Mark 11 - Muklom

Jesu Jerusalem náng wang aa

¹ Ning Jerusalem náng thokma amaan sa jio, Olive ta miing aa ashey haqkang na Bethphage ni Bethany samhaq relnáng thuta. Ethina Jesu aa ani ujiphantey jakho takatta.

² Etho ning ma batta, “Nim jakho qhim náng ka inn. Ethináng thu inn jo nim aa ashey upong mok tongchu sa tatuk ang atha khi nin, ethi haankho o thang nángduk ashey miq tho tong wey moq. Ethi qhang eq ináng thok hum phin.

³ Etho chamtey tey irimal chamma qhang inn ta pit ajo, bat inn, ‘Teyhungwa ma ira ràa aa etho chomwey jio wey thawel eq ni.’”

⁴ Ning ka eq ethi upong moktongchu sa tha lamkang kalung relna tatuk atha khita. Ning aa esha qhang chey atho,

⁵ ethina lang aa chamtey tey miqtang aa pitta, “Chamlang eq inn? Upong moktongchu sa ri cham ma qhang inn?”

⁶ Jesu aa bat kota thimal hun ning aa batta, etho ethi miqtang they tahum eq ma kota.

⁷ Upong moktongchusa tha ning aa Jesu relnáng thok humta, etho ethi haankho tho ning aa usam eq ching khatnup tha tasam kota etho Jesu ethi haankho tho tong ta.

⁸ Daqhan miqtang eq ning khatnup tha lam na damta etho chamtey tey pik wang duk eq sijak tha lam o damta.

⁹ Jakho na qhingtey etho ji na qhingtey thaji miqtang rapney jujong jong wang ring eq batta, “Hosanna!” “Teyhungwa miing o thoktey ma sunmaan!”

¹⁰ “Hiqtang tey aa wa lungwang David mung wang kapha, eshey tho sunmaan aa!” “Mungtan na Hosanna!”

¹¹ Jerusalem náng thu eq Jesu rangnuk himmong náng nop ta etho thaji tha siin ta. Rangpal tungkang o piq aa asi ani ujiphantey tang tha sol eq Bethany náng kata.

Jesu aa phokbang bang ma manthun ko

¹² Inap rangnap qhat o, Bethany wang wey welta rangham tho Jesu rapney chamlal tita.

¹³ Chomwey alo na piq aa phokbang bang tha khita ethi bang tho daqhan bangjak angta, etharin piq arel náng ka eq siinta tho eshina ashey tho phokbangti ahung angta, chammatakoi ethina phokbang ti tok ang wey moq angta.

¹⁴ Jesu ethi phokbang bang thima batta, “Utang eq tho ba phokbangti wang nak chamwey phak aa!” Ethi raaq tha ujiphantey tang aa tatta.

Jesu rangnuk him náng thuta

¹⁵ Jesu Jerusalem náng thu eq, rangnuk him náng nop eq ethina tangwang sangtey miqtang tha phanchakta. Ngin kalong laytey tang aa karathen tang etho wotopin sangtey tang aa tong ching tha tongnil konáng shingchak ta.

¹⁶ Etho rangnuk him himthal náng utang ma tho tangwang tasom wan ma komoq angta.

¹⁷ Etho piq aa miqtang ma batta, “Asang likwit na Shkewa batta, ‘I rangnuk him sha thaji phan ajat miqtang ma romtam chuk him angna.’ Etharin nim aa ira ahut apang tang tapu ma kaley tin.”

¹⁸ Ajong tingwa tang etho thong tataltey wa tang ira tat eq Jesu sha tatik eq chakma nukta. Etharin ning piq ma ucho angta chammatakoi daqhan miqtang piq raaq tha tat eq patja angta.

¹⁹ Etho rangja sey angta tho Jesu nia ujiphantey tang samhaq ajong wang qhing chuwangta.

Phokbang bang wang chamlang tal kap aa

²⁰ Saal dak rangnap qhat o, ning lam na kata tho ethi phokbang bang tha ning aa khita. Ethi bang tha tii eq utong wang hun qhuk tita.

²¹ Chamal angta tha Peter aa tasikta etho piq aa Jesu ma batta, “Tatalteywa, siin u, nang aa manthun kotu ethi phokbang bang tha utik sey angta!”

²² Jesu aa thawel batta, “Shkewa ma kam shing inn.

²³ Nga asing batphang, utang eq tho iri haqkangma batna ‘Iri wang tatun eq jungshi náng qhatwang ka u’ etho tin o nan hunga piq aa bat aa raaq sha angna ta han inn jo, piq rangma eshimal hun angna.

²⁴ Ethi rangma nga batphang, baluk otho nim aa romtam chu inn jo, nim aa kap sey tita han inn, etho nim aa ukap eq nin.

²⁵ Etho nim romtom chu rangma tong inn jo, chamtey tey nim ma jashit kap ajo tho, piq shi tol eq chak inn, eshimal ang ajo mungtan na tongtey nim Wa atho, nim ngarey sha tolchak eq phanin.

²⁶ Etharin nim aa adak miqtang jashit jaksom lot sha tolchak min ang tin ta ang ajo, mungtan na tongtey nim Wa atho nim ma tolchak pha min ang phanin.”

Jesu aa chamal eq iri jaksom lot tang ri somlo aa

²⁷ Ning Jerusalem náng wey thuta. Etho Jesu rangnuk him himthal náng kaa rangham tho ajong tingwa tang etho thong tatalteywa tang etho miqlang tang piq relnáng thuta,

²⁸ etho piq ma pitta, “Nang aa chamal eq iri jaksom lot raa somlo u? Utang eq nangma iri jaksom lot ri somlo u ta batta?”

²⁹ Jesu aa ning thima batta, “Nga nim ma ashey raaq pit phang, nim aa iri raaq raa wey thawel batphin ta ang ajo, nga nim aa chamlang ta pit taphin ethi raaq thawel sha wey bat eq phanáng.

³⁰ Nim aa nga ma batphin, John ma junglam kot rangma utang eq authority kotta? Mungtan wang tia miq wang aa?”

³¹ Ning jaktung o rong wanta, “Hiqtang aa chamta bat i? Hiqtang aa ira mungtan wang angta ta bat ijo piq aa pitna ‘Piq ma chamma kam min ang tin?’

³² Etharin miq wang ta batma ucho ang í.” Ning ucho angta chammatakoi thaji miqtang eq uhan eq ta John sha asing rangsamal angta.

³³ Ethi rangma ning aa Jesu ma batta, “Í aa sammi.” Jesu aa ning thima batta, “Irimal ang ajo nga chamlang authority wang somlo ang sha nga tho nim ma batpha mong.”