Matthew 3 - Muklom

Jung thalamtey John Phanchan

¹ Ethi rangham tho, jung thalamtey John aa Judea shushu haq náng ka eq, batta,

² “Ngarey wang wel inn, chammatakoi rangmungtan rapney arelna.”

³ Rangsamal Isaiah John tung aa raaq irimal batta, “Miq ashey shushu haqna uring ang aa, ‘Teyhungwa kat ma lam shi taqhal inn; piq qhing ma lam shi tachal inn!’”

⁴ John khat sha utt haanrun wang hunta; etho ashey ngamkhup khingkit piq khing na kitta, piq aa kokchikrik phaksat eq naqti ling ta.

⁵ Jerusalem etho thaji Judea mung etho Jordan jungku relna tongtey miqtang John jamoq tachong ma thuta.

⁶ Ning ngarey tha wungbat jio, piq aa ning ma Jordan jungku o jung thalamta.

⁷ Etho Phorisi tang etho Saddusi tang junglam rangma thuta tha khi atho, John aa batta, “Nim pu tang, Shkewa takat tharo tatsam wang jinlun angni ta nim ma utang eq bat taphin?

⁸ Nim aa ngarey jaksom sha shing chak eq takhi ma, jaqhal jaksom shi somlo inn!

⁹ Etho Abraham nim tey aa wa ta nak tathin inn, nga nim ma bat phang, Shkewa iri long tang riwang Abraham ma usatang tho jin hun eq na.

¹⁰ Minki eq bang uchíng o dukma achol sey; etho jaqhal bangti kot moq ang ajo eshi bang sha duk chak eq, wal náng bichak na.

¹¹ Nim ngarey wang weltin ta takhi rangma, nga nim ma jung wang jung thalam phanáng. Etha otho i jio ashey miq thupha na. Piq aa nim ma Asang Tsija nia wal wang jungthalam pha nin. Piq nga wang eq tho rapney ajong, etho nga sha piq jaaqhong tun rol tho ang mong.

¹² Piq jakna wanchap atha. Piq aa thaji asak cham tang sha chamtap sho thajoq na etho cham phang sha baluk otho mit moq wal o tak chakna.”

Jesu junglam

¹³ Irimal rangham tho, Jesu Galilee wang thalat eq junglam rangma Jordan jungku náng John jamnáng kata.

¹⁴ John aa Jesu tha táng ta etho batta, “Nang aa nga ma junglam ching angtu, etharin nang i jamnáng thuta phu.”

¹⁵ Jesu aa piq ma thawel batta, “Thanga irimal cham ang aa. Shkewa chamal nuk aa, eshimal hun hiqni aa thaji somlot ching.” Ethi rangma John aa piq raaq tha tatta.

¹⁶ Jesu junglam eq tunshat atho, kalo mungtan tha thalak ta etho Shkewa Asang Tsija wotopin mal kapha tha etho piq han nang kata tha piq aa khita.

¹⁷ Etho mungtan wang ashey raaq kap tatta, “Ira i tinmat i Miqwasa. Piq rangma nga rapney sungrang ang.”