Luke 22 - Muklom

Jesu tha thalot ma wan aa

¹ Jehudi tang Ulit ta miing aa Wung moq phan kut aa kan alo ang moq sey angta.

² Ajong tingwa tang etho Thong tataltey tang tha miqtang ma chota, req ning aa Jesu tha shu shu eq tatik ma lam bita.

Judas aa Jesu tha sang ma wan aa

³ Etho Thangwa tha Judas hanphung náng nopta bara Iscariot ta thamiing aa, piq sha ujiphantey tang asi ani mong wang ashey angta.

⁴ Etho Judas tha ka eq ajong tingwa tang etho rangnuk him bantey solwa tang jamoq chamal eq Jesu raa ning ma sangwang táng ta raaq wan ta.

⁵ Etho ning tha sungrang ang eq Judas ma ngin kot ma batta.

⁶ Judas aa cham ang moq ta batta etho miqtang thima tasam hunga Jesu tha lo eq ning jak o kot ma lam bita.

Jesu ulit kut aa kan phaksat ma kacha aa

⁷ Wung moq phan kut aa kan saal o Ulit rangma kelwut sa tang tatik ma thuta.

⁸ Jesu aa, Peter nia John ma iri raaq raa bat eq takat ta: “Ka eq hiqtang rangma Ulit kut aa kan phaksat phaksat ma kacha inn.”

⁹ Ningni aa piq ma pitta, “Nang aa iri baro kacha ma nuk u?”

¹⁰ Piq aa batta, “Nimni ajong samhaq náng ka shin jo, ashey miq tachong shin nin, barey jungchik som eq kachey na. Piq ji jio piq bari him náng wang aa eshi him náng wang shin.

¹¹ Etho eshi him tangteywa shima bat shin: ‘Tatalteywa bat aa, bari himkhok ro nga nia ijiphantey tang Ulit kut aa kan phaksat ni?’

¹² Piq aa nimni ma aluk na ajong asang hal himkhok takhi shin phanin, bari katáng ro uphan kacha chol angna.”

¹³ Ningni ka eq siin atho Jesu aa chamal batta thimal khakla ethimal hun angta etho ningni aa esho Ulit kut aa kan ma kacha shing ta.

Teyhungwa phaksat

¹⁴ Baluk o rangham sey thu atho, Jesu aa apostle tang jamoq phaksat phaksat ma tong ta.

¹⁵ Piq aa ning ma batta, “Nga tsamnang kapwey mong jakho nim jamoq tong eq iri Ulit kut aa kan phaksat ma rapney nuk táng.

¹⁶ Nga nim ma batphang, Shkewa Mungtan na ira tahom wey moq ling nga adak Ulit kut aa kan phaksat phaksa mong ang náng.”

¹⁷ Ethi jio Jesu aa ashey kok som eq, Shkewa ma kechu ajong kot eq batta, “Iri som eq nim thaji aa phal ling inn.

¹⁸ Nga nim ma ira batphang, Shkewa Mungtan thuwey moq ling nga iri sutichi raa ling mong ang náng.”

¹⁹ Ethi jio piq aa ashey banlo som eq, Shkewa ma kechu ajong kota, pin eq ning thima kot eq batta, “Ira ihanngam, bara nim rangma kota. Nga tasik ma irimal som chey ro eq inn.”

²⁰ Irimal hun, phaksat jio, piq aa ning ma kok tha kot eq batta, “Iri kok wang sutichi raa itahi bara nim rangma qhan ta etho Shkewa jamoq anal raaqkhak hun aa.”

²¹ “Etharin siin inn! I sangtey wa ijamna tong aa!

²² Miqna Sa raa Shkewa chamal tathin ta thimal hun tina, etharin usangteywa shima chamtan tsamnang angna!”

²³ Etho ning ni ning jaktung o tapit pita, “Hiqtang wang irimal somtey utang angna?”

Utang thaji pheywang eq ajong ta thadan aa

²⁴ Ujiphantey tang jaktungna utang thaji pheywang eq ajong ta iri raaq rima ning ni ning jaktung o rong thadan ta.

²⁵ Jesu aa ning ma batta, “Thongking tang lungwang tang aa ning miqtang jakho o ning tarong takhi aa, etho jaktáng na shingtey tang aa ning ni ning sha ‘Miqtang nokwa noknu’ ta shing aa.

²⁶ Etharin nim jaktung na irimal nak ang inn; bara thaji pheywang eq ajong angma nuk asha thaji pheywang aming ang ching, etho solwa tang sha sanga mal ang ching.

²⁷ Utang ajong aa, barey phaksat ma tong aa sha tia barey phakshat timphal kot aa sha? Barey phaksat ma tong aa sha hun ajong, etharin nga nim jaktung na phal kottey mal.

²⁸ “Nga chamtan tsamnang tang ling sha nim ijamna ang tin;

²⁹ Etho Iwa aa nga ma jaqhal jaktáng o shing ma kotphang, req nga tho irimal hun nim ma jaktáng o shing kopha náng.

³⁰ I mungtan na nim aa ijamoq tong eq ling phaksat nin, etho nim asi ani Israel phan tang phung eq lungwang tang tongching na tong nin!”

Peter ulik angna ta Jesu aa bat aa

³¹ “Simon! Simon! Tat u! Pik tapiktey tang aa chamal eq wong wang chamti tal bichak aa thimal, Thangwa nim raa khaphung ma chuta.

³² Etharin Simon, ba aa kam ri nak cham kum aa ta nga barang ma romtam chu kotphang. Etho nang baluk o kaley eq kaphanu, ethi tok o nang aa ba pho no tang ma tho taching cham kot u.”

³³ Peter aa thawel batta, “Teyhungwa, nga ba jamoq chuk náng wáng ma etho ba jamoq tikma tho kacha ang!”

³⁴ Jesu aa batta, “Peter nga batphang, inap rangnap wo wal wey moq jakho taktom nang aa nga shampha mong ta bat phanu.”

Ngin khak, khak, jangtong

³⁵ Etho Jesu aa ujiphantey tang ma pitta, “Baluk o nga nim ma ngin khak, khak etho jaaqhong som hunga takat taphang tho, nim ma chamli ukum angta i?” Ning aa thawel batta, “Ang moq.”

³⁶ Jesu aa batta, “Etharin thanga, utang jakna ngin khak etho khak shi som inn; etho utang jakna jaan ahungtey shey khat sha sang eq ri inn.

³⁷ Asang likwit na bat aa, ‘Piq sha tho miq duktey jamna wet ta’ etho iri tung araaq raa asing ang ching, chammatakoi itung araaq taka aa sha asing thu phana.”

³⁸ Ujiphantey tang aa batta, “Siin inn! Teyhungwa irina jaantong ani!” Piq aa thawel batta, “Ira lali!”

Jesu aa Olive haqkang na romtam chu aa

³⁹ Jesu aa samhaq tha shingchak ta etho piq aa som chey ta thimal Olive haqkang náng thuta; etho ujiphantey tang tho ujamoq kata.

⁴⁰ Eshi haq náng sey thu atho piq aa ning ma batta, “Tari náng qhat moq angma romtam chu inn.”

⁴¹ Etho piq anitom jakho náng ka eq, langku o tong eq romtam chuta.

⁴² Piq aa batta, “Iwa, nang unuk ang ujo iri tsamnang kok ri iching wang tathey chak u. Etharin itin nuk o ang moq, ba tinuk o hun cham ang aa.”

⁴³ Mungtan wang rangkamwa thu eq piq ma tharong kota.

⁴⁴ Utin na tsamnang ang eq piq aa jujong jong aa romtam chuta; etho piq ranglom chee tha tahi mal haq náng saal ta.

⁴⁵ Romtam chuk wang tunnshat eq, piq ujiphantey tang ching thináng wey wel atho ning tha tin tashit wang nángti eq ujib angta tha khita.

⁴⁶ Piq aa ning ma batta, “Nim chamlang ma jib inn? Tari náng nak cham qhat inn ta shat eq romtam chu inn.”

Jesu tha lo aa

⁴⁷ Jesu aa iri raaq raa bat ko chey atho, waanshey kachey tapha etho asi ani wang ashey Judas tha ning jakho kho kachey tapha. Piq tha ka eq Jesu tha chip ta.

⁴⁸ Etharin Jesu aa batta, “Judas, nang aa Miqna Sa sha chip eq sang u i?”

⁴⁹ Ujiphantey tang bara Jesu jamna angta tang they chamlang ang chey atha kap khi eq ning aa pitta, “Teyhungwa, í aa jaantong lat i?”

⁵⁰ Etho ning wang ashey tha ka eq ajong tingwa tang solwa sanga wa aqha ko naq tha chonduk chak ta.

⁵¹ Etharin Jesu aa batta, “Thanga lali sey!” Etho piq aa ethiwa naq tha lo eq taqhal ta.

⁵² Etho Jesu aa ajong tingwa tang etho rangnuk him bantey tang solwa etho miqlang tang bara piq lot ma thuta tang thima batta, “Nim aa nga raa ahut ta sam eq jantong nia kantha som eq thu taphin i?

⁵³ Nga salwet Rangnuk him na nim jamna ang táng tho, nim wang utang eq tho nga lot ma tathin min ang tin. Etharin ira nim rangham hun, etho rangnak jaktáng o shing rangham.”

Peter aa Jesu ma sampha mong ta bat aa

⁵⁴ Ning aa Jesu tha lo eq ajong tingwa tang solwa him náng solkat ta; etho Peter aa alo na piq ji tha phanta.

⁵⁵ Esho himthal jaktung na miqtang aa wal tak eq rongtong chey ta, etho Peter tha tho ning jamoq rok tong kata.

⁵⁶ Ashey sanga nu aa Peter tha wal kang na tong chey atha khi eq piq ching náng siin eq batta, “Iri miq raa tho Jesu jamna angta!”

⁵⁷ Etharin Peter aa batta, “Miqnu, nga piq raa sham mong!”

⁵⁸ Chomwey jio, ashey miqwa aa piq ma batta, “Nang tho ning jaktung wang.” Peter aa batta, “Miqwa, nga ang mong!”

⁵⁹ Rangham ashey jio, ashey miqwa arong eq batta, “Chamal o tho, nga usam eq ang, iri miq raa tho piq jamna angta chammatakoi piq raa tho Galilee miq!”

⁶⁰ Etharin Peter aa thawel batta, “Miqwa, nang aa chamta bat u raa nga sam mong!” Khakla piq raaq chey atho wopong tha wal ta.

⁶¹ Teyhungwa ngik eq Peter ching náng siin ta, etho Peter aa Teyhungwa raaq bat tha tasik ta, “Inap rangnap wopong walwey moq jakho, nang aa nga raa sampha mong ta taktom bat phanu.”

⁶² Peter ran náng ka eq rapney qhap ta.

Jesu tha tharakri eq wat aa

⁶³ Bari miqwa tang rey Jesu banta ning aa Piq tha tharakri eq wat ta.

⁶⁴ Ning aa piq miik tho ashey khatlo eq khak eq pitta, “Tat tathin eq bat u? Nang utang eq wat ta!”

⁶⁵ Etho piq tha tharakri thima ning aa adak uphan phan rong pitpi ta.

Jesu tha Jehudi Rong náng thok sol aa

⁶⁶ Rangnap sey thu atho, miqlang tang, ajong tingwa tang, etho Thong tataltey tang tha arum aa tachong eq Jesu tha Jehudi Rong náng solkat ta.

⁶⁷ Ning aa pitta, “Í ma bat phu, nang raa Khristo i?” Jesu aa thawel batta, “Nga bat phang jo nim aa han phamin ang phanin;

⁶⁸ Etho nga nim ma raaq pit phang jo nim aa thawel bat phamin ang phanin.

⁶⁹ Etharin thaney jiwang Miqna Sa raa Shkewa jakqha kona tong na.”

⁷⁰ Ning thaji aa batta, “Nang raa Shkewa sa i?” Piq aa ning ma thawel batta, “Nga raa ta nim aa battin.”

⁷¹ Etho ning aa batta, “Hiqtang ma adak miikkhi kotching ráa moq sey! Piq aa chamta batta tha í aa tat sey ti!”