Mark 8 - Muklom

Jesu aa hayat bali miqtang ma taphaksa aa

¹ Eshi neynap tho, Jesu relnáng daqhan miqtang thuta. Etho eshi miqtang jak tho chamtho phaksat adak ahung ang aa tho, Jesu aa ujiphantey tang tha hal eq batta,

² “Nga iri miqtang raa siin eq itinshit rapney khong aa, ning ijamna saal tom sey etho thanga ning jakna phaksat eq ma chamtho ahung.

³ Thanga nga ning ma chamtho taphaksat hunga takat ang jo, ning lam na kho palik eq ngak wang na chammatakoi chamtey tey rapney alo wang thuta.”

⁴ Ujiphantey tang aa piq ma pitta, “Thaji miqtang ma taphaksat rangma itan phaksat iri shushu haqna bari wang kap ni?”

⁵ Jesu aa pitta, “Nim jakna chamtan banlo aa?” Ning aa batta, “Lo sanat banlo.”

⁶ Piq aa ethina tongtey thaji miqtang thima utong angma batta. Ethi jio piq aa lo sanat banlo tha som eq Shkewa ma kechu ajong kota, etho banlo tha pin eq thaji miqtang ma phal kotma ujiphantey tang thima kota; etho ujiphantey tang aa irimal hun somlo ta.

⁷ Ning jakna aming ngaqsa amaan sa angta; Jesu aa Shkewa ma ethi rangma tho kechu ajong kota, etho ujiphantey tang thima kot eq iri tang ri tho phal kot inn ta batta.

⁸ Ning thaji wok taphutla phaksata; ethi jio ujiphantey tang aa udak angta phaksat tha sanat khong o tasheyta.

⁹ Ning akum sey kum hayat bali tan rol miqtang angta. Ethi ji tho Jesu aa ning thaji thima takat ma kota.

¹⁰ Ethi jio kalo hun Jesu nia ujiphantey tang waqwan o tun tong eq Dalmanutha ta miing aa ashey mung thináng kata.

Phorisi tang aa patja jaksom ma pit aa

¹¹ Chamtey tey Phorisi tang thu eq Jesu jamoq phang thadan ta. Piq tha lot ma ning aa mungtan wang ashey maal chuta.

¹² Jesu aa jajong hal tak hum eq batta, “Thaney nap miqtang aa chamma patja jaksom lot somlo eq takhi rangma chu aa? Nga asing batphang! Ning aa chamtho maal kap moq angna!”

¹³ Etho kalo hun piq aa ethi miqtang tha shingchak eq waqwan náng tun qhung eq shitim adak kang konáng kata.

Phorisi tang nia Herod thawung phan

¹⁴ Jesu jiphantey tang aa phaksat som ma lakchak ta, etho waqwan na ning jakna ashey dang hun banlo angta.

¹⁵ Jesu aa ning thima batta, “Phorisi tang etho Herod thawun phan wang rangtun eq tong inn.”

¹⁶ Ujiphantey tang ning ni ning jaktung o rong wanta, “Piq aa irimal batta chammatakoi hiqtang jakna banlo ahung.”

¹⁷ Ning chamta wanta tha Jesu aa usam eq ta, ethirangma Jesu aa ning thima pitta, “Nim aa banlo holmi angti ta chamma itan wan inn? Nim aa thanga tho chamtho khi min etho sam min? Nim tin chamma itan tset aa?

¹⁸ Nim miik atha ang eq tho nim aa chamtho khimin i? Nim naq atha ang eq tho nim aa chamtho tat min i? Nim aa tasik min i?

¹⁹ Nga banga banlo wang hayat banga miqtang ma taphaksat tang tho udak thi nim aa chamtan qhong o tashey tin?” Ning aa thawel batta, “Asi ani.”

²⁰ Etho Jesu aa pitta, “Nga sanat banlo wang hayat bali miqtang ma taphaksa tang tho udak thi nim aa chamtan khong o tashey tin?” Ning aa thawel batta, “Sanat.”

²¹ Piq aa ning thima pitta, “Nim aa thanga tho jin sam min i?”

Jesu aa Bethsaida wang miikduk miqwa taqhal aa

²² Etho ning Bethsaida náng thuta, etho chamtey tey miqtang aa ashey miikduk tha urelnáng thoksol eq piq ma batta, “Tinshit wang iri miq ro tatit u.”

²³ Jesu aa ethi miikduk jaktho lo eq piq tha qhim phey thináng solkat ta. Jesu aa piq miik o thuk eq, ujak tha piq o tatit jio piq ma pitta, “Nang aa chamlilang ukhi sey eq u i?”

²⁴ Ethi miq they khi eq batta, “Inn, nga miqtang raa ukhi eq ang, etharin pol aa bang qhing aa thimal khi ang.”

²⁵ Jesu aa ujak thani tha ethi miq miik tho wey shingta. Etho ethi miq they miik thalit eq siinta, etho piq miik uqhal angta etho piq aa thaji tha alang eq sey khita.

²⁶ Jesu aa piq ma irimal bat eq takatta, “Ba qhim náng nak ka u!”

Peter aa Jesu raa Khristo ta takhi bat aa

²⁷ Etho Jesu nia ujiphantey tang Caesarea Philippi rel qhim tang náng kata. Lam na piq aa ning thima pitta, “Miqtang eq nga utang aa ta bat aa?”

²⁸ Ning aa batta, “Chamtey tey eq nang John jung thalamteywa ta bat aa, etho chamtey tey eq nang Elijah ta bat aa, etho chamtey tey eq nang rangsamal tang wang ashey ta bat aa.”

²⁹ Etho piq aa ning thima pitta, “Nim aa chamlang ta tathin inn? Nga utang aa ta nim aa tathin inn?” Peter aa batta, “Nang raa Khristo.”

³⁰ Etho Jesu aa ning thima batta, “I tung aa raaq utang ma tho nak bat inn.”

Jesu aa utsamnang nia utik tung aa raaq bat aa

³¹ Etho Jesu aa ujiphantey tang ma phang tatal ta, “Miqna Sa rapney tsamnang ching, miqlang tang etho ajong tingwa tang etho thong tataltey tang piq tha shingchak eq na. Piq sha tatik eq ching, etharin saltom jio piq wey jey angna.”

³² Piq aa ethi raaq tang tha lak eq batta. Etharin Peter aa Jesu tha amaan alo náng solkat eq molta.

³³ Jesu ngik lang eq ujiphantey tang ching ko thináng siin eq Peter ma molta. Piq aa batta, “Thangwa, irel wang chuwang u. Nang aa chamta tathin u ira Shkewa wang ang moq, ira miq wang thutapha.”

³⁴ Etho Jesu aa ethina tongtey miqtang etho ujiphantey tang urelnáng halta etho piq aa ning thima batta, “Nim jaktung wang ashey iji o katma unuk ang ajo, piq ni piq sha lakchak eq ching, etho piq ni piq bólq sha som eq iji o kat ching.

³⁵ Chammatakoi utang eq piq ni piq rollung sha thalun ma tathin ajo, piq sha uthin angna; etharin i rangma etho i tungtang qhal rangma utang eq piq ni piq rollung sha tathom ajo, piq sha uhom eq na.

³⁶ Ashey miq eq iri mingkang thaji kap eq tho piq ni piq rollung tathom ajo piq aa chamlang kapna? Chamtho kap moq!

³⁷ Ashey miq rollung kaley chamlang jin kot aa?

³⁸ Iri jashit nia ngarey miqtang jaktungna utang miq eq ngama etho iraaq ma rakri ajo, Miqna Sa baluk o Uwa nia asang rangkamwa tang phun amun o thupha jo piq tho eshi miq shima rakri angna.”