Jude 1 - Muklom

¹ Iri likwit raa Jude ching kowang bara Jesu Khristo sanga etho James no miqwa. Barima Shkewa halta, bara Wa Shkewa tinmat na etho Jesu Khristo hom eq tong aa, ning rangma nga wit ang.

² Tinshit, nungmay, etho tinmat nim aa ahan cham kap inn.

Aja tatal wang rangtun eq tong inn

³ Inoknu nia wa tang, nga nim ma eshi lunwan tung aa raa bara hiqtang aa phal i, iri tung aa raa wit ma rapney tathin táng, etharin Shkewa umiqtang rangma tahom kotta eshi kam rangma tharal inn ta tharong bat eq wit ching ta tathin ang.

⁴ Chammatakoi chamtan Shkewa ahung miqtang hutshu wang hiqtang jaktung na nop ta, barey ujashit lam sha tapu rangma hiqtang Shkewa ráng manchan raaq sha kaley chak aa, etho ning aa hiqtang tataltey nia Teyhungwa barey Jesu Khristo sha shingchak aa. Jakho wang hun ning tsamnang tung aa raaq asang likwit na wit sey ta.

⁵ Nim aa iri thaji raa usam sey tin jo tho, nim ma iri raaq rima tin tachim ma tathin aa. Teyhungwa Egypt mung wang Israel miqtang sha juksey thalun eq ta, etharin jio hanmoq tey tang sha piq aa tathun eq chakta.

⁶ Bari rangkamwa tang sha ujakkhung o tong hunga etharin utong ching sha shingchak ta, ning sha anim wang anak o pattup janru wang khak eq shing aa. Shkewa ning sha ajong saal o khaphung rangma shing aa.

⁷ Sodom nia Gomorrah etho eshi rel wang samhaq tang shi tasik inn, eshiwang miqtang sathuk somtey angta etho adak adak jashit jaksom somlo ta, ning aa pattuk wal tsamnang kapta etho esha thaji rangma raaqtathak ang aa.

⁸ Eshimal hun iri miqtang máng shey ning ni ning hanphung miiksuk eq ngarey tasom aa; ning aa Shkewa jakkhung na tong shingchak aa etho mungtan atharang tang sha junnam aa.

⁹ Etharin ajong rangwa Michael atho, baluk o thangwa jamoq Moses máng rangma thadan ta tho, thangwa ma junnam raaq jashit wang raaq moq angta, etharin, “Teyhungwa nangma cham khaq phu” ta batta.

¹⁰ Etharin iri miqtang rey bari raaq raa sam moq, eshi tang shima jashit ta raaq aa; etho ning thung ahung jatngam tang mal bara uthun ang aa, chammatakoi ning sha, ning tinthin o hun tong aa.

¹¹ Ning ma chamtan jashit ang aa, ning aa Cain lam ji phan aa. Ngin rangma Balaam aa thaja somlo ta mal ning ni ning aja náng taqhat aa. Ning Korah mal tharal aa, etho piq mal ning sha thun ti aa.

¹² Ning rakri jaksom tungkang o nim jamoq phaksat ajo esha jashit raaq ta raaq eq thalat chuwang aa. Ning aa ning ni ning sha rimrang aa. Ning sha rangpong eq mot aa phun mal etharin eshiwang rangchey moq. Ning sha jaqhal rangham o tingo moq bang mal, eshi bang sha uching wang thalat ma kot ta etho esha tik sey angta;

¹³ Ning sha jung japtey mal, etho ning rakri jaksom sha uban mal. Ning sha dangshey o tong moq phanli taset tang mal, bari rangma Shkewa awing anak na pattuk rangma shing ta.

¹⁴ Enoch atho, bara Adam jio sanat phi aa lí ma angta, ning tung aa raaq jakho wang raaqtóng ta, “Siin inn, Teyhungwa u aa asang rangkamwa tang hayat jamoq kaphana.

¹⁵ Etho piq aa thaji miqtang sha khaphung na, etho ning aa somlo ta jashit jaksom tang sha sam ma kot na etho piq miiksuk tey Shkewa ahung ngarey miqtang aa aja batta sha sam ma kot na.”

¹⁶ Iri miq raa salwet japjo aa etho miq dak aja sha bi aa; ning ni ning anaan tinthin sho ning qhing aa etho ning ni ning tung aa raaq tharangka bat aa etho ning aa ahan kap rangma miqdak sha thajong bat aa.

Rangtun nia raaq tatal bat

¹⁷ Etharin inoknu nia wa tang, hiqtang Teyhungwa Jesu Khristo apostle tang aa jakho ubat eq ta sha, nim aa tasik eq shing inn.

¹⁸ Ning aa nim ma batta, “Uthun saal o irimal miq takhi na barey nim tikngik kung phanin etho ning ni ning jashit tinthin sho qhing na.”

¹⁹ Ning aa nim jaktung na taphal shing aa; ning hanngam tinthin shey hun ning sha táng aa etho ning ma Shkewa Tsija ahung.

²⁰ Etharin inoknu nia wa tang, nim asang kam o chalo inn. Etho asang Tsija tarong jamoq romtam chu roq eq inn,

²¹ etho hiqtang Teyhungwa Jesu Khristo piq tinshit o nim ma pattup rollung sha kotma ban eq nim ni nim shi Shkewa tinmat o shing inn.

²² Unan shingtey tang ma tinshit takhi inn;

²³ miqdak tang shi wal wang nal eq thalun inn; etho miq dak shima ucho jamoq tinshit takhi inn, etharin ning rollung tashit tey ngarey shi miiksuk inn.

Uthun tasapsey

²⁴ Barey nim sha tabot wang jin táng tey etho nim sha uphun amun jakho na sungrang jamoq ang eq jin thalang eq phanin,

²⁵ eshi ashey dang Shkewa rangma, bara hiqtang thaluntey piq shi hiqtang Teyhungwa Jesu Khristo tungkang o jakho wang somlo eq etho thanga náng thula etho pattup rangma, phun amun, rangka, tarong, etho Authority cham ang aa. Amen.