nga atharang tong ang jo Khristo rangma nga atharang tong náng, etho nga utik ang jo ahan aqhal angna.

²² Nga atharang tong ang jo Khristo rangma ahan jaksom jin somlo náng. Ethirangma chamlang tal ching sha nga sam mong.

²³ Chammatakoi nga thani konáng hum phang thimal. Nga iri rollung shingchak eq Khristo jamoq tong ma nuk ang, chammatakoi iri tang raa aqhal.

²⁴ Etharin nim rangma nga atharang tong sha ahan ràa aa.

²⁵ Iri raaq rangma nga tungmang shing ang, ethirangma nga atharang tong náng etho nim kam lam o jakho náng katma etho sungrang ang rangma nga tong chey roq ang náng.

²⁶ Bari tharangka raa i tungkang o ang aa, esha nga nim relnáng wey kaphang jo Khristo Jesu o ahan chalo na.

²⁷ Thaji phey náng aqhal raaq ira, nim dangjang Khristo tungtang qhal na batta shimal ang ching. Irimal ang ajo, nga thu eq siin phang jo tho etho siin hunga tat ang jo tho, nim thaji tsija na ashey ang ching etho tungtang qhal han rangma nim thaji arum aa ka inn ta nga usam eq náng.

²⁸ Ralwa tang ma nim amaan tho nak cho inn. Irimal ang ajo, ning uthun angna etho nim aa ulun kap nin ta ning aa usam eq na. Shkewa hun irimal somlo aa.

²⁹ Nim aa Khristo jaksom somlo ma kap tin, chammatakoi piq sha han ma chen ang moq, etharin Khristo rangma tsamnang thanan eq ching.

³⁰ Chamal nim aa nga tsamnang khi tin etho thanga nim aa nga tsamnang nan ang ta tat inn, eshimal hun nim i jamoq tsamnang nan inn.