Matthew 20 - Muklom

Pik o somtey raaqshiton

¹ “Rangmungtan raa irimal: napkha o pik tangteywa thalat eq upik sho somlot ma jaksom tey tang thalang ma hal kata.

² Piq aa jaksom tey tang thima saal shey o ashey denari kot ma shing ta etho ning tha upik thináng takatta.

³ Rangham akhu tho piq thalat atho piq aa tangwang sangching katáng na miqtang somlot hung aa rong lang atha kap khita.

⁴ Piq aa batta, ‘Nim tho pik náng jaksom ma ka inn, etho bara khakla sha, nga nim ma kopha náng.’

⁵ Ethi rangma ning tha tho ukat angta. Rangney kampang etho rangham atom tho, piq aa ethimal hun wey somlo ta.

⁶ Rangpal ma rangham shey sey tong ajo, piq wey thalat atho miqtang ronglang aa tha wey khita, etho piq aa batta, ‘Nim iri na chamtho somlot hung aa salthing chamlang ma lang inn?’

⁷ Ning aa piq ma batta, ‘Miq eq jaksom ma thalang phami rangma lang i.’ Piq aa ning ma batta, ‘Nim tho i pik náng ka eq somlo inn.’”

⁸ “Rang sey ja atho, pik tangteywa they pik rimteywa thima batta, ‘Pik somtey tang ni hal eq jiwang tha jakho tang ma ning jakthang ni ko u.’

⁹ Ning thu atho bara rangpal ma rangham shey sey tong ta langtey tang thima ashey ashey denari kota.

¹⁰ Esha khi eq, jakho kattey tang they tathin ta, ‘Í aa ahan kapni.’ Etharin ning atho ashey ashey denari kapta.

¹¹ Jakthang kap atho ning pik tangteywa thima khaba tita.

¹² Ning aa batta, ‘Iri tang rey, jio ka eq chomrey sa somlo ta. Nang aa í jamoq ning shi chamal eq tatut phu? Í aa salthing lang eq rangsal nanti!’

¹³ Piq aa ning thiwang ashey thima thawel battta, ‘I nokwa, nga nang ma tashit pha mong, nang hun ashey denari jakthang o lang tu.

¹⁴ Ba ràng bara eshi tun som eq qhing chuwang u. Nga nang ma chamtan kophang, eshitan hun jiitey rima tho ukot eq ma i tinthin.

¹⁵ I lik aa ngin riwang chammal som ang tha jin som mong i? Nga qhal shi, nang chamma ngel jo phu?’”

¹⁶ Etho Jesu aa tathun eq batta, “Ethi mal jitey tang jakho na angna etho jakho tey tang jina angna.”

Jesu aa utik tung aa raaq wey batta

¹⁷ Jesu Jerusalem náng ka chey ta etho lam o, asi ani ujiphantey tang tha shu shu eq hal eq batta.

¹⁸ “Hiqtang Jerusalem náng ka chey i, eshina Miqna Sa tha ajong tingwa tang ma etho thong tataltey tang ma sangphakna, etho ning aa piq tha aja somtey ta raaq eq shing na.

¹⁹ Etho piq tha Gentile tang jak thináng kochak na etho ning aa piq tha tikngit kungna etho piq tha wat na etho bólq sho bot eq tikwat chak na; etharin piq saal tom o wey jey angna.”

Miqnu ashey raaq bat

²⁰ Eshi jio Zebedee himteynu they usa ani tha sol eq, Jesu relnáng kata etho piq jakho o bon ta etho piq rangma chamlang chuta.

²¹ Jesu aa piq ma pitta, “Nang ma chamlang raa aa?” Piq aa thawel batta, “Nang lungwang ang jio, i sa ni wang ashey ba aqhak ko na etho ashey ba aqhik ko na tatong ma nga ma rangtum kophu.”

²² Jesu aa ning ma thawel batta, “Nim aa chamlang chu inn tha nim aa sam min. Nga bari kok riwang ling ma ta ang, nim aa ethi wang jin ling eq nin i?” Ning aa batta, “Jin ling eq ni.”

²³ Jesu aa ning ma batta, “Nim aa iri kok wang uling hun eq nin, etharin i aqhik aqhak o tatong sha ijaksom ang moq. Iwa aa ira utang rangma kachat shing ta, ning aa hun ira kapna.”

²⁴ Iri raaq raa tat eq asi ujiphantey tang eq sapho ni thima khata.

²⁵ Jesu aa ning tha urel náng hal eq batta, “Nim aa usam eq inn, Gentile tang lungwang tang aa tarong jamoq som aa, etho ning solwa tang aa ning sha damnak aa.

²⁶ Etharin nim jaktung na ethimal ang moq. Nim jaktung na ajong angma tathintey sha nim sanga ma ang ching.

²⁷ Etho nim jaktung na jakho angma tathintey sha nim qha ma ang ching.

²⁸ Nim Miqna Sa mal ang ching. Piq aa adak miq wang nong kap ma kapha moq ang ta, etharin piq aa unong eq ma kata pha, etho daqhan miqtang sha thalun rangma, urollung sha kot ma katapha.”

Jesu aa miikduk wani taqhal aa

²⁹ Jesu nia ujiphantey tang Jericho wang thalat chey atho, ahan miq waan tang aa piq ji tha phan ta.

³⁰ Aduk wani lam kang na tong chey ta they, Jesu ka chey aa ta kap tat eq, ning ni jujong aa ringta, “Teyhungwa, David Miqwasa, ini ma tinshit phu.”

³¹ Miq waan tang aa ning ni ma shushu eq tong shin ta batta, etharin ning ni jujong aa they ring ring angta, “Teyhungwa, David Miqwasa, ini ma tinshit phu.”

³² Jesu tunlang eq, ning ni tha hal eq batta, “Nga nim ni ma chamlang somlo ang? Nim ni aa chamlang ta tathin shin?”

³³ Ning ni aa batta, “Teyhungwa, ini miik ri cham kal aa.”

³⁴ Jesu aa tinshit eq ning ni miik tha lota. Kalo hun ning ni aa jin khita, etho uji phanta.