Luke 24 - Muklom

Weyjey

¹ Nángtong saal rangnapkha tho, miqnu tang máang bungching náng Jesu hanphung o atim angam kacha shingta tha jikkot ma kata.

² Ning aa máang bungching kalung phang wang long tha thitchol sey ang atha khita.

³ Req ning tha máang bungching mong náng wangta; etharin eshina ning aa Teyhungwa Jesu máang tha kap moq angta.

⁴ Ning rapney tungnung atho wani khatpung sam eq ning rel o thok langta.

⁵ Rapney cho eq miqnu tang tha haqna rong bonta, etha ang atho ethi wani aa ning thima batta, “Nim aa chamlang ma atharang miq tha amáang tang katang o bi inn?

⁶ Piq iro ahung; piq ulun sey angta. Piq aa Galilee na nim ma chamta batta phin thi tasik inn.

⁷ ‘Miqna Sa sha ngarey miqtang jakna bólq o tatik ma kot chak na, etho saltom o piq wey jey angna.’”

⁸ Etho eshi miqnu tang aa piq raaq tang sha wey tasik ta.

⁹ Etho máang bungching wang wey wel eq, ujiphantey wa asi washey etho adak miqtang thima iri thaji raaq tang raa batta.

¹⁰ Eshi miqnu tang tha, Mary Magdalene, Joanna etho James nu Mary angta; ning etho adak miqnu tang bara ning jamna angta tang tha rum eq iri raaq tang raa apostle tang thima batta.

¹¹ Etharin eshi miqnu tang aa chamta batta tang sha ajat raaq ta apostle tang aa tathinta etho ning aa hanmoq angta.

¹² Etharin Peter tha tunshat eq máang bungching thináng jol eq kata; piq eshináng ka eq bon eq siin atho esho qhatpung khat chen tashing atha kap khita etho adak chamtho ahung angta. Ethi jio piq chamlang angta thima rapney patja eq him náng welta.

Emmaus lam na qhing

¹³ Eshi saal o Jesu ujiphantey wani tha Emmaus ta ashey qhim thináng kata, bara Jerusalem wang asi ashey phalong tan alo angta.

¹⁴ Etho lamna ningni chamlang angta tha wantit ta.

¹⁵ Etho ningni ethi raaq tha wan tit kachey atho, Jesu tho ningni rel o ka eq ningni jamoq rok qhingta.

¹⁶ Ningni aa piq tha ukhi eq ta etharin sing moq angta.

¹⁷ Jesu aa ningni thima batta, “Nim ni chamlang raaq wan eq qhingchey shin?” Ningni tánglang atho tin rapney shit ta.

¹⁸ Ningni wang ashey, bara Cleopas ta miingta they pitta, “Thaney nap aa Jerusalem na chamlang ang chey atha sammoq tey winwa nang raa hun i?”

¹⁹ Jesu aa pitta, “Chamlang angta?” Ningni aa batta, “Nazareth wang Jesu ma chamlang angta tha. Eshi miq tha ashey rangsamal angta, etho Shkewa nia miqtang jakho na piq aa chamta batta etho chamlang somlo ta, eshi tang thaji tha tarong angta.

²⁰ Í ajong tingwa tang etho jaktáng o shingtey tang aa piq tha lo eq tatik ma kotta etho bólq o botta.

²¹ Í aa tungmang ti piq aa Israel miqtang raa thalun na! Etharin iritang angta tha thaney wang saltom sey.

²² Etho íjamoq tongtey chamtey miqnu tang aa í tapatja taphi; ning thaney rangnap o máang bungching náng kata,

²³ piq máang tha eshina kap moq angta. Ning aa eshina rangkamwa tang chongta barey piq tha atharang ta ning ma batta etho ning tha thu eq iritang raa í ma batta.

²⁴ Í jaktung wang chamtey miqtang máang bung ching náng kata etho miqnu tang aa chamal batta thimal hun khita etho ning atho piq tha khimoq angta.”

²⁵ Jesu aa ning ma batta, “Nim ri chamtan ma thom inn, rangsamal tang aa chamlang ta batta phin tang tha itan karel eq han inn.

²⁶ Khristo tsamnang ang eq phun amun nang wang sha ang moq i?”

²⁷ Etho Asang likwit na Moses likwit wang phang ang eq rangsamal tang likwit nángduk piq tung araaq chamta witta tha Jesu aa ning ma jaqhal eq bat tan ta.

²⁸ Ning qhim náng uthok ko sey ang atho, Jesu tha anitom jakho náng weykat tey mal takhi ta;

²⁹ etharin ningni aa piq tha táng eq batta, “Rangpal angma sey ta; nang thaney aa íjamoq tongshing u.” Etho piq ning jamoq tong ma kata.

³⁰ Piq ning jamoq phaksat ma tong atho, piq aa banlo tha somta etho sunmaan ta raaq ta; etho piq aa banlo tha pin eq ning ma phal kotta.

³¹ Etho ningni miik tha kalta etho ningni they piq tha sing ta, etharin piq tha rikla matwang ta.

³² Ningni jaktung o wantit ta, “Piq lamna hiqni ma Asang likwit bat kotaphi tho hiqni tin na waljung aa thimal ang moq angta i?”

³³ Etho ningni kalo shat eq Jerusalem náng kata bari katang ro wa asi washey jiphantey tang adak miqtang jamoq rongtong ta, etho ning ni ning jamoq tachong ta.

³⁴ Etho ningni they batta, “Teyhungwa tha asing hun wey jey ta! Piq Simon jamoq tachong ta!”

³⁵ Etho ningni jamoq lamna chamlang angta tha thaji miqtang ma bat kota, etho ningni aa Teyhungwa banlo pin atho kapsing ta tha tho ubat eq ta.

Jesu ujiphantey tang jamoq tachong aa

³⁶ Ujiphantey tang aa iri raaq raa batchey kamtho, rikla Jesu tha ning jaktung tho thu eq thok langta etho batta, “Nungmay cham tong inn.”

³⁷ Ning aa jungban tha khi i ta tathin eq rapney chota.

³⁸ Etharin piq aa ning ma batta, “Nim chamlang ma cho inn? Nim tinmong na iri tang nàn ri chamlang ma thupha?

³⁹ Ijak nia japha ri siin inn, ira nga hun. Tat lo eq siin phin, etho nim aa sam nin, chammatakoi ashey jungban tha nim aa khi inn thimal uráng nia ungam ahung.”

⁴⁰ Piq aa iri raaq raa bat eq ning ma ujak nia ujapha tha takhi ta.

⁴¹ Ning aa ethi jio tho jin ruk han moq angta, ning rapney sungrang ta etho rong patja ta; iri rangma piq aa ning ma pitta, “Nim ching na phaksat ching atha i?”

⁴² Ning aa piq ma ajang tashing aa ngaqsa ang aa thiwang pin eq kotta.

⁴³ Etho ngaqsa tha som eq ning rel o phak ta.

⁴⁴ Ethi jio, piq aa ning ma batta, “Nga nim jamoq tong taphang tok tho iri tang raa hun bat taphang: Moses thong na, rangsamal tang aa ka shingta eshina etho Psalms likdap na i tung aa raaq chamlang ta batta tang thaji tha asing ang ching.”

⁴⁵ Etho piq aa Asang likwit tha sam ma ning thung tha lakko ta.

⁴⁶ Etho ning ma batta, “Irimal taka ang aa, Khristo ma tsamnang ukap hun eq ching etho saltom o utik wang wey jey ang ching,

⁴⁷ etho Jerusalem wang phang ang eq thaji phan ma tin kaley etho ngarey wang tolchak phanchan piq miing o kotching.

⁴⁸ Nim raa iri tang ma miikkhi tey tang.

⁴⁹ Iwa chamlang ta rangtum shingta sha nga nim ching náng takat pha náng. Etharin aluk wang tarong nim ching náng thuwey moq ling nim aa Jerusalem o hun banching angna.”

Jesu tha mungtan náng sey wáng aa

⁵⁰ Etho piq aa ning tha ajong samhaq wang thalat eq Bethany ta miing aa thináng solkat ta, etho piq aa ujak tha tun eq ning ma sunmaan kotta.

⁵¹ Piq aa ning ma sunmaan kot kam tho, piq tha ning jam thiwang tahang eq mungtan thináng tunsom chuwan ta.

⁵² Ning aa piq tha shumnuk eq tin na rapney sungrang eq Jerusalem náng wey welta.

⁵³ Etho saltáng Shkewa thima kechu ajong kot eq Rangnuk him na tong ta.