John 7 - Muklom

Jesu nia uno tang

¹ Iri raaq tang jio Jesu Galilee na lingqhing ta; chammatakoi Jehudi tang aa Jesu tha tikwat ma tathin chey ta. Ethirangma piq Judea haqna lingqhing ma nuk moq angta.

² Etharin Jehudi tang Bulang taap kut aa kan arelna angta.

³ Ethirangma uno tang aa piq ma batta, “Iri wang Judea haq náng ka u, etho bari jaksom raa nang aa somlo u, eshitang shi ba jiphantey tang aa eshina cham khi aa.

⁴ Utang tho asam atol qhong ma nuk ajo tapu eq somlo moq. Nang aa iri tang jaksom raa som chey ujo nang ni nang raa mingkang ro takhi nu.”

⁵ Chammatakoi uno tang atho Jesu ma han moq angta.

⁶ Jesu aa ning ma batta, “Nga ma thanga tho khakla rangham tha thuwey pha moq, etharin nim ma salwet thaji rangham raa khakla.

⁷ Mingkang miqtang eq nim raa jin miiksuk pha min, etharin ning aa nga miiksuk phang chammatakoi ning jaksom aja ta nga miikkhi kot ang.

⁸ Nim kut aa kan náng ka inn; nga thanga iri kut aa kan náng kapha mong, chammatakoi thanga náng thula nga ma rangham thu wey pha moq.”

⁹ Jesu aa ning ma iri raaq tang raa bat jio Galilee na hun tong ta.

Jesu Bulang taap kut aa kan na

¹⁰ Etharin uno tang kut aa kan náng kat jio, Jesu tho takhi hunga tapu eq kata.

¹¹ Jehudi tang aa kut aa kan na ira bat eq bita, “Jesu thi barina?”

¹² Miq wan eq piq tung aa raaq tapu eq daqhan raaq wan tit chey ta; chamtey tey eq batta, “Piq miq qhal” Etho chamtey tey eq batta, “Ang moq, piq aa miqtang aja lam náng sol aa.”

¹³ Etharin Jehudi solwa tang ma cho wang utang eq tho piq tung aa raaq lan bat kot moq angta.

¹⁴ Kut aa kan tangko sey ang atho, Jesu rangnuk himthal náng ka eq phang tatal kot chey ta.

¹⁵ Jehudi tang aa patja eq batta, “Tatal hunga piq aa thung atal ri chammal eq sam aa?”

¹⁶ Jesu aa ning ma thawel batta, “Nga tatal ang raa iraaq ang moq, etharin nga takatteywa raaq.

¹⁷ Utang miq eq Shkewa tinuk wang kat ma ta ajo piq aa nga Shkewa ching wang tatal bat ang tia iching ko wang tatal bat ang sha ning aa usam eq na.

¹⁸ Utang eq piq ching kowang bat aa, piq aa piq ni piq sha thajong ma tathin aa; etharin utang piq takatteywa thajong ma tathin aa, piq sha asing, etho piq shima jashit ahung.

¹⁹ Moses aa nim ma thong kot moq ang ta i? Etharin nim wang utang tho thong na qhing min. Nim aa nga tikwat ma cham ma tathin inn?”

²⁰ Miqtang they thawel batta, “Ba jamna thangwa! Utang eq nang tikwat ma tathin aa?”

²¹ Jesu aa thawel batta, “Nga ashey patja jaksom somlo táng, etho nim thaji patti tin.

²² Moses aa nim rangma hankhup qhan ma raaqkhak kota, nim aa Sabbath saal o hankhup qhan inn. Esha Moses ching kowang ang moq angta, etharin nim tey aa wa tang aa phang somlo ta.

²³ Nim aa nijang miqwasa Sabbath saal o hankhup qhan inn jo nim tinthin o Moses thong raa tachon moq ang ajo, nga Sabbath saal o miqwa ashey taqhal táng thima nim nga ma cham ma kha phin?

²⁴ Miq siin eq khaphung nak phung inn, etharin asing wang khaphung inn.”

Piq raa hun Khristo i?

²⁵ Jerusalem wang miqtang they batta, “Jehudi tang aa tikwat ma tathin chey ta wa thi ira i?

²⁶ Siin inn! Piq aa miq wan tang thim o bat aa etho ning piq ma chamtho raaq moq. Phokho walang tang aa piq raa hun Khristo ta asing sam sey ta i?

²⁷ Piq bari wang aa ta íaa usam eq i; etharin Khristo sey kapha jo piq bari wang katapha ta utang eq tho sam moq angna.”

²⁸ Jesu aa thanga tho rangnuk himthal na tatal chey ta tho ring eq batta, “Nim aa nga usam eq phin, etho nga bari wang aa ta nim aa sam eq inn. Etharin nga i tinuk o kapha mong ang taphang. Itakatteywa asing, nim aa piq sam min.

²⁹ Nga piq usam eq ang chammatakoi nga uching kowang kataphang etho piq aa hun nga takat taphang.”

³⁰ Etho ning aa piq thalot ma tathinta, etharin utang eq tho jak eq lo moq angta chammatakoi piq rangham thuwey pha moq angta.

³¹ Etha otho daqhan miqtang piq tha han eq batta, “Khristo sey kapha jo iri wa phey náng eq tho ahan patja jaksom takhi na i?”

Jesu thalot ma ubantey tang takat aa

³² Phorisi tang aa miqtang ma piq tung aa raaq wan aa tha kap tatta; req ajong tingwa tang etho Phorisi tang aa Jesu tha thalot ma ubantey tang tha takat ta.

³³ Jesu aa batta, “Nga chomwey rangma hun nim jamna, etho nga takatteywa jamnáng wang náng.

³⁴ Nim aa nga bi phanin, etharin khipha min ang pha inn. Bari náng nga ka ang eshináng nim jin kapha min.”

³⁵ Jehudi tang jaktung na raaq ta, “Hiqtang aa khimi angma piq bari náng ka na? Piq Greek tang samhaq náng ka eq ning ma tho tatal kot eq na i? Eshina hiqtang miqtang tho utong ang aa.

³⁶ Piq aa batta raaq ri chamlang raaq aa, ‘Nim aa nga ubi eq pha nin, etharin khipha min ang nin; etho bari na nga ka ang, eshináng nim jin ka pha min ang inn?’”

Rollung kottey jung

³⁷ Eshi kut aa kan uthom etho akhek saal tho Jesu ulang ang eq etho ring eq batta, “Utang jung lal ti ajo irelnáng ka eq ling ka phin.

³⁸ Chamal Asang likwit na bat aa, utang eq nga ma kam aa, ‘Piq tinmong wang rollung jungku tang tha thalat na.’”

³⁹ Piq aa iri Tsija tung aa raaq batta. Utang eq piq o kam aa tang shey Tsija kapna. Tsija thanga náng thula kawey pha moq angta chammatakoi Jesu thanga náng thula piq phun amun angwey moq angta.

Miqtang jaktung na taphal

⁴⁰ Miq wan thina chamtey they iri raaq tang raa tat eq batta, “Asing asing iri wa raa Rangsamal.”

⁴¹ Miqwa adak tang they batta, “Ira Khristo.” Etharin chamtey tang they batta, “Chamma? Khristo Galilee wang thupha na i?

⁴² Asang likwit na batta, ‘Khristo sha David phe alí etho David tong ta Bethlehem qhim thiwang thu phana.’”

⁴³ Req Jesu rangma miqtang jaktung thina taphal angta.

⁴⁴ Chamtey ethiwang piq tha thalot ma tathin ta, etharin utang eq tho jak thalo moq angta.

Jehudi tang aa han moq

⁴⁵ Ubantey tang sha ajong tingwa tang nia Phorisi tang relnáng wey wel ta. Ning they ubantey tang thima pitta, “Nim aa piq chamlang ma sol min ang tin?”

⁴⁶ Ubantey tang they thawel batta, “Iri miqwa rey bat aa thimal utang eq tho baluk otho bat wey moq.”

⁴⁷ Phorisi tang aa ning ma batta, “Nim raa tho aja ma shing ta phin i?

⁴⁸ Phokho walang tang tia Phorisi tang wang ashey eq tho piq ma han eq ta i?

⁴⁹ Iri miq wan rey thong sam moq, req ning tha Shkewa manthun mong na.”

⁵⁰ Phorisi tang wang Nicodemus ta ashey angta, bara Jesu jamnáng ka eq rangpal o tapu eq tachong ta. Piq aa pitta,

⁵¹ “Hiqtang thong eq miq ma, jakho piq raaq tat eq sam moq nángduk, aja ta raaq moq.”

⁵² Ning aa thawel batta, “Nang tho Galilee wang i? Bi eq siin u, ashey Rangsamal tho Galilee náng thuwey moq.”

⁵³ Etho ning thaji him náng chuwangta.