Matthew 2 - Muklom

Ataal miqtang tachong ma thu aa

¹ Herod lungwang angta rangham tho, Judea mung Bethlehem samhaq na Jesu changta. Amaan sa jio, saal qhang kona tongtey ataal miqtang Jerusalem náng thu eq

² pitta, “Jehudi phan aa jat lungwang angma ta, nijangsa thi barina changta? Í aa piq tasayti tha saal qhang kowang khi eq, piq raa shumnuk rangma irináng kataphi.”

³ Ethi raaq tha tat eq, Herod lungwang nia Jerusalem miqtang ucho angta.

⁴ Herod aa ajong tingwa tang etho thong tataltey tang tha hal eq pitta, “Khristo barina chang ma ta?”

⁵ Ning aa batta, “Judea mung Bethlehem samhaq na; chammatakoi rangsamal aa irimal witta:

⁶ ‘Judah mung wang Bethlehem, Judah mung adak samhaq mong wang nang aming sa ang mu, Chammatakoi ba jaktung wang ashey walang thupha na, bara hiqtang miq Israel tang ma kelwut rimtey angna.’”

⁷ Herod lungwang aa saal qhang kowang thoktey tang tha shu shu eq halta, etho ethi tasay sha baluk o thalatta ta sam ma pitta.

⁸ Etho ning Bethlehem náng takat wey moq jakho Herod aa batta, “Nijangsa shi jaqhal eq bi ka inn, etho piq sha kap chong jio nga ma thu eq thok bat phin. Nga tho piq sha shumnuk ka náng.”

⁹ Etho ning ukat sey ang chey ta tho, saal qhang kowang takhi ta ethi tasay tha ethina tho ukhi eq ta.

¹⁰ Ethi tasay tha ning jakho kho ka eq nijangsa tong aa him katáng tho langta. Ning ethi tasay tha khi eq rapney sungrang ta.

¹¹ Ning himmong thináng nop eq unu Mary jak wang nijangsa tha khi eq piq tha shumnuk ta. Ning sungrang eq ngintit tha lak eq piq ma hun aa cha, shongnol etho atim angam tang tha kotta.

¹² Etho ning adak lam kowang ning haq náng kata, chammatakoi máng na Shkewa ning ma Herod jamoq nak tachong inn ta batta.

Egypt náng jol chuwang aa

¹³ Ethi miqtang chuwang jio Teyhungwa rangkamwa máng o thu eq Joseph ma batta, “Herod aa nijangsa tha tatik ma bita. Req tunshat eq, nijangsa etho piq nu ri sol eq Egypt náng ka u, etho nga bat wey phamong ling eshina tong shin.”

¹⁴ Joseph ethi rangpal tho hun tunshat eq nijangsa etho piq nu tha sol eq Egypt náng jol chuwang ta,

¹⁵ etho Herod lungwang ti wey moq ling eshina hun tong ta. Teyhungwa rangsamal tungkang o jakho o batta, “I Miqwasa raa nga Egypt wang hal eq solkat taphang.” Etho iri raaq raa tahom rangma irimal angta.

Nijangsa tang tha tatik chak aa

¹⁶ Herod aa saal qhang kowang thuta ataal miqtang eq piq ma hutdipta ta sam atho piq rapney khata. Etho piq aa Bethlehem etho ethi rel haq wang, pang ni etho eshiwang náng eq nijang miqwasa tang tha tatik chak ma raaqkhat kotta. Piq aa ataal miqtang eq batta rangham tha sam eq irimal somlo ta.

¹⁷ Req Teyhungwa Jeremiah rangsamal tungkang o batta, etha irimal asing angta:

¹⁸ “Ramah haq na raaq kap tatta, eshina rapney jashit qhapngey raaq kap tatta. Rachel usa tang rangma qhap aa; piq shu shu ang moqtey sey chammatakoi ning utik angta.”

Egypt wang wey wel aa

¹⁹ Herod lungwang tik jio, Teyhungwa rangkamwa Egypt na Joseph máng o thu eq batta,

²⁰ “Tunshat u, nijangsa nia unu shi sol eq, Israel haq náng ka u; chammatakoi nijangsa tatik ma tathintey tang thaji tha utik sey angta.”

²¹ Etho Joseph tunshat eq nijangsa nia unu tha sol eq Israel haq náng wey welta.

²² Etharin Herod miqwasa Archelaus tha Judea lungwang angta ta, Joseph aa tatta. Eshirangma piq eshináng kat ma ucho angta. Etho piq máng na khita thimal, Galilee mung náng kata.

²³ Etho Nazareth samhaq thina tong ta. Etho irimal wang Teyhungwa rangsamal tang tungkang o batta tha asing angta: “Piq sha Nazareth haq tey ta halna.”