Mark 13 - Muklom

Jesu aa rangnuk him thakchak raaq bat aa

¹ Jesu rangnuk him wang thalat aa rangham tho ujiphantey tang wang ashey eq piq ma batta, “Tataltey wa, siin u, iri him tang etho long tang ri chamtan ma qhal aa!”

² Jesu aa batta, “Nang aa iri ajong him tang raa siin u i? Iro long ashey tho katang o dak moq angna; thaji tathak angna.”

Tsamnáng nia tahikham

³ Rangnuk him adak kona, Olive haqkang na Jesu tong ta etho Peter, James, John etho Andrew piq jamoq ning chen chen tachong ma thuta. Ning aa pitta,

⁴ “Baluk o irimal angma ta, í ma bat kotphu etho iritang raa tahom sey angta rangham sey thupha jo, í aa chamal eq jin sam ni?”

⁵ Jesu aa ning thima batta, “Rangtun eq tong inn, etho utang eq tho nim sha dipkup ma nak kot inn.

⁶ Daqhan miqtang aa imiing o thu eq batna, ‘Nga raa piq!’ Etho daqhan miqtang ma dipkup na.

⁷ Nim aa arelna thamol hit ring rak tat nin etho alo wang thamol hit raaq kap tat nin. Eshi rangham o nak cho inn, chammatakoi eshitang sha ang hun angna. Etharin esha uthun saal ang moq angna.

⁸ Phan ajat ni phan ajat sha takhat jan na. Mung ni mung sha takhat jan na. Adak adak haq sho haqkung shin na shong aa cham angna. Iritang raa rapney phang tsamnang angna.

⁹ “Nim ni nim rangtun eq tong inn. Nim sha lo eq khaphung náng solkat phanin, etho nim sha synagogue tang na wat pha nin; i tungtang aqhal sungrang raaq tatat rangma ajong miqtang nia lungwang jakho o thalang phanin.

¹⁰ Etharin thaji thun jakho, tungtang qhal raaq thaji mingkang miq ma phanchan kot na.

¹¹ Etho nim sha lo eq khaphung náng solkat phin jo, nim aa chamlang ta batni ta jakho nak tathin inn; rangham thu pha jo, nim aa cham ta bat ching sha nim tin o bat na. Chammatakoi nim aa chamlang ta batma ta inn, ira nim raaq ang moq Asang Tsija wang hun bat na.

¹² Miqtang aa ning no nia ning pho sha tatik eq ma kotchak na; etho uwa usa tang sha hun irimal eq na. Satang sha tho layak ang eq unu ni wa sha tatik ma kot na.

¹³ I rangma nim thaji miqtang eq miiksuk na. Etharin utang uthun nángduk thanan eq jintong aa, piq hun lunna.

Rapney chopan

¹⁴ “Rangsamal Daniel aa batta thimal ‘Chopan raaq’ sha asang haq na lang eq kap khi nin. (Iri phattey usam eq u) Ethi kam tho, bari miqtang Judea na angna ning haqkan ko náng jol ching.

¹⁵ Bari miqtang raa himkho na ang aa, ning him mong náng nop eq chamlang som i ta nak tathin inn.

¹⁶ Bari miqtang pikna ning khat khong somwang ti ta him ko náng wang ching ang moq.

¹⁷ Ethi neynap tho, utang bahanhan etho pung tachip tey nu tang, ning thima rapney tsamnang angna.

¹⁸ Rangsong tok o irimal ang moq rangma Shkewa jamoq romtam chu inn.

¹⁹ Chammatakoi irimal tsamnang saal sha Shkewa mingkang hunta saal tok wang thang nángduk ang moq angta. Etho irimal wey ang moq hun angna.

²⁰ Etharin Teyhungwa tsamnang saal tha takum kot na; ira takum kot moq ta ang ajo, utang tho jin lun moq angna. Etharin, utal chol miqtang rangma, piq aa iri saal raa takum kot na.

²¹ “Ethi thok tho, chamtey tey nangma batna, ‘Siin u, Khristo iri na’ tia ‘Piq eshina’. Etharin ning raaq nak han pey ka inn.

²² Chammatakoi, alik Khristo etho alik rangsamal tang thu eq patja jaksom lot somlo eq takhi na etho jin som eq ajo, Shkewa utal chol miqtang sha tho dipkup eq na!

²³ Rangtun eq tong inn! Iritang thaji ang jakho hun nga nim ma thaji batko taphang.”

Miqwasa wey kat

²⁴ “Iri tsamnang tang thun ang jio, Rangsal sha makti na, etho jappi sha lit moq angna,

²⁵ Rangwang taset tang qhat wang na, etho rangkang tarong sha bil na.

²⁶ “Eshi tok tho, phun tang jamoq Miqna Sa thaji tarong etho phun amun jamoq thupha na.

²⁷ Etho piq rangkamwa tang mingkang sokthabali konáng takat eq Shkewa utal chol miqtang sha mingkang thun wang rangkang thun nángduk thajoq na.”

Phokbang bang aa raaqshiton

²⁸ “Phokbang bang wang tatal inn. Bang king anup ang eq ujak phang dim sey ang aa jo, nim aa rangcho sey thu pha ta usam sey inn.

²⁹ Irimal hun, iritang ang raa kap khi inn jo, eshi rangham tha thok sey angta pha etho phang sey angta ta usam eq inn.

³⁰ Nga nim ma asing batphang, iri raaq tang tahom wey moq nángduk, iri pat raa thun moq angna.

³¹ Mungtan nia mingkang raa matwang angna, etharin iraaq tang raa baluk o tho matmoq angna.”

Utang eq tho usaal nia rangham sha sam moq

³² “Baluk o ethi saal etho rangham sha thupha na ta utang eq tho sam moq; rangwang rangkamwa tang aa tho sam moq; Miqwasa tho sam moq; Iwa hun sam aa.

³³ Rangtun eq tong inn, sam eq tong inn, chammatakoi baluk o ethi ramgham sha thupha na, nim aa sam min.

³⁴ Iri raaq raa irimal ashey miq mal hun, bara uhim nia uhimtey tang sha shingchak eq ling qhing aa; piq kawey moq jakho, qhawa tang ma adak adak jaksom ko aa etho kalung bantey miq shing aa.

³⁵ Iri rangma jaqhal eq tong inn, chammatakoi him tangteywa baluk o thupha na ta nim aa sam min; rangja ang moq o palthung kam ang moq o rangnap kha jakho ang moq o rangsal qhit o piq mok thu phana.

³⁶ Piq sammi pol thu pha jo, nim ujib ang inn tha khi ma nak ko inn.

³⁷ Etho bara nga nim ma batko phang, iriwang hun thaji miqtang ma bat ko ang ‘Ban eq tong inn.’”