Matthew 24 - Muklom

Rangnuk him thun ma raaq bat

¹ Jesu rangnuk him wang thalat eq ka chey atho, ujiphantey tang aa piq ma batta, “Rangnuk him hunhil ri siin u.”

² Jesu aa ning thima batta, “Nim aa iri tang raa ukhi eq chey inn. Nga nim ma asing batphang, iri thaji raa uthun angna. Long kho wang, long ashey tho lun moq angna.”

Tsamnáng nia tahikham

³ Jesu Olive haqkang na tong chey atho, ujiphantey tang shu shu eq piq relnáng ka eq batta, “Í ma bat phu, iri tang ri baluk o angna? Ba kat etho mingkang thun rima chamlang wit aa.”

⁴ Jesu aa ning ma thawel batta, “Rangtun eq tong inn. Utang eq tho nim aja náng nak cham sol phin.

⁵ Chammatakoi i miing o alik tang daqhan ka phana etho ning aa batna, ‘Nga Khristo tha.’ Etho ning aa miq daqhan dipkup na.

⁶ Nim aa arelna thamol hit ring rak tat nin etho alo wang thamol hit raaq kap tat nin. Eshi rangham o nak cho inn, chammatakoi eshitang sha ang hun angna. Etharin esha uthun saal ang moq angna.

⁷ Phan ajat nia phan ajat sha takhat janna, mung ni mung sha takhat janna etho shong aa cham angna etho haqkung shin na.

⁸ Eshi raaq tang sha sey thu pha jo, tsamnang sha sey phang thu phana.”

⁹ “Ethi jio nim sha lo pha nin etho thahikham pha nin etho tikwat chak pha nin. Etho nim ijiphantey tang ang tungkang o miq thaji eq nim raa miiksuk pha nin.

¹⁰ Etho miq daqhan eq kam shing chakna, etho ashey eq ashey tha dipkup eq thalo na, etho ashey eq ashey tha miiksuk na.

¹¹ Ahut alik rangsamal tang ahan tunshat na, etho miq daqhan sha athom ma hunna.

¹² Jashit jaksom cha lo aa rangma miq daqhan tinmat sha nùng ti na.

¹³ Utang uthun nángduk thanan eq jintong aa, piq hun lunna.

¹⁴ Etho mungtan tungtang qhal sha mingkang thaji sho phanchan na, iri raaq rima miq thaji phan ajat sha miikkhi angna. Iri jio mingkang thun sha thu phana.”

Ajong Tsamnang sha phang

¹⁵ “Rangsamal Daniel batta mal ‘Chopan raaq’ sha asang haq na lang eq kap khi ujo, (iri phattey usam eq u)

¹⁶ Judea miqtang haqkan náng jolching.

¹⁷ Utang himkho na angna, piq himmong náng nak cham wang aa.

¹⁸ Etho utang pikna angna, piq ukhat som ma jináng nak cham wel aa.

¹⁹ Ethi neynap tho, utang bahanhan etho pung tachip tey nu tang, ning thima rapney tsamnang angna.

²⁰ Romtam chu ro inn, nim rangsong tok o etho Sabbath saal o, ujol náng nak cham thu aa.

²¹ Chammatakoi eshi neynap tho rapney tsamnang tha thu phana, chammal mingkang phanghun wang thanga náng thula angwey moq etho baluk otho ang moq angna.

²² Etharin Shkewa eshi saal tang sha tathol moq angta jo, utang tho lun moq angna. Etharin utal tey rangma hun ethi saal tang sha tatholna.”

²³ “Eshi neynap sho chamtey tey nim ma batna, ‘Siin inn, Khristo iri na’ tia ‘Piq eshina’. Etharin ning raaq nak han pey ka inn.

²⁴ Chammatakoi alik Khristo tang etho alik rangsamal tang tunshat na etho ahan patja jaksom takhina, jin som eq ajo utal miqtang shima tho alik tha tahan na.

²⁵ Tat inn, nga nim ma jakho ubat sey shing taphang.”

²⁶ “Irimal ang moq ang ajo, chamteytey eq nim ma bat phanin, ‘Siin inn, piq jatna.’ Etharin ran náng thalat eq nak ka inn. Etho chamteytey eq nim ma bat phanin, ‘Siin inn, piq him mongna’. Etharin nak han pey ka.

²⁷ Chammatakoi chammal ranglip saalkhong kowang thalat eq sanop ko náng thok lip aa, ethimal Miqna Sa sha ka phana.”

²⁸ “Bari táng ro miqmáng angna esho miqmáng phaktey wo rong tathung na.”

Miqna Sa wey kat

²⁹ “Ethi saal tsamnang jio, Rangsal sha nak tina, etho jappi sha lit moq angna, Etho taset tang sha rangkan wang qhat wang na etho mungtan tang tarong sha thamot na.

³⁰ “Esho sey Miqna Sa maal sha rangkang na takhina, etho mingkang haq thaji miqtang jujong aa qhapngey na. Etho Miqna Sa tha tarong ni ajong phun amun jamoq rangkang wang phun sho ta khina.

³¹ Lirong tom jam sho urangkamwa tang tha mingkang sokthabali náng takat phana, etho ning mingkang iri kang wang sha hangko kang náng thula talchol miqtang sha thajoq na.”

Phokbang raaqshiton

³² “Phokbang bang raaqshiton tat inn. Bang king anup ang eq ujak phang dim sey ang aa jo, nim aa rangcho sey thu pha ta usam sey inn.

³³ Ethimal nim aa iri raaq tang raa sey khi inn jo, eshi rangham tha thok sey angta pha etho phang sey angta ta usam eq inn.

³⁴ Nga nim ma asing batphang, iri raaq tang tahom wey moq nángduk, iri pat raa thun moq angna.

³⁵ Mungtan nia mingkang raa matwang angna, etharin iraaq tang raa baluk o tho matmoq angna.”

Thung tasik eq tong

³⁶ “Ethi saal nia ethi rangham sha utang eq tho sam moq, rangkamwa tang etho Usa atho sam moq, etharin Iwa Shkewa hun sam aa.”

³⁷ “Noah tok o chamal angta ethimal hun Miqna Sa kat rangham sho tho angna.

³⁸ Chammatakoi jungching wey moq jakho, Noah waqwan náng qhung wey moq saal náng thula miqtang aphak asat na rong tong ta, etho tharik thang eq etho tharik thang kot ma rong tong ta.

³⁹ Etho ning jungching eq lim chuwan wey moq nángduk, ning aa chamtho sammoq angta. Ethimal Miqna Sa kat rangham sho tho angna.

⁴⁰ Eshi rangham o miq ani pik na angna, ashey sha sol chuwan na, etho ashey sha shingchak eq na.

⁴¹ Miqnu ani eq raan thut chey na, ashey sha sol chuwan na ashey sha shingchak eq na.

⁴² Ethirangma ban kacha ang inn, chammatakoi ba Teyhungwa sha baluk o thu phana nim aa sam min.

⁴³ Etharin ira sam eq inn, him tangteywa shey ahut baluk o thu phana ta usam eq ajo, uban eq na etho him sha ahut tang ma baluk otho tashit chakma kot moq angna.

⁴⁴ Ethirangma nim tho salwet ban kacha ang inn, chammatakoi nim aa tathin tho tathin min rangham sho Miqna Sa sha ka phana.”

Jaqhal nia jashit sanga

⁴⁵ “Utang sha ukam tey etho thung aa tha sanga? Piq sha tangteywa eq usanga tang tha rimkum ma etho khakla taphaksat ma shing na.

⁴⁶ Utangteywa sha him náng thu ajo piq jaksom sha jaqhal ta khi ajo piq sha sunmaan.

⁴⁷ Nga nang ma asing batphang, eshi sanga thima piq aa ulik angin sha siin ma shing na.

⁴⁸ Etharin eshi sanga sha jashit ang ajo piq aa tathin na, ‘I tangteywa daklot jio hun thu eq wey welna.’

⁴⁹ Etho piq aa unokwa sanga tang tha wat na, etho piq kham ling eq tong na.

⁵⁰ Piq aa tathin tho tathin moq etho sam moq rangham o utangteywa thu na.

⁵¹ Esho piq aa ethi sanga wa tha aming mingsa pin duk na etho takhi eq somtey tang haq piq ma kona. Eshina qhap ngey eq paa tachik kakna.”