Luke 15 - Muklom

Matwang kelwut raaqshiton

¹ Phunta qheytey miqtang etho ngarey miqtang aa Jesu tung araaq tat thima thuta.

² Phorisi tang etho Thong tatalteywa tang jashit japjo eq raaq ta, “Iri miq raa ngarey miqtang jamoq tachong aa, etho ning jamoq hun rumphaksat aa!”

³ Iri rangma Jesu aa ning ma iri raaqshiton raa bat kota.

⁴ “Raaq ni raaq, nim jakna shashey kelwut angna etho iritang jaktung wang ashey mawang na; irimal ang ajo nim aa chamlang eq nin? Eshi rok akhu raa akhu kelwut sha shingchak eq ashey kelwut shi baluk nángduk kapwey minling kelwut ashey shi bika min ang nin i?

⁵ Etho bi eq eshi kelwut sha kap ajo, sungrang eq eshi kelwut sha sukkang o tunpey na;

⁶ etho him náng thoksom na. Ethi jio ning aa ujamtey tang etho himkhung thaktey tang thaji sha hal eq batna, ‘I kelwut ira mawang angta tha wey kap táng, ethi rangma rapney sungrang ang! Wangphin, nim ijamoq nok sungrang phin!’

⁷ Nga nim ma batphang, khakla irimal hun rok akhu raa akhu khakla miqtang wang barima tin kaley raa moq ning thiwang ashey ngarey tin kaley tey ma mungtan na rapney sungrang na.”

Matwang nginti raaqshiton

⁸ “Etha ang moq ang ajo, irimal utang miqnu angna bari jakro jaan nginti asi angna, eshiwang ashey matwang ang ajo piq aa chamlang sey na? Piq aa nalpang thajung na, uhim sha jumna, etho khi wey moq ling thaji katáng sho jaqhal eq bina.

⁹ Etho ukhi sey ajo, piq aa unoknu tang etho uhimkhung thaktey tang thaji tha hal eq ning ma batna, ‘Nga rapney sungrang ang. Nga ingin thamat chaktáng tha wey khi táng. Kaphin, ijamoq sungrang inn!’

¹⁰ Nga nim ma irimal hun batphang, ashey ngarey jakshomtey tin kaley ajo Shkewa rangkamwa tang tho rapney sungrang na.”

Matwang angta miqwasa raaqshiton

¹¹ Jesu aa wey batta, “Washey ang aa thima usa ani angta.

¹² Nojiwa they uwa thima batta, ‘Iwa, ilik angin nia pik aa haq shi thanga phal kotphu.’ Req ethiwa they hung aa haq nia lik angin chamtan angta tang tha usa ni thima ramay may phal kota.

¹³ Saal tom bali jio noji wa aa piq rang hung aa haq tha sangchak eq etho lik angin tha hol eq him wang thalat chuwang ta. Piq alo mung náng chuwang ta, etho piq aa lik angin tang tha ngarey rollung rangma thun phaksa ta.

¹⁴ Piq jakna chamtan angta tha thaji sey thun phaksa ta. Etho eshi mung haqna shong aa cham thuta etho piq jakna chamtho ahung sey angta.

¹⁵ Ethi rangma piq eshi mungna tongtey washey ching thináng jaksom lot chuk thima kata etho piq tha uwak siintan remkum thima shingta.

¹⁶ Piq aa waktil raa satwang táng ta tathinta, etharin piq ma utang eq tho chamtho phaksat komoq angta.

¹⁷ Uthun sey ang atho piq aa uthung tha tashik eq tathin ta, ‘Iwa jaktang na chamtan sanga tang ma phaksat daqhan ang aa etho irina phaksat kap hung aa nga utik ko mal sey.

¹⁸ Nga iwa ching náng ka eq bat náng, “Iwa, nga mungtan jakho etho bamiik siin o ngarey jaksom somlo táng.

¹⁹ Nga thanga tho basa ta thamiing rol ang mong sey; nga bahim o sanga tang mal shing phu.”’

²⁰ Etho tunshat eq piq aa uwa ching náng kata. “Piq him wang alo na wey angta etho uwa they piq tha khi eq rapney tinshit ta etho jol eq, usa tha khilo ka eq chip kata.

²¹ Usa aa uwa thima batta, ‘Iwa, nga mungtan jakho etho bamiik siin na ngarey jaksom somlo táng. Nga thanga tho basa ta thamiing rol ang mong sey.’

²² Etharin uwa aa sanga tang thima batta, ‘Kallo! Khat jaqhal wang som kat eq piq ma tasam kot inn. Ujakshi o jakshi khap wang takhap kot inn etho ujaa ro jaaqhong wang taqhong kot inn.

²³ Etho ka eq thaji phewang eq achin maansa wang duk ko inn, hiqtang aa phaksat eq etho cham sungrang i.

²⁴ Chammatakoi isa ira utik sey angta tha thanga wey lun aa, piq matwang sey angta tha thanga kapkhi sey táng.’ Etho req ning aa phaksat eq phang sungrang ta.

²⁵ “Ethi tok tho usa phokho wa tha pikna angta. Uwel sey ang atho him relnáng sey thu atho piq aa sungsey etho ninney kap tatta.

²⁶ Piq aa sanga tang thiwang ashey tha hal eq pitta, ‘Chamlang ang chey aa?’

²⁷ Sanga aa batta, ‘Bano tha him náng wey thutapha etho bawa thaji phewang eq achin maansa tha dukta chammatakoi bano tha him náng jaqhal eq wey thokwel tapha.’

²⁸ Usa phokho wa tha rapney sey khat eq himmong náng tho wangmoq angta; req uwa aa raan náng ka eq piq thima himmong náng wang thima thalimkum bat kata.

²⁹ Etharin piq aa uwa ma batta, ‘Siin u, itan pang nga qha mal barang ma somlo táng, etho nang aa chamta batta phu tha hun tat taphang. Nang aa nga ma chamlang kota phu? Inokwa tang jamoq phaksat ma kelsa ashey tho kopha mu angtaphu.

³⁰ Etharin basa irey ba lik angin chamtan angta tha sathuk nu khom o thaji tha tathun chakta, etho piq him náng sey thu atho nang aa thaji phewang eq achin maansa tha duk kotu!’

³¹ Uwa aa batta, ‘Isa, nang salwet ijamna, etho irang chamtan aa raa thaji barang hun.

³² Etharin thanga kun akan etho sungrang ang ching, chammatakoi bano utik sey angta, etharin thanga wey lun ta; piq matwang sey angta etharin thanga ukap sey ti.’”