Luke 18 - Muklom

Noti nu nia khaphung kottey raaqshiton

¹ Jesu aa ujiphantey tang thima salwet romtam chuk ching etho baluk o tho tinjung náng moq angma tatal ma ashey raaqshiton bat kota.

² “Chamtey samhaq na ashey khaphung kottey angta bara Shkewa ma cho moq angta etho miqtang tho rangka moq angta.

³ Etho eshi samhaq sho hun ashey noti nu angta barey eshi khaphung kottey ching náng piq jin thuta, khaphung kot ma piq aa nong chuta, ‘I ralwa jamoq khakla khaphung kophu’.

⁴ Daklot jio khaphung kotteywa aa chamtho som moq angta, etharin uthun ma piq ni piq thima batta, ‘Nga Shkewa ma tho cho mong etho miqtang ma tho rangka mong,

⁵ irimal ang ajo tho iri noti nu rey salwet tsamnang thu eq nga raa paklak phang, iri rangma khakla eq khaphung konáng, etha ang moq ang ajo piq thu chey ro ang phana etho nga raa thanáng tik phanáng!’”

⁶ Etho Teyhungwa batta, “Iri miqshi khaphung kotteywa rey chamta batta sha usam eq ma tathin inn.

⁷ Etho, Shkewa piq miqtang ma barey paltang saltang piq ma hal eq qhapngetey ma khakla phung moq angna i? Piq aa unong eq ma karel angna i?

⁸ Nga nim ma batphang, piq aa nim rangma kalo khakla khaphung phanin. Etharin Miqna Sa kat rangham o mingkang na kam thupha na i?”

Phorisi nia phunta qhoktey raaqshiton

⁹ Etho Jesu aa miqtang ma barey piq ni piq ma chen jaqhal tathin eq adak miqtang ma jashit ta tathin aa eshi miqtang ma iri raaqshiton raa batta.

¹⁰ “Wani rangnuk him náng romtam chuk ma kata: ashey Phorisi miq angta etho ashey sha phunta qhoktey miq angta.

¹¹ Phorisi wa tha lang eq piq ni piq ma raaq eq romtam chuta, ‘Shkewa, nga nang ma kechu ajong kophang, chammatakoi nga miq dak mal ang mong, nga ahut ang mong, jashit jaksomtey ang mong etho sathuk jaksomtey ang mong; nga nang ma kechu ajong kophang chammatakoi nga iri phunta khoktey mal tho ang mong.

¹² Nga saal sanat o saalni sha wokcham tong ang, etho nga chamtan kaplap ang shiwang nang ma rangpal kophang.’

¹³ Etharin, eshi phunta qhekteywa tha alo na lang eq, mungtan chingko náng tun siin hung aa, utik tho tiip eq batta, ‘Shkewa, nga ngarey miq, nga ma tinshit phu!’”

¹⁴ Jesu aa batta, “Nga nim ma batphang, iri phunta qhekteywa Shkewa jakho na miq qhal ang eq qhing chuwang ta, etho Phorisi miq tha irimal ang moq angta, chammatakoi barey piq ni piq ma ajong ta tathin aa sha tinin ma angna, etho barey piq ni piq ma tinin ta tathin aa sha ajong ma angna.”

Jesu aa nijang sa tang ma sunman aa

¹⁵ Chamtey miqtang aa usa nijang jang tha Jesu relnáng ning kho o Jesu jak tha shing ma thok solta. Ujiphantey tang aa iri tang raa khi eq ning thima khata.

¹⁶ Etharin Jesu aa nijang sa tang tha piq relnáng hal eq batta, “Nijang sa tang ri ijamnáng takat phin etho ning ri nak táng inn, chammatakoi Shkewa mungtan raa irimal miqtang rangma hun.

¹⁷ Nga nim ma asing batphang, nijang mal Shkewa Mungtan sha thang min ang inn jo utang tho eshináng jinwang moq angna.”

Tanglom miqwa

¹⁸ Jehudi solwa ashey Jesu ma pitta, “Jaqhal raaq tataltey wa, nga pattuk rollung kap ma chamlang somlo ching aa?”

¹⁹ Jesu aa piq ma pitta, “Nang aa jaqhal ta chamlang ma hal phu? Shkewa hun aqhal, adak utang tho ahung.

²⁰ Nang aa raaqkhat usam eq u, ‘Sathuk som ching ang moq; miq tatik ching ang moq; hut hut ching ang moq; miq ma jobat ching ang moq; ba nu nia wa rangka ching.’”

²¹ Eshiwa aa batta, “Nga nijang wang duk iri tang thaji thong raa tat eq qhang phang.”

²² Jesu iri raaq raa tat eq piq thima batta, “Thanga tho nang aa ashey jaksom ching atha tong wey aa. Baching na chamlang tang thaji shi sang ka eq ngin tang ni tangshi tangma phal ko u, etho nang aa mungtan na lik angin kapnu; etho iji phanphu.”

²³ Etharin eshi miq aa iri raaq raa tat eq, piq tin rapney shita, chammatakoi piq rapney tanglom hal angta.

²⁴ Jesu eshi wa tin na rapney shi aa ta khi eq piq ma batta, “Tanglom miqtang ma Shkewa Mungtan náng nop ma rapney hal aa.

²⁵ Ashey utt sha mitkan po o nop eq jinwang náng eq ashey tanglom miq Shkewa Mungtan náng nop rapney halna.”

²⁶ Esha tat eq miqtang aa piq thima pitta “Irimal ang ajo, utang jin lunna?”

²⁷ Jesu aa thewel batta, “Miqna ma jin ang moq sha Shkewa jin somlo eq aa.”

²⁸ Ethi jio Peter aa batta, “Siin u! Í aa ba jiji phan ma thaji shingchak ti.”

²⁹ Jesu aa ning thima batta, “Nga nim ma asing batphang, barey Shkewa Mungtan rangma uhim tia uhimteynu tia upho no tang tia unu ni wa tia usa tang sha shingchak ajo,

³⁰ ning aa i rollung ro, juk daqhan kapna etho uthok rangham tho pattuk rollung tho ukap eq na.”

Jesu aa taktom piq tik raaq bat aa

³¹ Jesu aa wa asi wani ujiphantey tang hang náng solkat ka eq ning ma batta, “Tat inn! Hiqtang Jerusalem náng ka ijo rangsamal tang aa Miqna Sa tung aa raaq wit ta tha thaji asing angna.

³² Piq sha Gentile tang jaknáng ko chakna, etho ning aa piq sha junnam na, tharak rina, etho piq sha tikthuk na.

³³ Piq watna etho tatik eq chakna, etharin saal tom jio piq wey jey angna.”

³⁴ Etharin ujiphantey tang aa iri tang raa sam moq angta; iri raaq tang raa ning wang tapu shingta, etho Jesu aa chamta battan aa tha ning aa sam moq angta.

Jesu aa miikduk dantuntey tang tha taqhal aa

³⁵ Jesu Jericho relnáng sey thu atho, miikduk miqwa lamna dantun eq tong ta.

³⁶ Piq aa eshiwang miqtang rong tharaa qhing atha tat eq, pitta, “Chamlang ang aa?”

³⁷ Ning aa piq ma batta, “Nazareth Jesu iriwang ka chey aa.”

³⁸ Piq ring qhap eq batta, “Jesu! David sa! Tinshit phu!”

³⁹ Jakhona qhingtey miqtang aa piq ma mol ta etho shu shu eq tong ma batta. Etharin piq jujong aa wey ringta. “David miqwasa! Tinshit angphu!”

⁴⁰ Req Jesu aa tánglang eq miikdukwa tha piq relnáng solkat ma raaqkhat kota. Baluk o piq tha urelna sey ang atho, Jesu aa piq ma pitta,

⁴¹ “Nga ba rangma chamlang jin eq phanáng?” Piq aa batta, “Tangteywa, nga wey khi eq ma nuk ang.”

⁴² Jesu aa piq ma batta, “Etha o wey khi u! Ba kam wang eq nang qhaltu.”

⁴³ Rikla piq aa wey khita, etho Shkewa ma kechu ajong ko eq piq aa Jesu ji phanta. Eshiwang miqtang thaji they ira khi eq, Shkewa tha tasapsey ta.