Matthew 7 - Muklom

Adak miq sha khaphung

¹ “Miqdak nak khaphung inn, etho Shkewa tho nim sha khaphung moq angna.

² Chammatakoi nim aa miq adak ma chamal eq khaphung inn, nim ma tho iri mal hun Shkewa khaphung na. Etho nim aa miq adak ma chamal eq tuk eq ko inn, nim ma tho iri mal hun Shkewa tuk eq kona.

³ Nim miik wang bangling atha ang eq, nim no ni nim pho miik wang aming miiksip shi chamlang ma siin inn?

⁴ Nim miik wang bangling tathin hunga, nim no ma chamal eq jin raaq inn, ‘Nga ba miik wang miiksip ri lat ko phang.’

⁵ Nim takhi eq somtey tang! Jakho nim miik wang bangling shi rang latchak inn, ethi jio nim no miiksip lat rangma nim aa jaqhal eq khi nin.

⁶ “Asang tangwang sha hi tang ma nak kot inn. Ning nim rel náng ka eq, nim sha kak ma kaphana. Thangchan likwang sha wak tang ma nak ko inn. Ning aa jaa eq esha nol nak chakna.”

Chu inn, bi inn, udok eq inn

⁷ “Uchuk eq inn etho nim ma ukot eq phanin; ubi eq inn etho nim aa kap eq nin; udok eq inn etho kalung ulaak eq kopha nin.

⁸ Chammatakoi utang eq chu na, ethitey thima kot na, utang eq bina, ethitey they kapna, etho utang eq udok eq na ethitey thima lak kot eq na.

⁹ Nim sa shey banlo chu ajo, nim aa long ukot eq nin i?

¹⁰ Etho nim sa shey ngaqsa chu ajo piq ma pu sha ukot eq nin i?

¹¹ Nim jashit ang inn jo tho, nim sa rangma aqhal sha kot ma usam eq inn. Irimal ang ajo mungtan na tongtey nim Wa eq uchuk tey tang ma chamtan daqhan kot na!

¹² “Miq eq nim ma chamlang somlo kot ma nim nuk inn, ethi mal hun nim aa ning rangma tho somlo ko inn. Moses thong nia rangsamal tang aa iri raaq tang raa hun bat aa.”

Aming kalung

¹³ “Aming kalung o nop inn, chammatakoi walmungtan náng nop ching kalung sha rapney ajong etho lam sha rapney achol. Miq daqhan eshi lam sho ka aa.

¹⁴ Etharin pattuk rollung náng kat ching kalung sha rapney aming hal etho lam sha rapnay ahal. Miq akum sa shey eshi lam sha kap aa.”

Ubang etho bangti

¹⁵ “Alik rangsamal tang wang rangtun eq tong inn. Ning kelwut sa tang mal takhi eq nim relnáng thupha na, etha otho ning tin mong sha jashit inkaku tang mal hun.

¹⁶ Ning jaksom wang hun ning sha ley sam eq nin. Khaambok bang o suti nia phokbang ti tingo moq.

¹⁷ Bangqhal eq jaqhal bangti kot aa etho bangshit eq jashit bangti kot aa.

¹⁸ Bangqhal sho baluk otho jashit bangti timoq angna, etho bangshit sho baluk otho jaqhal bangti timoq angna.

¹⁹ Etho bang sho aqhal bangti ang moq ang ajo, eshi bang shi duk eq wal náng takchak inn.

²⁰ Iri mal wang hun, nim aa alik akuk rangsamal tang somlot sha sing inn.”

Nga nim sha sampha mong

²¹ “Nga ma ‘Teyhungwa, Teyhungwa’ ta haltey tang thaji sha Rangmungtan náng jin nop moq, etharin mungtan na tongtey i Wa raaq tattey tang hun jin nopna.

²² Khaphung Saal tho daqhan tol miqtang eq nga ma bat phanáng, ‘Teyhungwa, Teyhungwa! Ba miing wang í aa Shkewa tung aa raaq bat ti, ba miing wang í aa thangwa tang phan ti etho daqhan tol patja ching jaksom lot somlo ti!’

²³ Etharin nga ning ma bat náng, ‘Nga nim sha sam wey phamong. Nim lajak miqtang, irel wang chuwang inn!’”

Him huntey ani

²⁴ “Ethi rangma, utang miq eq iraaq tat eq somlo aa, piq sha long kho o him huntey asam atol miq mal.

²⁵ Jujong aa ráng chey ta, jung ching ta etho rangpong eq him sha motta, etharin him sha chilwang moq angta. Chammatakoi eshi him sha long khona hunta.

²⁶ “Etharin utang miq eq iraaq tat eq somlo moq, piq sha long pháng kho o him huntey ajat miq mal.

²⁷ Jujong aa ráng chey ta, jung ching ta etho rangpong eq him sha motta, etho him sha jujong aa chilta.”

Jesu raaq tatal

²⁸ Jesu uraaq bat tang thaji tha tathun atho, thaji miqtang piq raaq tat eq rapney patja ta.

²⁹ Chammatakoi piq raaq sha ning thong tataltey tang shimal ang moq angta; piq aa rapney jaqhal wang authority jamoq raaq tatalta.