Luke 17 - Muklom

Ngarey

¹ Jesu ujiphantey tang ma batta, “Miqtang ma ngarey rangma tari uthok hun angna, etharin utang eq iri ngarey tasom lo na ethi miq shima rapney tsamnang!

² Iri tinman miq rima ngarey somlot tasomlot wang eq eshi miq bo sho ashey ajong longku sha khak eq piq sha jungku o bichak ajo piq ma aqhal angna.

³ Ethi rangma nim aa chamlang somlo inn shi tathin tak eq somlo inn! “Nim no aa ngarey somlot somlo aa ta ang ajo piq shima kha u etho piq ngarey wang kaley ajo piq shi tolchak u.

⁴ Saalshey mong o piq aa nim jamoq taksanat ngarey somlo eq nim jam náng taksanat thu eq batna, ‘Nga kaley ang’. Irimal ang ajo nim aa piq shi tolchak u.”

Kam

⁵ Apostle tang aa Teyhungwa ma batta, “Í kam ri tahan u.”

⁶ Teyhungwa thawel batta, “Nim kam raa jungqhang li tan ang ajo nim aa iri mulberry bang rima jin bat eq nin haqmong wang baching ching aa thalat eq jungku náng phuk ka u! Etho eshi bang shey nim raaq sha utat eq na.”

Sanga tang jaksomlot

⁷ “Raaq ni raaq, nim sanga ashey angna bara salwet pik náng kana etha ang moq ang ajo piq aa kelwut rim na. Piq pik wang sey thu pha jo nim aa piq shima phaksat kalo phaksat ma batnin bo?

⁸ Baluk o tho irimal batmin ang nin! Eshimal bat ching katang tho nim aa piq ma batnin, ‘Nga ma til song u, ethi jio bakhokhat sam u etho nga til sat pol uban eq wey phu; ethi jio nang aa sey phaksa nu.’

⁹ Sanga tang bara bat aa sha som ajo kechu ajong kotching hun i?

¹⁰ Nim ma tho irimal hun; nim ma chamlang somlot ma bat taphin esha somlot jio batnin, ‘Í raa sanga hun, í aa chamlang somlot ching tha hun somti.’”

Jesu aa asi miqwa taqhal aa

¹¹ Jesu Jerusalem náng ka tho Samaria etho Galilee jatri lamko o lamta.

¹² Piq ashey qhim náng ka chey atho piq aa angam aa pit asi kap chongta. Ning tha anitom alo na rong langta,

¹³ etho ning aa ring eq batta, “Jesu! Tangteywa! Í ma tinshit phu.”

¹⁴ Jesu aa ning tha siin eq batta, “Ka inn etho nim aa tingwa tangma tasiin kat inn.” Ning chuwang jio, lam qhing o hun ning qhalta.

¹⁵ Ning jaktung wang, washey aa piq uqhal angta ta usam eq atho, piq aa ring eq Shkewa miing tha tasapsey eq welta.

¹⁶ Piq tha Jesu jathong tho bon eq kechu ajong ta kota. Eshi miqwa tha Samaria miq angta.

¹⁷ Jesu aa batta, “Nga nim asi miqwa taqhal taphang; adak wa akhu thi barina?

¹⁸ Chamlang ma iri adak mungwang miq thu eq hun Shkewa ma kechu ajong ta bat ching aa?”

¹⁹ Jesu aa piq ma batta, “Tunshat eq ka u; ba kam wang eq nang qhal tu!”

Shkewa mungtan kat

²⁰ Chamteytey Phorisi tang thu eq Jesu ma pitta, “Shkewa Mungtan shi baluk o kapha na?” Piq aa ning ma batta, “Shkewa Mungtan takhi ang aa thimal kapha moq ang phana.

²¹ Utang eq tho irimal jin bat moq angna, ‘Siin u, ira irina!’ Etha ang moq ajo, ‘Ira eshina!’ Chammatakoi Shkewa Mungtan nim jaktung na.”

²² Ethi jio piq aa ujiphantey tang ma batta, “Saalshey uthok ang phana baritok o nim aa Miqna Sa saal wang saalshey siin thima tathin nin, etharin nim aa kap siin min angnin.

²³ Irimal miqtang tho atha angna barey nim ma bat phanin, ‘Eshináng siin inn!’ Etha ang moq ang ajo ‘Irináng siin inn!’ Etharin nim aa ubi eq ma nak ka inn.

²⁴ Rangna rangkan lip eq chamal eq ashey chako wang adak chako náng phang aa thimal, Miqna Sa saal sha irimal hun angna.

²⁵ Etharin ethi jakho piq rapney tsamnang ching angna etho thangwang miqtang riwang chikrik seykham kap ching angna.

²⁶ Noah tok o chamal angta, Miqna Sa saal raa tho irimal hun angna.

²⁷ Noah waqwan mong náng qhung wey moq ang atho, miqtang aa ling phakshat eq tharik eq tong ta, etho jung tha lim eq miq chamtan ang atha thaji tatik chakta.

²⁸ Lot tok o chamal saal angta, eshimal hun angma ta aa. Miq thaji aa ling phaksat eq urik etho usang rong eq ta, pol aa bang rong kheyta etho him hun eq tong ta.

²⁹ Lot aa Sodom shingchak saal o, mungtan wang sulphur nia walqhat eq ning thaji tha tatik chakta.

³⁰ Miqna Sa thoksal o tho irimal hun angna.

³¹ “Ethi saal o bari miq raa himkho na angna sha tangwang som ching ta himmong náng wangching ang moq; khakla irimal hun bari miq raa pik na ang ajo him náng wey wel ching ang moq.

³² Lot himteynu shi tasik inn.

³³ Barey urollung thalun ma tathin tey sha uthun angna; barey urollung sha thamat na piq sha ulun angna.

³⁴ Nga nang ma batphang, eshi pal sho ashey jibching na miq ani jib chey na; eshiwang ashey sha tun chuwan na etho ashey sha shingchak eq na.

³⁵ Miqnu ani shey cham arum na thu chey na; ashey sha tunsom chuwan na etho ashey sha shingchak eq na.

³⁶ Eshi rangham o miq ani pik na angna, ashey sha sol chuwan na, etho ashey sha shing chak eq na.”

³⁷ Ujiphantey tang aa piq ma pitta, “Teyhungwa, iri táng ri bari katáng ro?” Jesu aa batta, “Bari táng ro miqmáng angna esho miqmáng phaktey wo rong tathung na.”