John 9 - Muklom

Jesu aa uchang wang miikduk miqwa taqhal aa

¹ Jesu ka chey atho, uchang wang hun aduk wa kap khita.

² Ujiphantey tang aa piq ma pitta, “Tatalteywa, utang ngarey tungkang wang aduk wa chang ta, iri miq tungkang o tia unu ni wa tungkang o?”

³ Jesu aa thawel batta, “Piq ngarey wang ang moq etho unu ni wa ngarey wang tho ang moq. Etharin Shkewa jaksom piq o takhi rangma ang aa.

⁴ Chamtan rangney aa eshitan itakattey jaksom sha hiqtang aa somlo ching. Rangpal uthuk sey angma ta, eshina utang eq tho jaksom jin som moq angna.

⁵ Baluk náng thula nga iri mingkang ro tong náng, eshináng thula nga raa mingkang wallit.”

⁶ Piq aa iri raaq bat jio, Jesu aa haq sho thuk eq buk tha tacham ta etho ethi buk tha aduk wa miik tho jik kota

⁷ etho piq aa batta, “Ka u, Siloam jung o khol ka u.” Siloam ta “Takat.” Piq ka eq khol kat ta, etho miik they khi eq welta.

⁸ Himrel tey tang etho piq khokqhey kam khitey tang they batta, “Piq raa tong eq khokqhey tey miqwa tha ang moq i?”

⁹ Chamtey they batta, “Piq tha hun.” Adak tang they batta, “Piq tha ang moq, etharin piq mal hun.” Req ethi miqwa they batta, “Nga piq tha hun.”

¹⁰ Ning aa piq ma pitta, “Ba miik chammal eq qhal aa?”

¹¹ Piq aa thawel batta, “Jesu ta washey eq buk tun som eq i miik o jik ko eq nga ma batta, ‘Siloam jung náng ka eq mit kat u’. Nga ka eq mit kat ang tho khi sey táng.”

¹² Ning aa pitta, “Piq thi barina?” Piq aa batta, “Nga sam mong.”

Phorisi tang aa taqhal tung aa raaq pitpi

¹³ Jakho tok o aduk angta ethi wa tha ning aa Phorisi tang relnáng solkat ta.

¹⁴ Jesu aa buk som eq miqwa miik taqhal saal tha Sabbath saal angta.

¹⁵ Phorisi tang aa tho piq ma wey pitta, “Ba miik chammal eq qhalta?” Piq aa ning ma batta, “Piq aa imiik o buk tha jik ta, ethiji tho nga khol táng, thanga ukhi sey ang.”

¹⁶ Chamtey Phorisi tang raaq ta, “Iri miq raa Shkewa kowang ang moq, chammatakoi piq aa Sabbath saal raaq tat moq.” Etharin miq dak tang they batta, “Ngarey miq eq irimal patja jaksom chamal eq jin somna i?” Eshirangma ning jaktung thina kara moq angta.

¹⁷ Ning aa aduk wa thima wey pitta, “Piq aa ba miikduk taqhal ta, nang aa piq tung aa raaq cham ta raaq u?” Piq aa batta, “Piq raa rangsamal.”

¹⁸ Piq aduk angta etho thanga ukhi sey aa ta Jehudi tang aa uhan eq ma nuk moq angta. Ning aa aduk wa ukhi sey aa ta unu ni uwa tha hal eq,

¹⁹ ning ni ma pitta, “Iri nim ni sa tha i? Uchang wang hun aduk angta tha i? Thanga piq aa chammal eq wey khi aa?”

²⁰ Unu ni wa aa thawel batta, “Ira ini sa ta sam i etho aduk changta ira tho usam eq i.

²¹ Etharin piq aa chamal eq khi aa etho utang eq piq miik taqhal ta ini aa sammi. Piq miqlang, piq ma pit inn, piq aa hun bat phanin.”

²² Unu ni wa Jehudi tang ma ucho angta, ethirangma ning ni aa iri raaq raa batta. Chammatakoi Jehudi tang rum wan sey angta, utang eq tho Jesu raa Khristo ta bat ajo synagogue wang latchak na.

²³ Eshi tungkang o unu ni wa batta, “Piq miqlang, piq ma hun pit inn.”

²⁴ Ning aa uchang wang aduk wa tha wey hal eq pitta, “Asing raaq bat eq Shkewa tasapsey u. Eshi miq sha ngarey miq ta íaa usam eq i.”

²⁵ Piq aa thawel batta, “Piq ngarey ang moq tia ang ang aa nga sammong, nga ashey dang sam ang, nga aduk ang táng, thanga ukhi sey ang.”

²⁶ Ning aa piq ma wey pitta, “Piq aa nangma chamlang somlo ta? Etho piq aa chammal eq ba miik taqhal ta?”

²⁷ Piq aa thawel batta, “Nga nim ma bat sey taphang, etho nim aa tat min ang tin, thanga jukni chamlang tat ma ta inn? Nim tho ujiphantey angma ta inn i?”

²⁸ Ning aa piq ma kha eq batta, “Nang raa hun ujiphantey, í raa Moses jiphantey.

²⁹ Í aa sam eq i, Shkewa Moses jamoq wan ta, etharin íaa iri miq raa bari wang thutapha tha tho sammi.”

³⁰ Eshi miq they thawel batta, “Esha patja ang ching raaq! Nim aa sam min, piq bari wang thutapha, etharin piq aa imiik aduk wang taqhal taphang.

³¹ Hiqtang aa sam eq i, Shkewa ngarey miqtang raaq tat moq; etharin utang eq piq rangka aa etho piq tinuk o qhing ajo Shkewa piq raaq sha tat eq aa.

³² Utang eq tho uchang wang aduk miq taqhalta ta phang wang hun utang eq tho kap tat wey mi.

³³ Eshi miq sha Shkewa kowang ang moq angta jo chamtho jin somlo moq ang wang ta.”

³⁴ Ning aa piq ma thawel batta, “Nang ngarey wang changtu, nang aa í ma chamlang tatal phanu?” Etho ning aa piq tha synagogue wang latchak ta.

Tsija tung aa raaq na miikduk

³⁵ Piq tha synagogue him wang latchak ta ta Jesu aa kap tat ta, piq jam tho tachong eq batta, “Nang aa Miqna Sa o kam shing u i?”

³⁶ Piq aa thawel batta, “Tatalteywa, piq shi utang aa, nga piq sha kam wang táng!”

³⁷ Jesu aa piq ma batta, “Nang aa piq ukhi eq tu, piq tha ba jamoq wanchey aa.”

³⁸ Piq aa batta, “Teyhungwa, nga kam eq ang.” Etho piq Jesu jakho o bon ta.

³⁹ Jesu aa batta, “Utang eq khi moq, piq aa ukhi eq na etho utang eq khi eq na, piq aduk ma angna, nga iri mingkang ro khaphung ma ka taphang.”

⁴⁰ Chamtey Phorisi tang Jesu jamna angta tang they tat eq batta, “Í tho miikduk i?”

⁴¹ Jesu aa ning ma batta, “Nim miikduk ang tin jo ngarey miq ang min ang wang tin; etharin nim aa thanga khi sey i ta bat inn, ethirangma nim ngarey na hun tong inn.”