Matthew 28 - Muklom

Jesu wey jey

¹ Sabbath saal jio, nángtong saal rangwung ta tho, Mary Magdalene etho adak Mary màng bungching tha siin kata.

² Kalo, jujong aa haq kung tha shinta, Teyhungwa rangkamwa ashey mungtan wang katapha, etho màng bungching relnáng ka eq arong long tha dang chak ta, etho eshi kho shina tong ta.

³ Piq tha ranglip mal takhi ta etho ukhat tha ngelti mal apung angta.

⁴ Piq ma cho thiwang ubantey wa tha umot angta etho amáng dak bi angta.

⁵ Rangkamwa aa miqnu tang thima batta, “Nak cho inn, bólq na botchak ta Jesu tha nim aa bi inn ta nga sam eq ang.

⁶ Piq irina ang moq; piq aa batta thimal wey jey angta. Ka phin, piq barina shingta thi siin inn.

⁷ Ethi jio kalo ka eq, ujiphantey tang ma bat inn, ‘Piq amáng wang wey jeyta, etho piq nim náng eq jakho Galilee náng ka aa. Eshina piq tha kap khi nin.’ Nga nim ma batta phang iri raaq ri tasik shing inn.”

⁸ Miqnu tang ucho angta, etha otho sungrang jamoq màng bungching wang wel eq Jesu jiphantey tang ma tatat ma, ujol angta.

⁹ Lamna kalo Jesu aa ning jamoq tachong eq batta, “Nim ma nungmay cham ang aa.” Ning urelnáng ka eq piq ja tha lo eq shumnuk ta.

¹⁰ Jesu aa ning ma batta, “Nak cho inn, i jiphantey tang ma Galilee náng kat ma bat ka inn, eshina ning aa nga kap khina.”

Ubantey wa raaq tatat

¹¹ Miqnu tang ka chey atho, ubantey wa thiwang chamtey tey samhaq ajong náng ka eq chamlang angta tha, ajong tingwa tang ma tatat ta.

¹² Etho ajong tingwa tang aa miqlang tang jamtho thajoq eq rum wan ta etho ralkoltey tang thima ngin daqhan ko eq batta,

¹³ “Rangpal tho nga ujib ang chey ang tho, Jesu jiphantey tang thu eq piq tha hut som chuwan ta, ta nim aa bat ching.

¹⁴ Iri raaq raa governor relnáng thu ajo, í ujamoq wan ni etho nim aa eshi tung aa raaq shima chamtho nak tathin inn.”

¹⁵ Jio, banteywa tang they ngin tha som eq chamal batta, ethimal hun batta. Iri raaq raa thaney náng thula Jehudi tang jaktung na taphan chan ro ang aa.

Jesu aa ujiphantey tang ma takhi aa

¹⁶ Jesu aa batta thimal, asi ashey ujiphantey tang eq Galilee haqkan náng kata.

¹⁷ Ning aa piq tha kap khita etho piq tha shumnuk ta, etharin araltey eq unaan eq ta.

¹⁸ Jesu ning relnáng thu eq batta, “Mungtan ni mingkang thaji authority tha ijak o kochak tapha.

¹⁹ Ethirangma nim iriwang thaji haq náng ka inn etho thaji phan ajat miqtang ni ijiphantey tang ma sol inn, etho ning ma Iwa miing o, Usa miing o, etho Asang tsija miing o jungthalam inn.

²⁰ Etho nga nim ma raaqkhat bat taphang thaji shi tat rangma ning ma tatal ko inn. Etho mingkang thun náng thula, salwet nga nim jamna atha ang náng.”