Luke 1 - Muklom

Luke aa chamlang ma wit aa

¹ Hiqtang jaktungna chamlang lang angta ethitang tung aa raaq tha daqhan miqtang aa witta.

² Bari miqtang rey jakho wangduk ning miik eq khita, ethitang tha í ma battaphi, ethi raaq tha ning aa witta.

³ Ethirangma, Ajongwa Theophilus, nga tho phang wangduk jaqhal eq samtol eq barang ma thajok jat hunga witma tathin ang.

⁴ Nga iri tang raa ethi rangma somlo ang chammatakoi, nang ma bara tatal taphu ethitang thaji asing thi jaqhal eq cham samtol u.

John jungthalamtey wa uchang angma bat aa

⁵ Herod sha Judea mung lungwang ang tok tho, Zechariah ta thaming atha ashey tingwa angta. Piq sha Abijah tingwa phan ajat wang angta. Uhimteynu miing tha Elizabeth ta angta; etho piq sha tho Aaron tingwa phan ajat wang thutapha.

⁶ Shkewa jakhona ningni rollung tha aqhal angta etho ningni aa Teyhungwa raaq nia thong tha jaqhal eq tatna ta.

⁷ Ningni sa ashey tho ahung angta chammatakoi Elizabeth sha athom angta, etho ningni thani tha rapney sey ku kang ta.

⁸ Salsey ang atho, Zachariah ma tingwa jaksom angta etho piq rangnuk himna jaksom som chey ta.

⁹ Teyhungwa rangnuk himna utang aa shongnol tachapna ta talma tingwa tang aa likwit jin tun ta etho eshimal tun atho Zachariah miing kap tun ta.

¹⁰ Etho piq rangnuk him mongna shongnol tachap atho ranna daqhan miqtang they uwaan eq romtam rong chu chey ta.

¹¹ Etho Teyhungwa rangkamwa ujakhona thok langta etho rongthung na shongnol tachap aa ethi aqhak ko tho langta.

¹² Zechariah piq tha khi atho patti eq ucho angta.

¹³ Etharin, eshi rangkamwa they piq thima batta, “Zechariah, nak cho u! Shkewa ba romtam tha utat eq ta, etho ba himteynu Elizabeth aa ashey miqwasa chang na. Nang aa piq sha John ta miing ching!

¹⁴ Nang rapney sungrang nu, etho piq chang tungkang o, miq daqhan rapney sungrang na.

¹⁵ Teyhungwa jakho na piq ashey ajong miq angna. Piq aa kham ling moq angna etho umok pang ang ching chamtho ling phaksa moq angna. Piq uqhong wangduk Asang Tsija piq hanphung mongna angna.

¹⁶ Etho piq aa Israel miqtang daqhan sha ning Shkewa Teyhungwa relnáng wey thawel solna.

¹⁷ Piq sha rangsamal Elijah mal rapney achan etho tarong som eq Teyhungwa jakho khona kana. Piq aa uwa nia sa tang wey kara eq na; piq aa raaq tat moqtey tang tha aqhal lam náng wey thawel solna; piq aa Teyhungwa miqtang urangma kacha chol angna tha kapna.”

¹⁸ Zechariah aa rangkamwa thima batta, “Ira asing ta nga chamal eq samnáng? Nga tikang sey, etho ihimteynu tho wiku sey.”

¹⁹ Rangkamwa they thawel batta, “Nga raa Gabriel, nga Shkewa jakhona lang ang, etho piq aa nga raa baching náng iri sungrang raaq raa batma takat taphang.

²⁰ Etharin nang aa iraaq kam mu angtu, bara khakla rangham thupha jo asing angna; nang aa kam mu angtu ethi rangma nang raaq may raaq mu angnu; nga nang ma chamta bat taphang sha asing ang wey moq ling nang raaq hunga shu shu tong nu.”

²¹ Ranna miqtang they Zechariah tha rong banta etho piq chamma Rangnuk him mongna itan karel aa ta tathin ta.

²² Piq ran náng sey thalat atho piq miqtang jamoq raaq may wan moq sey angta, etho iri rangma ning they samta piq aa rangnuk him na Shkewa wang chamli ashey máng khita. Piq raaq qhong raaq moq angko eq jak tha thamot eq chamli takhi chey ta.

²³ Rangnuk him na jaksom saal tang tha tathun shing eq, Zechariah him náng wey wel ta.

²⁴ Saltom ni jio uhimteynu Elizabeth aa no sey holta etho jappi banga nángduk him wang ran náng thalat moq angta. Elizabeth aa batta.

²⁵ “Thanga Teyhungwa irangma ira somta etho nga ma nong taphang; miqtang jakho o piq aa irakri tha thamat chak ta!”

Jesu uchang angma raaq bat aa

²⁶ Elizabeth aa uwokna usa japi tharok sey hol atho, Shkewa urangkamwa Gabriel tha Galilee mung Nazareth samhaq náng takatta.

²⁷ Mary ta miing aa ashey jahansa ma tung aa raaq batma piq sha takat ta. Eshi miqnu sha Joseph ta miing aa miqwa jamoq tharik ma thangdang kot ta. Piq David Lungwang phi aa lí angta.

²⁸ Rangkamwa tha thu eq Mary thima batta, “Nungmay eq chamtong u! Teyhungwa bajam jamna!”

²⁹ Mary they uraaq tha tat eq rapney chota chammatakoi piq aa rangkamwa raaq tha sammoq angta.

³⁰ Etharin rangkamwa they piq thima batta, “Mary, nak cho u; Shkewa barangma sungrang aa.

³¹ Nang bahan han sey angnu etho miqwasa ashey chang nu, etho piq miing tha Jesu ta angna.

³² Piq sha ajong angna etho piq sha Ajong Shkewa ma Miqwasa ta halna. Teyhungwa Shkewa piq sha ning tey aa wa lungwang David lungwang tongching kona.

³³ Etho piq sha salwet ma Jacob tang phi aa lí lungwang ta thamiing eq tong na, piq rangmungtan sha baluk otho thun moq angna!”

³⁴ Mary aa rangkamwa thima batta, “Irimal chamal eq angna, chammatakoi nga jahansa wey?”

³⁵ Rangkamwa they thawel batta, “Bakhom o Asang Tsija thupha na, etho Shkewa tarong bajamna tong na. Ethirangma nang aa changnu eshi asang sa sha Shkewa Miqwasa ta thamiing na.

³⁶ Bahim khungthaktey miq wang Elizabeth shi tasik u. Thaji miqtang aa piq ma athom ta raaq ta. Wiku sey ang eq tho uwokna no japi tharok sey hol aa.

³⁷ Shkewa jin moq phanli chamtho ahung.”

³⁸ Mary aa batta, “Nga raa Teyhungwa sanga. Nang aa bat u shimal hun cham ang aa.” Etho rangkamwa tha eshiwang chuwang ta.

Mary Elizabeth jamoq tachong aa

³⁹ Chomwey ang atho, kalo hun Mary kacha ang eq, Judea haqkan mungna ashey samhaq náng kata.

⁴⁰ Piq Zechariah him náng thu eq Elizabeth ching náng ka eq piq tha unuk eq ta.

⁴¹ Mary aa nuk atha tat atho, Elizabeth wokwang usa tha mota. Etho Elizabeth khom o Asang Tsija tha thuta.

⁴² Etho piq aa ring eq batta, “Nang thaji miqnu tang pheywang eq ahan sunmaan! Etho bawok mong wang sa sha ahan sunmaan!

⁴³ I Teyhungwa nu iching náng kat ma itan rangka nga chamal eq kap táng?

⁴⁴ Chammatakoi nang aa nga nuk taphu tha tat eq kalo hun iwok wang nosa tha sungrang wang eq mota.

⁴⁵ Teyhungwa raaq raa asing ta kam tu ethima nang raa rapney sunmaan!”

Mary tasapsey

⁴⁶ Mary aa batta, I tin eq Teyhungwa tha tasapsey aa;

⁴⁷ I thaluntey Shkewa ma itsija sungrang ang chey aa,

⁴⁸ Chammatakoi nga itan aming sanga ashey, etharin piq aa nga lakchak moq angta phang! Thanga thaji miqtang aa nga ma sunmaan ta batna.

⁴⁹ Tarong Shkewa nga ma tinshit eq ajong jaksomlot somta, Ethirangma umiing sha asang;

⁵⁰ Iri patwang tha adak pat nángduk piq rangkatey thima piq aa tinshit na.

⁵¹ Piq aa utarong jaktha thalo ta etho tharangka angtey tang sha shaap na chak na.

⁵² Piq aa lungwang tang sha ning tongching wang taqhat chakta etho tinmang miqtang sha tun ta.

⁵³ Piq aa chamlal tey tang sha jaqhal tangwang wang taphut ta etho tanglom tang sha jak changpol takat ta.

⁵⁴ Usanga Israel tha piq aa nongta etho umiq tang tha piq aa salwet tinshit ta.

⁵⁵ Piq aa hiqtang tey aa wa ma rangtum aa thimal Abraham nia uphi aa lí thima salwet tinshit ta.

⁵⁶ Mary japi tom Elizabeth jamoq tong ta etho ethi jio uhim náng wey wel ta.

John jungthalam tey wa chang

⁵⁷ Elizabeth ma no khi ma usal sey angta etho piq aa miqwasa chang ta.

⁵⁸ Uhimkhung thaktey nia ujuntey tang aa samta Teyhungwa piq ma rapney tinshit aa ta etho ning ujamoq rapney sungrang ta.

⁵⁹ Eshi nijangsa tha saal ashat sey ang atho, ning aa uhankhup qhan ching thong somma solkat ta, etho ning aa uwa miing wang Zechariah ta miingma tathin ta.

⁶⁰ Etharin unu they batta, “Ang moq! Umiing raa John ta miing ching!”

⁶¹ Ning aa piq thima batta, “Nim himtey wang irimal utang miing tho ahung!”

⁶² Etho ning aa uwa chingko náng siin eq pitta, “Iri miqwasa miing ri chamta shing ma ta u?”

⁶³ Zechariah aa witma chamli lang chu eq esho witkot ta, “Umiing raa John.” Ning tha rapney pattita!

⁶⁴ Kalo hun Zechariah tha raaq sey wey raaq ta, etho piq aa Shkewa miing tha phang tasapsey ta.

⁶⁵ Himkhung thaktey tang aa etha khi eq rapney rongcho ta, etho iri raaq raa Judea haqkang mung thaji ko aa kan tey tang aa samta.

⁶⁶ Barey iri raaq raa tatta tang thaji they rong tathin eq pitta, “Iri sa ri chamal angwang ko?” Teyhungwa tarong ujamna tha ta thaji eq samta.

Zechariah raaqtóng

⁶⁷ John wa Zechariah haan na Asang Tsija ushey ang eq piq aa Shkewa raaq tha irimal ta batta:

⁶⁸ Israel Shkewa, Teyhungwa miing o hiqtang aa tasapsey i! Chammatakoi piq ka eq umiq tang tha taqhapta.

⁶⁹ Piq aa hiqtang rangma ashey thunjong thaluntey tathok tapha, piq sha usanga David phi aa lí.

⁷⁰ Ira piq aa asang urangsamal tang tungkang o jakho wangduk rangtum ta,

⁷¹ piq aa hiqtang ralwa tang wang etho utang aa miiksuk phi eshi tarong wang thalun phani.

⁷² Piq aa hiqtang tey aa wa tangma manchan takhina etho piq asang raaqkhak sha tasik na ta piq aa batta.

^73-74 Piq aa hiqtang tey aa wa Abraham ma rangtatum ta, hiqtang ralwa tang wang hiqtang thalun phani, etho chamtho chopan hunga tasom phani,

⁷⁵ Irimal ang ajo hiqtang ujakhona salwet asang etho jaqhal lam o tong ni.

⁷⁶ Etho nang isa, nang ajong Shkewa rangsamal ta hal phanu. Etho nang raa Teyhungwa lam hun ma ujakho kho qhing nu,

⁷⁷ Umiq tang ma batna, ngarey wang tolchak kap eq ning sha lunna

⁷⁸ Hiqtang Shkewa raa tinshit nia tinmat, Ethirangma mungtan wang rangnapkha rangwung hiqtang khom o kaphana,

⁷⁹ etho anak na etho utik jakhangna tongtey tang khom o litna, etho hiqtang raa nungmay lam náng solkat phani.

⁸⁰ Nijangsa tha cha eq tsija o rongta. Israel miqtang aa tasam nángduk shushu haqna tong ta.