Luke 6 - Muklom

Sabbath saal raaq

¹ Saalshey Sabbath saal ang atho Jesu pik lam na qhing chey ta. Ujiphantey tang aa cham nam tha tuk eq jak o nuk eq wakphak ta.

² Etha ang atho Phorisi tang aa pitta, “Hiqtang thong na Sabbath saal o bara som ching ang moq ta ang aa ni chama som inn?”

³ Jesu aa ning thima batta, “Nim aa phat min ang tin i, David nia unokwa tang aa chamlal ang atho chamlang somlo ta?

⁴ Piq Shkewa him náng wang eq piq aa Shkewa ma kota ethi banlo tha phakta etho ujam wang tang thima tho taphakta. Etharin thong na iri banlo raa tingwa tang aa chen jin phak aa.”

⁵ Etho Jesu aa ning thima batta, “Miqna Sa raa Sabbath saal ma tho Teyhungwa.”

Ujak may thamot moq miqwa

⁶ Saalshey Sabbath saal ang atho Jesu Jehudi tang Synagogue náng kata etho tatalta. Eshina washey jakqhaq ko mey thamot moq angta.

⁷ Thong tataltey tang etho Phorisi tang aa Jesu aa jashit somlot tha ban chey ta, req ning aa Sabbath saal o piq aa taqhal na bo ta ban siin ta.

⁸ Etharin Jesu aa ning tin mong raaq tha usam eq ta etho piq aa miqwa thima batta, “Nang tunshat eq ináng thaji jakho o lang kaphu.” Ethiwa tha tunshat eq eshina lang kata.

⁹ Jesu aa ning thima pitta, “Nga nim ma pit phang: Hiqtang thong na Sabbath saal o chamlang somlo ching ta bat aa? Jaqhal som ching tia jashit som ching aa? Miqwa rollung sha thalun eq ching tia tashit eq ching aa?”

¹⁰ Piq aa ning thaji chingko thináng siinta; etho piq aa washey thima batta, “Bajak ni tachal u.” Piq aa eshimal hun somlo ta, etho piq jaktha aqhal hun wey angta.

¹¹ Ning tha rapney sey khata etho ning jaktung o rong wanta, “Hiqtang aa Jesu ri chamal eq i?”

Jesu aa asi ani apostle tal aa

¹² Ethi rangham tho Jesu romtam chuk ma haqkan náng qhangta etho piq aa paltáng Shkewa jamoq romtam chuta.

¹³ Rangwung sey ang atho ujiphantey tang tha halta etho ethi tang thiwang asi ani tal eq ning thima apostle ta miing shing ta.

¹⁴ Simon, piq miing Peter ta tho ang aa etho piq pho Andrew; James etho John, Philip etho Bartholomew,

¹⁵ Matthew etho Thomas, Alphaeus sa James, etho Simon (piq sha patriot ta thamiing ta)

¹⁶ James sa Judas, etho Judas Iscariot bara Jesu sangchak ta.

Jesu tatal aa etho taqhal aa

¹⁷ Jesu baluk o apostle tang jamoq haqkan wang sey jupha tho, piq tha daqhan ujiphantey tang jamna haqthung na langta. Eshina Judea etho Jerusalem wang daqhan miqtang angta; Etho Tyre nia Sidon jungshi kang samhaq wang miqtang angta.

¹⁸ Ning tha piq raaq tatma rong thuta etho ning taksa taqhal ma rong thuta. Etho anaan tsija tang eq tatsamnang tey tang tha tho thu eq uqhal angta.

¹⁹ Thaji miqtang aa piq han o tatit ma tathinta chammatakoi piq wang tarong thalat eq thaji tha taqhal ta.

Sunmaan etho tintashit

²⁰ Jesu ujiphantey tang chingko thináng siin eq batta, Nim tangshi tangma sunmaan; chammatakoi Shkewa mungtan sha nim rang hun angna!

²¹ Thanga chamlal tey tang ma sunmaan chammatakoi nim sha uphut sey ang nin! Thanga qhapnge aa tang sha sunmaan chammatakoi jina nim sha uqhit ang nin!

²² Miqna Sa rangma nim sha miqtang aa miiksuk phin jo, latchak phin jo, etho junnam phin jo, etho nim ma thip athang ta raaq phin jo, nim ma sunmaan.

²³ Baluk o iri tang raa angna, ethi tok o sungrang ang inn etho wuk eq ninney inn, chammatakoi nim rangma ajong khongpha mungtan na shing aa. Chammatakoi ning tey aa wa tho jakho rangsamal tangma tho irimal hun tintashit kota.

²⁴ Etharin thanga bara tanglom tang rong ang aa ning shima ahal sey angna, chammatakoi ning chamtan jaqhal tongching tha jin tong sey angta.

²⁵ Thanga bara aphut tong aa sha ning ma tsamnang angna chammatakoi jio chamlal angna! Thanga bara ngit eq tong inn sha jio nim tsamnang ang nin, chammatakoi ning tintashit eq khap eq tong na.

²⁶ Chamtan tsamnang baluk o miq aa nang ma jaqhal ta raaq phu; ning tey aa wa tang atho alik rangsamal raaq jin batta.

Ralwa tangma tinmat u

²⁷ Etharin nga batphang, utang eq tat aa ning shima bat ang: ralwa tangma tho tinmat ang nin, utang eq miiksuk phin eshima jaqhal somlo inn.

²⁸ Utang eq nim ma manthun kophin eshima sunmaan inn, etho utang eq nim jamoq jashit somlo phin shima romtam chuk o inn.

²⁹ Utang eq sham phang o wat phin shima adak sham phang shi tho weynol ko inn; miq eq nim khat somta ta ang ajo nim samqhong ni tho chok ko inn.

³⁰ Utang eq nim ching wang chu phu shima ko inn, etho utang eq nim jakwang som aa shi jakwang nak thawel chu inn.

³¹ Nim ma miq eq chamlang somlot ma tathin ajo, eshimal hun nim aa ning ma somlot kot inn.

³² Nim ma tinmat tey ma chen tinmat inn jo, nim aa chamal eq sunmaan kap nin? Ngarey miqtang tho ning ma tinmatey ma tinma aa!

³³ Etho nim ma utang eq jaqhal som ko phin ning ma chen jaqhal som ko inn jo nim ma sunman chamal eq kap nin? Ngarey miqtang atho irimal hun somlo aa!

³⁴ Etho nim ma thaweltey miq ma chen nim aa nam ko inn jo nim aa chamal eq sunmaan kap nin? Ngarey miqtang atho ngarey miqtang ma nam ko aa etho thaji ngin sha thawel chu aa.

³⁵ Etharin nim aa ralwa tangma tinmat inn etho ning ma jaqhal som ko inn; nam kot inn etho thawel kap eq ni ta nak tathin inn; eshimal ang ajo nim aa ajong kongpha kap nin, etho nim aa ajong Shkewa satang ang nin. Chammatakoi piq aa hanmoq tey nia miq jalak tang shima tho rapney manchan aa.

³⁶ Nim Wa manchan kotey eshimal nim atho manchan kot inn.

Adak tang ma phung

³⁷ “Miqdak nak khaphung inn, etho Shkewa tho nim sha khaphung moq angna, miqdak ma miqshi ta nak raaq inn etho Shkewa tho nim ma tolchak na.

³⁸ Miqdak tangma ko inn etho Shkewa tho nim ma ukot eq phanin. Miq eq thap eq nim ma kopha nin, chamal nim aa miq ma thap ko inn eshimal nim ma tho ukot eq pha nin.”

³⁹ Etho Jesu aa ning ma raaqshiton bat kota: “Ashey miikduk eq miikduk shima lam jin takhi komoq angna; irimal ang ajo thani sha haqbing náng qhat wangna.

⁴⁰ Likphatey sha tatalteywa pheynáng eq ajong ang moq; etharin likphatey ning aa thun phat ajo ning tatatlteywa mal hun angna.

⁴¹ Nim miik wang bangling atha ang eq, nim no ni nim pho miik wang aming miiksip shi chamlang ma siin inn?

⁴² Nim miik wang bangling tathin hunga, nim no ma chamal eq jin raaq inn, ‘Nga ba miik wang miiksip ri lat ko phang.’ Takhi eq somtey tang! Jakho nim miik wang bangling shi lat chak inn, ethi jio nim aa nim no miik wang miiksip sha may lat eq ma jaqhal eq khi nin.”

Bang nia uti

⁴³ “Bang qhal sho tishi baluk otho timoq angna, etho bang shi sho baluk otho tiqhal timoq angna.

⁴⁴ Uti shiwang ubang ri chamal aa ta tasam na; su bang wang baluk otho phokbangti they mi etho naamthing wang baluk otho suti they mi.

⁴⁵ Miq qhal tin shina jaqhal tang sha shey aa; eshiwang piq sha jaqhal thalat aa etho miqja tin shina jashit tang sha shey aa. Chammatakoi miq tin na chamlang ang aa sha nung wang thalat aa.”

Him huntey wani

⁴⁶ “Nim aa nim nung wang chen ‘Teyhungwa, Teyhungwa’ ta nga ri chama halphin, etho nim aa nga chamta batphang tha som min?

⁴⁷ Utang iching náng kapha na etho iraaq tat eq tong aa, eshi miq shi chamrol aa sha nga takhi kophang.

⁴⁸ Piq sha eshi miq shimal angna, barey him hun ma haqbung sha awing thut eq long khona eshi him sha arong eq hun ta. Jung limta etho him tha nung ta etharin jin thamot núng moq angta chammatakoi him sha jaqhal eq hunta

⁴⁹ Etharin iraaq tat eq tong moq ang aa iri miq raa irimal angna, barey haqbung sha múngjamaa thut eq phang khona hun ta; etho junglim eq him sha núng ajo him sha anim náng qhat na etho esha miqcho miqpan shitti ta!”