Luke 8 - Muklom

Jesu jiphantey miqnu tang

¹ Jesu aa samhaq na etho qhim na Shkewa mungtan tungtang aqhal raaq phanchan eq qhingta. Piq jamna ujiphantey tang wa asi wani angta.

² Etho chamtey miqnu tang tho ujamna atha angta bara anaan tsija tang wang etho atakasa tha rong taqhal ta. Mary tha Magdalene ta halta, bari han wang sanat thangwa phanta,

³ Joanna, bari himteywa Chuza angta, etho piq Herod ajongwa angta, Susana, etho miqnu tang daqhan waan angta bara Jesu nia ujiphantey tang ning aa ngin ko eq nongta.

Uli wontey raaqshiton

⁴ Adak adak samhaq tangwang miqtang Jesu jamoq tachong ma jin thutapha, etho miq daqhan rong thajoq atho, Jesu ning thima iri raaqshiton raa phan kota.

⁵ “Takshey ang atho miqwa ang aa they pik na uli tang won ma kata. Piq aa pikna uli tang won chey atho, chamtey tey uli tha lamna qhat ta etho ja eq dap nakta etho wo tang thu eq tun tu chakta.

⁶ Chamtey tey tha longkit na qhatta, etho uli tang tha hap atho, eshitang thaji tha qhuk eq rong tik angta chammatakoi eshi haq tang sho jung ahung angta.

⁷ Chamtey tey uli tha su thamna qhatta, etho eshi tang tha tat phuk eq cha atho sutham they qhipchak eq ti ta.

⁸ Chamtey tey uli tang tha haq qhal haq na qhatta, ubang tha jong eq tingo ta, shashey nángduk thok ti ta.” Etho Jesu aa tathun batta, “Utang ma naq atha, tat inn!”

Raaqshiton bat eq raaq chamma bat u

⁹ Ujiphantey tang aa Jesu thima raaqshiton tung aa raaq pitta.

¹⁰ Etho piq aa thawel batta, “Shkewa Mungtan thunglam tapu shingta tang tha nim ma tasam ma kota phin etharin adak miqtang ma nga raaqshiton wang bat ang, irimal ang ajo ning aa usiin eq chey na etharin chamtho khimoq angna, ning aa utat eq chey na, etharin chamtho sammoq angna.”

Jesu aa uwontey raaqshiton lak eq bat aa

¹¹ “Iri raaqshiton raa irimal: uli sha Shkewa raaq.

¹² Lam na qhatta uli tang sha irimal miq, barey tat aa, etharin Thangwa thu eq ning bara raaq tatta tha, han eq lun moq angma ning tin mong wang latsom chuwan aa.

¹³ Longkit náng qhatta tha irimal miq, bara raaq tat eq sungrang eq han aa. Etharin uchíng sha haqmong náng wang moq; ning aa chomwey rangma han aa, etharin ning tari ma rangham thu ajo, ning eshiwang qhat aa.

¹⁴ Su tham jaktung na uli qhat aa sha irimal miq, bara utat eq aa, etharin jio tinthin etho likti nginsang etho rollung sungrang tinthin tungkang o uli sha min moq.

¹⁵ Etho haq qhal náng qhat ta uli sha irimal miq, bara jaqhal miq asing wang tin eq tat aa etho jaqhal eq shing aa etho eshiwang li qhal thalat chey ro ang aa.”

Khowan khungna nalpang

¹⁶ “Utang eq tho nalpang thajung eq khowan eq hop shing moq, etha ang moq ajo jibching khungna tho shing moq. Nalpang sha taap na shing aa bara himmong náng wangtey tang thaji ma alang takhi na.”

¹⁷ “Bara tangwang hot pu eq shingta sha ulat eq chakna etho bari tangwang raa hop eq shingta tang sha thaji ma sam ma kona.”

¹⁸ “Ethi rangma, nim aa utat tok o jaqhal eq tat inn, chammatakoi bari jakna atha ethitey thima adak thowey rap kot eq na etho bari jakna ahung ethi tey jak thiwang ujakna chamtan aa sha tho thaji leysom chuwan na.”

Jesu nu nia pho ni no tang

¹⁹ Jesu nu etho upho ni no tang piq jamnáng thuta, etharin miqtang rong tachipnak aa thi rangma urelnáng kap thu moq angta.

²⁰ Washey ang aa they Jesu ma batta, “Banu etho bapho ni no tang ba jamoq tachong ma ranna rong ban chey aa.”

²¹ Jesu aa ning thaji chingko thináng siin eq batta, “Inu etho ipho ni no tang eshitang sha ang aa. Bara Shkewa raaq tat eq somlo aa.”

Jesu aa rangpong rangmok tha thamang chak aa

²² Saalshey, Jesu aa ujiphantey tang tha sol kat eq waqwan ashey na tong eq ning thima batta, “Ka phin, iri shitim eshiphey konáng ka i.” Etho ning thaji tha eshi chako náng katma kacha ta.

²³ Waqwan o jakho konáng ka chey atho Jesu ley tasil angta etho shitim na ang atho ráng rapney pong eq mok ta, waqwan tha jung eq lim chey ta etho ning rollung tha ahal na sey angta.

²⁴ Ujiphantey tang tha ka eq Jesu tha tashat ka eq batta, “Tangteywa! Tangteywa! Hiqtang thaji raa utik angtey sey!” Jesu aa shat eq rangpong rangmok thima uthum angma batta etho thaji tha máng eq thum ta.

²⁵ Etho piq aa ujiphantey tang thima batta, “Nim kam thi barina?” Etharin ning thaji tha rapney rong patja tita etho rapney cho eq ning jaktung na rong tapit ta, “Iri wa ri utang aa? Piq aa rangpong rangmok ma uthum angma bat ko eq ley thum ang aa!”

Jesu aa washey haan wang thangwa tang taqhal aa

²⁶ Jesu nia ujiphantey tang tha Gerasa tamiing aa mung thináng kata, eshi haq sha Galilee shitim chako na angta.

²⁷ Jesu waqwan wang sey thalat atho, eshi samhaq sho washey ang atha piq jamoq tachong ta, piq haan sho thangwa tang atha angta. Jakho wangduk eshiwa sha khat sam hunga hun tong ta. Etho piq him na tong hunga màng bungching tang na tong ta

²⁸ Piq aa Jesu tha khi eq, jujong aa qhap eq ujathong tho shong tong ta etho ringta, “Jesu, Ajong Shkewa Miqwasa! Nang aa iching wang chamlang chu phu? Tinshit eq ngama tsamnang nak kophu!”

²⁹ Piq ira raaq ta chammatakoi Jesu aa anaan tsija sha eshiwa haan shiwang thalat chuwang ma raaqkhat kota. Thangwa eq piq sha jukdaqhan jin lota etho piq sha jak ni ja o janru eq khak ta, etharin piq aa janru sha jinchon chak ta, thang eq rum eq piq tha shu shu haq náng jinsol katta.

³⁰ Jesu aa piq thima pitta, “Ba miing utang aa?” Piq aa batta, “I miing ‘Daqhan’ ta miing aa.” Chammatakoi piq haanmong na thangwa tang daqhan ang aa.

³¹ Thangwa tang aa qhap eq batta, í ma abyss náng katma raaqkhat nak kophu.

³² Eshi kang phang relsho, wak tang daqhan rongqhing chey ta. Req thangwa tang aa Jesu ma batta, “Iri wak tang haan mong náng takat phu.” Etho Jesu aa takat ta.

³³ Ning eshiwa tha shingchak eq wak haan náng nopta. Etho wak tang tha haqkaan wang tha haq nim shitim náng qhat eq tita.

³⁴ Wak rimtey tang aa eshina chamlang angta tha khita, req ning arel samhaq nia khim náng ka eq raaq tang tha batta.

³⁵ Bara angta tha siin ma miqtang kata, etho ning Jesu relnáng thu atho, thangwa tang eq lota miq tha khat sam eq etho jaqhal thunglam sey ang eq Jesu relna tong chey atha khi eq thaji miqtang tha ucho rong angta.

³⁶ Thangwa tatsamnang ta miqwa thi chamal eq qhalta ta ukhitey tang aa ning thima batta.

³⁷ Eshi mungwang thaji miqtang aa Jesu thima eshi haq shiwang chuwang ma batta chammatakoi ning thaji tha rapney sey chota. Ethirangma piq tha waqwan o tong eq chuwang ta.

³⁸ Bari miq haan wang thangwa tang phanta they Jesu rel thináng ka eq batta, “Nga ba jamoq kaphang.” Etharin Jesu aa piq thima bat eq takat moq angta.

³⁹ “Him náng ka u, Shkewa ba rangma chamlang somta thi bat kot u.” Ethi miqwa tha samhaq náng ka eq Jesu aa piq rangma chamlang somta tha bat kota.

Amàng miqnusa etho ashey atak miqnu

⁴⁰ Jesu tha adak shitim ko náng wel atho, miqtang aa wangphu ta ban raaq ta, chammatakoi ning aa jakho wangduk ban siin ta.

⁴¹ Etha ang atho Jairus tamiing aa washey thuta; piq sha Synagogue na ajongwa angta. Piq ni piq Jesu jathong náng bon eq piq himnáng wang ma batta.

⁴² Chammatakoi piq ma usa nushey dang, bara pang asi pang ni utik ko ko sey angta. Jesu piq jamnáng ka atho miqtang aa thaji kowang piq tha timchak ta.

⁴³ Ethi tang waan tho miqnu ashey angta. Piq ma pang asi pang ni wangduk tahi hol taksa angta. Piq lik aa ngin angta tha piq taksa rangma taksa siintey tang thima kota, etharin utang eq tho piq taksa tha jin taqhal moq angta.

⁴⁴ Piq miqtang jaktung thináng thu eq Jesu ji kona piq aa ukhat bal tha lota, etho piq tahi kat tha tatáng sey angta.

⁴⁵ Jesu aa pitta, “Nga utang eq thak lota?” Thaji tha likta, etho Peter aa batta, “Tangteywa, baking kang na miq chen etho thaji aa nang tha rong tathuk aa.”

⁴⁶ Etharin Jesu aa batta, “Chamtey ashey aa nga tatit ta, nga usam eq ang, ihaan wang tarong kata.”

⁴⁷ Miqnu aa u raaq raa usam sey taphang ta tathin ta, req piq tha cho eq Jesu jathong thináng shong tong kata. Etho thaji jakho na, piq aa thaji thim o chamlang ma piq aa tatit ta tha batta etho chamal eq rikla qhalta tha batta.

⁴⁸ Jesu aa ethi nu thima batta, “I miqnusa, ba kam wang hun qhaltu. Nungmay eq ka u.”

⁴⁹ Jesu aa etha bat chey atho, ashey thoksil tatteywa ajongwa him wang thuta. Piq aa Jairus ma batta, “Ba sa tha utik angta ta, thanga Tatalteywa shi nak tasamnáng u.”

⁵⁰ Jesu aa etha tat eq Jairus thima batta, “Nak cho u; uhan eq chey u, etho piq uqhal angna.”

⁵¹ Jesu ning him náng thu atho, piq aa Peter, James, John etho eshi sa shima unu ni wa tang tha chen ujamoq himmong náng solwan ta; adak utang tho thawan moq angta.

⁵² Esho miqtang tha eshi sa thima ning tin tharong thajung ta etho ning jajong aa ring eq qhap ta. Etho Jesu aa batta, “Nak qhap inn, nijangsa tha timoq angta, piq ujib ang aa!”

⁵³ Etha tat eq ning thaji tha rong qhit angta chammatakoi ning aa usam eq ta eshi sa tha utik sey angta.

⁵⁴ Etharin Jesu aa eshi miqnusa jaktha lo eq halta, “I sa, shat u!”

⁵⁵ Urollung tha wey thalun ta, etho piq tha kalo shat eq tun tong ta, etho Jesu aa chamli phaksat koma raaqkhat kota.

⁵⁶ Unu nia wa tha patja tita, etharin Jesu aa irina chamlang angta thima miqtang ma nakbat inn ta raaqkhat kota.