Mark 15 - Muklom

Jesu Pilate jakhona

¹ Rangnap kha o ajong tingwa tang, miqlang tang, thong tataltey tang etho thaji rong miqtang kashey lam o raaq kara eq, Jesu tha janru eq qhak eq Pilate relnáng solkat ta.

² Pilate aa piq ma pitta, “Nang Jehudi tang lungwang i?” Jesu aa raaq thawel batta, “Nang aa hun bat u.”

³ Ajong tingwa tang aa Jesu raaq daqhan aja raaq batta.

⁴ Ethi rangma Pilate aa piq ma wey batta, “Nang aa raaq thawel bat mu i? Tat u, ning aa nangma chamlang ta bat aa!”

⁵ Etharin Jesu shushu tong ta, esha siin eq Pilate rapney patja ta.

Jesu tha utik ma shing aa

⁶ Pangwet Ulit kut aa kan o miqtang ma pit eq Pilate aa ashey miq tha tolchak eq chuk wang qhap chey roq eq ta.

⁷ Ethi pang tho, chukna Barabbas ta miing aa ashey miq angta, bara thamol eq miq tatik chakta.

⁸ Etho miq waan thajoq atho, Pilate aa qhap chak aa thimal miq ashey qhap chak ma chuta.

⁹ Pilate aa ning ma pitta, “Nim aa Jehudi lungwang qhap ma tathin inn i”

¹⁰ Piq aa usam eq ta, ajong tingwa tang aa Jesu ma ngel eq piq jaknáng kochak ta.

¹¹ Etharin, ajong tingwa tang aa miqtang thima Barabbas tha qhap rangma chu ma batta.

¹² Pilate miqtang ma wey pitta, “Etha ang ajo, nim aa Jehudi lungwang ta hal inn iri miq ri nga chamal eq ching ta bat phin?”

¹³ Ning thaji rapney jajong wang ring eq batta, “Bólq na botchak u!”

¹⁴ Pilate aa pitta, “Etharin piq aa chamlang thaja ta?” Ning ethiwang eq tho jajong wang ring eq batta, “Bólq o botchak u!”

¹⁵ Pilate aa miqtang tha tasungrang rangma tathinta, ethi rangma Barabbas tha qhap chakta. Piq aa Jesu tha rikang wang thawat jio bólq o bot chakma kochak ta.

Ralkoltey tang aa Jesu junnam aa

¹⁶ Chamteytey ralkoltey tang aa Jesu tha Governor himthal náng solkat eq adak ralkoltey tang tha tho halta.

¹⁷ Ning aa Jesu ma ashey asim khat tasam ta, etho piq kho o sut khopok tapok ta.

¹⁸ Etho piq jakho náng ka eq junnam eq batta, “Jehudi lungwang, alo tong u!”

¹⁹ Etho iri jio, ashey ajan langphung kantha som eq ukho o wat ta, piq tha thukta, etho ning ni ning langku o tong eq piq jakho o haq náng bonta.

²⁰ Ning thana eq ujung sey ang atho, ning aa Jesu hanphung wang asim samkhong tha chokchak ta etho piq samkhong tha hun piq ma tasam kota. Ethi jio ning aa piq tha bólq náng bot chakma solkat ta.

Jesu tha botchak aa

²¹ Lam na, ning aa Simon ta miing aa ashey miq tha chongta, bara qhimwang kachey tapha, etho ralkoltey tang aa lo eq piq ma Jesu bólq tha ta som ta. Simon tha Cyrene miq angta, etho Alexander etho Rufus wa angta.

²² Ning aa Jesu tha Golgotha ta miing aa ashey haq náng solkat ta, Golgotha ta “Miq kho ràng haq.”

²³ Ning aa ethina Jesu ma sutichi jamoq myrrh ta miing aa ashey shom thaling ma tathin ta, etharin Jesu aa ling moq angta.

²⁴ Ethi jio ning aa Jesu tha bólq na botchak ta, etho piq samkhong tha ning jaktung o phal ma ton ta.

²⁵ Etho ning aa Jesu tha bot chakma tun atho ethi rangham tho rangnap nari akhu rangham angta.

²⁶ Piq bólq rangkho tho piq jashit jaksom lot tang batta tha taka angta, “Jehudi Lungwang”

²⁷ Jesu jamoq jashit somtey wa ni bólq o botchak eq tun ta, ashey tha piq jakqha kona etho ashey tha piq jakqhit kona.

²⁸ Asang likwit na bat aa, “Piq sha tho miq duktey jamna wet ta” etho iri tung araaq raa asing ang ching, chammatakoi itung araaq taka aa sha asing thu phana.

²⁹ Ethiwang lingqhing tey miqtang aa Jesu tha siin eq kho tha thamot eq junnam eq batta: “Nang aa rangnuk him raa thakchak eq saltom mong o wey hun ko phanáng ta battu!

³⁰ Thanga bólq wang thalat eq ka eq náng ni náng lun u!”

³¹ Ethimal hun, ajong tingwa tang etho thong tataltey tang aa tho piq tha ngit eq ashey eq ashey ma batta, “Piq aa adak miqtang thalun ta, etharin nang ni nang rangma jin thalun mu!

³² Usiin eq ni, Israel lungwang Messiah thanga bólq wang haq náng jinkat ang phana tia jin ka phamoq angna; jinkat angta pha ta ang ajo hiqtang aa piq raa uhan eq ni!” Irimal wang hun ethi ani miq tha tho, bara Jesu jamna bólq na angta, ning ni atho piq ma tikngit eq ta.

Jesu ti aa

³³ Rangney wang tha rangja tángko náng thula eshi mung shina ráng tha nakta.

³⁴ Rangja rangham atom angta tho, Jesu jajong aa ring eq batta, “Eloi, Eloi, lema sabachthani?” Ta, “I Shkewa, I Shkewa, nang aa chamma nga ri shingchak phu?”

³⁵ Ethina tongtey miqtang wang chamteytey miqtang eq esha tat eq batta, “Tat inn, piq aa Elijah tha hal aa!”

³⁶ Ashey miq jol eq khat tom tha thangkum sutichi o tacham eq kantha tho qhak ta etho Jesu nungrel thináng tatko eq etho batta, “Lang u! Tatsiin i, Elijah thu eq piq ri bólq wang takat eq na tia takat moq angna!”

³⁷ Jesu rapney jajong wang ring eq tita.

³⁸ Etho, rangnuk him mong wang khatlo tapak chey aa tha aluk wang anim náng taching eq ani ma angta.

³⁹ Bólq relna bangchey tey ralkoltey tang solwa eq Jesu chamal eq ring eq tita tha khita. Piq aa batta, “Asing wang hun iri miq raa Shkewa Miqwasa angta!”

⁴⁰ Chamteytey miqnu tang atho alo wang lang eq siinta. Ning jaktung na Mary Magdalene, James nia Joseph nu Mary etho Salome angta.

⁴¹ Jesu Galilee na ang tok wang hun ning piq jiji na angta etho piq tha nong ta. Piq jamoq Jerusalem náng thuta adak daqhan miqnu tang tho ethina angta.

Jesu tha bung aa

⁴² Etho ethi saal tha nángtong saal rangma taqhal may shing ching saal angta. Rangja sey ang atho,

⁴³ Arimathea wang Joseph eshináng thuta. Piq rong ajong tang wang ashey miq angta etho piq aa Shkewa mungtan rangma banta. Piq cho hunga Pilate relnáng thuta etho Jesu màng tha chuta.

⁴⁴ Jesu tita ta tat eq Pilate patja angta etho ralkoltey tang solwa tha hal eq Jesu tita thi alo ti arel sey ta pitta.

⁴⁵ Ralkoltey tang solwa raaq tat jio, Pilate aa Joseph ma Jesu màng tha kochak ta.

⁴⁶ Etho Joseph anal khat ri eq thok somta etho Jesu màng tha bólq wang anim náng somta etho anal khat wang thup eq, long tha tapo eq umàng tha ubungmong na shingta. Etho longbing kalung tho ajong ashey long tachik shingta.

⁴⁷ Alo wang Mary Magdalene etho Joseph nu Mary, Jesu màng thi bari na shingta ta siinta.