Mark 6 - Muklom

Nazareth miqtang aa Jesu tha shingchak aa

¹ Jesu ethiwang thalat eq ujiphantey tang tha sol eq usamhaq thináng wey wel ta.

² Sabbath saal tho, piq aa Synagogue náng ka eq tatal kota. Daqhan miqtang ethina angta etho ning atho piq raaq tha tat eq rapney rong patja ta. Ning aa pitta, “Piq aa iri tang tatal ri bari wang kap aa? Piq ma chamlang thunglam kot aa? Piq aa patja jaksom chamal eq som aa?

³ Piq sha bang huntey ang moq i? Piq Mary sa miqwasa ang moq i? James, Joseph, Judas etho Simon ning shi piq pho ang moq i? Piq no miqnu tang tho irina hiqtang jamna tong moq i?” Etho ning aa piq tha shingchak ta.

⁴ Jesu aa ning thima batta, “Ashey rangsamal shey uhim, uphan ajat tang etho usamhaq sha dak chak eq adak thaji haqna rangka kap aa.”

⁵ Ning aa kam moq tungkang o piq aa ethina ahan patja jaksomlot jinsom lot moq angta, etharin piq aa chamtey tey miqtang atakasa tang tho jak shing eq piq aa jin taqhal eq ta.

⁶ Ning aa kam moq tungkang o piq sha patja angta. Ethi jio Jesu aa tatal eq arel qhim tang náng lingqhing ta.

Jesu aa ujiphantey wasi wani takat aa

⁷ Etho ujiphantey wa asi wani tha hal eq, ani ani tal eq adak adak haq náng takat ta. Ning thima piq aa anaan tsija tang phan ma tarong kota.

⁸ Etho ning thima batta, “Ukat tok o ashey uthin eq ching kantha shing eq adak chamtho nak som inn; phaksat eq ma nak som inn, thongkhak nak hol inn, ngin tho nak som inn.

⁹ Jaakhong nak inn etho adak samqhong nak rap som inn.”

¹⁰ Etho piq aa ethináng eq tho wey bat eq ta, “Bari himtey eq nim sha thawan phin jo, eshi haq sha shingchak wey min ling, nim eshi him sho hun tong inn.

¹¹ Etho chamtey tey haq wang miqtang shey nim sha thawan moq ang ajo etho nim tung aa raaq sha tat moq ang ajo, nim jaa wang buk shi thal nak shing eq ethiwang thalat chuwang inn. Esha ning ma uthun raaq angna!”

¹² Eshirangma ning tha ka eq miqtang thima tin kaley inn ta phanchan ta.

¹³ Ning they daqhan thangwa tang tha phanta, etho ahan atakasa miqtang thima naman jik ko eq taqhal ta.

John jungthalamtey wa tik

¹⁴ Etho lungwang Herod aa Jesu tung aa raaq tat ta chammatakoi thaji miqtang aa Jesu miing tha usam eq ta. Chamtey miqtang eq batta, “Jung thalamtey wa John weyjey angta! Ethi rangma piq aa daqhan patja jaksom kap somlo aa.”

¹⁵ Chamtey eq batta, “Piq raa Elijah.” Chamtey eq batta, “Piq aking rangsamal tang mal ashey rangsamal.”

¹⁶ Etho Herod aa ethitang tha tat atho, piq aa batta, “Nga John kho tha tathaduk eq tatik chak táng, piq tha weyjey ta!”

¹⁷ Herod aa jakho tok o John tha thalo ta, etho qhak eq chuk náng sakma raaqkhat kota. Herod aa iritang raa upho Philip himteynu Herodias rangma somta; Herodias tha Herod aa kapta.

¹⁸ Etho John jung thalamtey wa they Herod ma bat chey roq eq ta, “Ba pho himteynu sha nang aa kap ma hiqtang thong na khakla ang moq!”

¹⁹ Ethirangma Herodias aa John jung thalamtey wa thima jashit kapta etho piq aa tatik eq chakma tathin ta, etharin Herod rangma jin som moq angta.

²⁰ Herod tha John jung thalamtey wa thima ucho angta chammatakoi piq raa miq qhal nia asang miq ta Herod aa usam eq ta; ethirangma piq aa John sha homta. Piq aa John jung thalamtey wa raaq tha utat eq ma unuk angta etharin baluk o tho uraaq tat jio Herod tin na daqhan tinthin qhongta.

²¹ Etharin tak daqhan sey ban jio, takshey Herodias ashey lam kapta. Baluk o Herod chang saal angta, piq aa ajong miqtang etho ralkoltey tang solwa tang etho Galilee mung wang solwa tang thima taphaksa ta.

²² Ethi kut aa kan tho, Herodias sa miqnu rapney jaqhal eq thaji miqtang jakho o ninta, esha siin eq lungwang Herod etho kut aa kan na tongtey thaji miqtang rapney sungrang ta. Ethirangma Herod aa miqnu sa thima batta, “Nang chamlang ma nuk u? Nang aa chamlang chu phu jo tho, nga nang ma ukot eq phanáng!”

²³ Herod aa rangtum eq piq thima batta, “Nga asing wang hun batphang; nang aa chamlang chu phu tha nga nang ma ukot eq phang, imung tángko sha chu phu jo tho nga ukot eq phanáng!”

²⁴ Ethi miqnu sa tha ka eq unu thima pitta, “Nga chamlang chu ang?” Unu aa batta, “John jung thalamtey wa kho shi chu u.”

²⁵ Etho kalo hun miqnu sa tha lungwang relnáng ka eq batta, “Nang aa nga ma thanga etho irina John jung thalamtey wa kho shi ashey khung o shing eq som kat phu!”

²⁶ Esha tat eq lungwang tin rapney shita, etharin piq aa thaji miqtang jakho o rangtum tungkang o piq aa jin táng moq sey angta.

²⁷ Kalo hun piq aa ashey ralkolteywa thima John jung thalamtey wa kho tha som kat ma batta. Ethi ralkoltey wa tha chuk mong náng ka eq John kho tha thaduk chakta;

²⁸ Etho ashey khung o kho tha shing eq ethi miqnu sa thima kota etho piq ka eq unu thima kota.

²⁹ Etho John jiphantey tang aa raaq kap tat ta tho, ning thu eq umàng tha som eq màng bungching o bungta.

Jesu aa hayat banga miqtang ma taphaksa aa

³⁰ Etho apostle tang wel eq Jesu jamnáng thu eq ning aa chamlang somta tha etho chamta tat ta tha thaji bat kota.

³¹ Jesu jamna daqhan miqtang awang aka angta, esha ang atho Jesu nia ujiphantey tang ma phaksat phaksa ma rangham kap moq angta. Ethi rangma piq aa ning thima batta, “Kaa phin, hiqtang ka eq shushu haq o nángtong ang ka i.”

³² Etho piq nia ujiphantey tang ashey waqwan o tun tong eq miq tong moq ashey haq thináng kata.

³³ Etharin daqhan miqtang aa ning ka atha khi eq ning banáng ka aa tha samta; Jesu nia ujiphantey tang ethi haq thináng thuwey moq jakho thaji samhaq tang wang miqtang ethi haq thináng jaa o qhing eq thuta etho Jesu rangma banta.

³⁴ Etho Jesu waqwan wang thalat atho ethina ban aa miqtang tha khita etho piq rapney tinshitta chammatakoi ning kelwut rimtey ahung kelwut tang mal angta. Etho piq aa ahan raaq phang tatalta.

³⁵ Batchey eq ethina rapney karelta, etho ujiphantey tang thu eq piq thima batta, “Ira shu shu haq etho thanga rapney sey karel i.

³⁶ Thaji miqtang ma takat ma kot inn, etho ning arel qhim nia samhaq tang konáng ka eq phaksat cham ri aa.”

³⁷ Jesu aa batta, “Nim aa hun ning ma chamli phaksat ma kot inn.” Ning aa pitta, “Ning ma taphasat rangma hiqtang aa shani hun aa cha ngin sa thawan eq ma nang aa tathin u i?”

³⁸ Etho Jesu aa ning thima pitta, “Nim jakna chamtan banlo aa? Ka eq siin inn.” Ning ka eq siin eq piq thima batta, “Banga banlo etho ngaqsa ani.”

³⁹ Etho Jesu aa ujiphantey tang thima raaqkhat kota, “Miqtang ri phal eq uwaan eq naamthing kho o tatong inn.”

⁴⁰ Thaji miqtang tha rokbanga rokbanga ang eq etho sharo ang eq taphal eq tong ta.

⁴¹ Etho Jesu aa lo banga banlo etho ngaqsa ani som eq rangko náng siin eq Shkewa ma kechu ajong kota. Piq aa ethi banlo tha pin eq miqtang ma phal kot rangma ujiphantey tang thima kota. Piq aa ethi ngaqsa tha tho pin eq thaji miqtang ma phal kotma kota.

⁴² Thaji miqtang aa wok taphutla phaksat ta.

⁴³ Ethi jio ujiphantey tang aa udak sey ang aa banlo etho ngaqsa tang tha thajoq eq asi ani qhong o tashey shingta.

⁴⁴ Ethi tang tha hayat banga miqwa phaksat tey angta.

Jesu jungkho o qhing aa

⁴⁵ Kalo hun Jesu ujiphantey tang tha waqwan o tatong eq shitim adak kang kona Bethsaida ta miing aa ashey haq thináng piq náng eq jakho takatta, etho piq ethina tongtey miqtang tha ning himnáng takat eq banta.

⁴⁶ Miqtang takat jio piq haqkan ashey kho thináng romtam chuk ma kata.

⁴⁷ Etho rangnak ta, ethi waqwan tha shitim jaktungna angta, etho Jesu chen chen shitim kang na angta.

⁴⁸ Ujiphantey tang rapney tsamnang wang waqwan tha wey chey atha piq aa khita chammatakoi rangpong they tongnil konáng motta. Rangpal thun ma sey angta etho Jesu jungkho o qhing eq ning relnáng kata. Piq aa ning tha lit eq ka chey atho,

⁴⁹ ning aa piq tha jungkho o qhing aa tha khita! Ning cho eq rapney juchan aa ringta, “Ira jungban!”

⁵⁰ Ning aa piq tha khi eq rapney chota. Jesu aa kalo hun ning thima batta, “Tin thajong inn! Ira nga! Nak cho inn!”

⁵¹ Etho Jesu waqwan náng ning jamoq tun qhungta etho rangpong tho uthun sey angta. Ujiphantey tang rapney patja ta.

⁵² Chammatakoi Jesu aa hayat banga miqtang thima taphaksat ta asing raaq tha ning aa jin sam moq angta; ning tin tset angta.

Jesu aa Gennesaret na atakasa taqhal aa

⁵³ Ning aa shitim tha jan eq Gennesaret ta miing aa ashey haq thináng kata, etho ning aa ethina waqwan tha bon shingta.

⁵⁴ Ning waqwan wang thalat atho, ethiwang miqtang aa Jesu tha takshey lam o samta.

⁵⁵ Ning thaji mung náng jol eq kata etho Jesu ethináng thuta ta samtey tang they thaji atakasa miqtang tha ràng o piq relnáng thok som ta.

⁵⁶ Etho Jesu qhim o tho, samhaq o tho ka ajo atakasa miqtang sha tangwang sangching katang na, urelnáng thoksolta etho ukhat bal o tatit ma kota; etho utang eq tatit ajo, ning thaji uqhal angta.