Matthew 18 - Muklom

Utang thaji wang ajong aa

¹ Eshi rangham tho ujiphantey tang thu eq Jesu ma pitta, “Rangmungtan na utang thaji phey náng eq ajong?”

² Req Jesu aa ashey nijang tha ning jakho o thalang ta.

³ Etho batta, “Nga nim ma asing batphang, nim tin kaley eq nijangsa tang mal ang min ang inn jo, nim baluk otho Rangmungtan náng jin nop min ang nin.

⁴ Iri nijangsa mal nim tin thaniin tey Rangmungtan na thaji phey náng eq ajong.

⁵ Irimal barey ashey nijangsa sha i miing o wangphu ta hal aa, piq aa nga sha wangphu ta hal phang.”

Ngarey som ma tari

⁶ “Nga ma kamtey eq iri nijangsa tang wang ashey ma ngarey tasom ajo, eshimal tasom tey miq sha ubo sho thom sha khak eq jungshi náng bichak ajo aqhal.

⁷ Miqtang ma ngarey tasom tang tungkang o, iri mingkang ma rapney shi aa! Irimal hun ang chey na, etharin imal ang chey ma kottey miqtang ma rapney tsamnang.”

⁸ “Nim ashey jak tia jaa nim ma ngarey jaksom tasom phin jo, eshi duk eq alo náng bichak inn. Ani jak tia jaa ang eq, pattuk wal náng nim bichak phey náng eq, ashey jak tia jaa ahung ang eq, pattuk rollung náng nop raa nim ma aqhal.

⁹ Etho nim miik eq nim ma ngarey jaksom tasom phin jo, eshi lat eq bichak inn. Ani miik ang eq pattuk wal náng nim bichak phey náng eq, ashey miik ahung ang eq, pattuk rollung náng nop raa nim ma aqhal.”

Matwang kelwut raaqshiton

¹⁰ “Nim aa iri nijangsa tang wang ashey ma baluk otho aming ta nak tathin inn. Nga batphang, ning rangkamwa tang sha salwet mungtan na tongtey Iwa relna tong aa.

¹¹ Miqna Sa raa matwang angtey tang sha bima etho ning raa thalun ma thutapha.”

¹² “Nim aa cham ta tathin inn? Ashey miqwa ma shashey kelwut angta etho eshi wang ashey kelwut sha matwang ang ajo, piq aa chamlang somlo na? Piq aa kelwut tang sha kan na shing chak eq, ashey matwang kelwut sha bima ka na.

¹³ Etho nga nim ma asing bat phang, eshi kelwut sha bi eq kap ajo, piq aa matwang moq kelwut tang wang eshi ashey kelwut rangma rapney sungrang na.

¹⁴ Irimal hun mungtan na tongtey nim Wa sha iri nijangsa tang wang ashey matwang shima nuk moq.”

Miq eq ngarey som ajo chamlang eq ching

¹⁵ “Nim no eq ngarey jaksom som ajo, piq jamoq ka eq piq aja shi takhi inn. Etharin nim ni chen ang ching. Piq aa tat eq tin kaley ajo, nim aa piq sha thawel kap nin.

¹⁶ Etharin, piq aa nim raaq tat moq ang ajo, adak miq ashey ani jamoq nim aa piq ma bat kot inn. Eshimal ang jo, ani atom miikkhi tey ang eq nim raaq sha arong angna.

¹⁷ Piq aa ning raaq sha tat moq ang ajo, mondoli o bat inn; piq aa mondoli raaq tat moq ang ajo, piq sha thongking tey tia phunta qheytey mal tathin inn.”

¹⁸ “Nga nim ma asing batphang, nim aa mingkang na chamlang khak inn, mungtan na tho esha hun khak nin, etho nim aa mingkang na chamlang qhang inn, mungtan na tho esha hun qhang nin.”

¹⁹ “Etho nga nim ma ira tho ubat eq phang, nim wang ani miq tin ashey ang eq, mingkang roq chamli tangwang chu inn ajo, mungtan na tongtey Iwa esha somlo na.

²⁰ Chammatakoi ani atom miqtang ang eq i miing o thajoq ajo, nga ning jam na.”

Jin tolchak moq sanga raaqshiton

²¹ Etho Peter aa Jesu relnáng ka eq pitta, “Teyhungwa, i no eq nga ma ngarey jaksom somlo ajo, nga jukbathan tolchak náng? Juk sannat nángduk i?”

²² Jesu aa batta, “Juk sannat ang moq, sannat raa juk roksanat.

²³ Req Rangmungtan raa irimal. Ashey lungwang eq usanga tang jakwang wetkot chuk ma tathin ta.

²⁴ Piq aa irimal phang som atho, hayat asi talent namtey sanga tha piq relnáng solkat ta.

²⁵ Piq jakna thawel ma ngin ahung angta, ethi rangma lungwang aa raaqkhat kota, ‘Piq etho uhimteynu etho usa tang etho thaji utang wang tang sangchak inn etho eshi ngin shiwang, piq aa namta shi thawel kotchak inn.’

²⁶ Sanga aa lungwang jakho o bon eq batta, ‘Nang aa tinshit eq amaan dan wey ban u etho nga thaji thawel phanáng.’

²⁷ Lungwang tha piq ma rapney wey tinshitta, rey piq aa tolchak ta etho takatta.”

²⁸ “Etharin, eshi sanga tha thalat atho, arum aa somtey sanga jamoq tachong ta, bara piq jak wang shashey denari namta. Piq aa eshi sanga tha bot tho lo eq batta, ‘Nang aa chamtan namtu shi, thawel kochak phu!’

²⁹ Ethi sanga tha piq jakho o shong tong eq batta, ‘Nang aa tinshit eq amaan dan wey ban u etho nga thaji thawel phanang.’

³⁰ Etharin, jakho wang sanga they tat moq angta, piq aa eshi sanga tha lo eq, thawel wey moq ling chuk náng sakta.

³¹ Arum aa somtey adak sanga tang they khi atho, ning tin rapney shitta etho ning lungwang jamnáng ka eq thaji tha bat kota.

³² Ira tat eq lungwang aa jakho wang sanga tha tahal ta etho batta, ‘Jashit sanga, nang aa iching wang chuta phu thaji namtu tha tolchak taphang.

³³ Nga nang ma nungmay takhi taphang mal náng atho ba arum somtey sanga ma nungmay takhi ching angtu.’

³⁴ Etho ethi lungwang tha rapney khak eq ethi sanga aa namta tha thawel moq náng duk, chuk o tatsamnang ma takatta.”

³⁵ Etho Jesu aa raaqshiton sha tathun eq batta, “Nim aa tinmong wang nim no ma tolchak min ang inn jo, mungtan na tongtey Iwa nim jamoq irimal hun somlo na.”