John 6 - Muklom

Hayat banga miqtang ma taphaksat

¹ Iri jio, Jesu Galilee shitim hangko kang shitim thináng kata. Ira Tiberias shitim ta raaq ta.

² Daqhan wan eq ujiphanta chammatakoi piq aa atak asa tang sha taqhal eq patja jaksom somlo ta tha ning aa ukhi eq ta.

³ Jesu haqkan náng qhungta etho eshina ujiphantey tang jamoq tong ta.

⁴ Jehudi Ulit kut aa kan arelna sey angta.

⁵ Jesu aa aluk náng tun siin atho daqhan wan urel náng ka aa tha khita, piq aa Philip ma pitta, “Hiqtang aa ning rangma phaksat banlo bari wang ri ka ni?”

⁶ Jesu aa iri raaq raa Philip tari rangma pitta, chammatakoi piq aa thanga chamlang somlo ching tha usam eq ta.

⁷ Philip aa piq ma thawel batta, “Shani denari wang banlo sha thaji ma amaan mansa tho jin lilap moq angna.”

⁸ Ujiphantey tang thiwang Simon Peter no Andrew aa Jesu ma batta,

⁹ “Irina jarosa ashey atha, piq jakna banlo banga etho ngaqsa ani atha; etharin itan miq rima jin lilap angna i?”

¹⁰ Jesu aa batta, “Miqtang ni tatong inn.” Eshina naamrun daqhan angta: eshina miqtang utong angta etho esho miqwa tang tha hayat banga angta.

¹¹ Jesu aa banlo tha somta, etho kechu ajong kot eq utongtey tang thima phal kota; eshimal hun ngaqsa wang tho chamtan ning nukta eshitan phal kota.

¹² Wok taphutla phaksat jio Jesu aa ujiphantey tang thima batta, “Bichak moq angma udak pin tang ni thajoq tun inn”

¹³ Ning aa thajoq tun ta etho banga banlo pin thiwang phaksat dak tang tha, qhong asi qhong ani o tasheyta.

¹⁴ Patja jaksom tha khi eq ning ni ning wanta, “Mingkang náng kattey Rangsamal tha piq raa hun.”

¹⁵ Ning aa lungwang ma shing ma piq raa lot ma tathin aa ta sam eq kan náng piq chen chen wey qhing chuwang ta.

Jesu jung khona qhing aa

¹⁶ Rang sey ja atho ujiphantey tang shitim kang náng kata,

¹⁷ etho waqwan sho qhung eq shitim hangko kang Capernaum haq náng kachey ta. Eshi rangham tho anak sey angta, etho thanga tho Jesu ning rel náng thu moq angta.

¹⁸ Achan rangpong tungkang o shitim jung tha jujong aa moq ta.

¹⁹ Ujiphantey tang aa daang banga tharok náng sey wey atho, ning aa Jesu tha jung kho sho qhing eq waqwan relnáng kat tha khi eq ucho angta.

²⁰ Etharin Jesu aa ning ma batta, “Nak cho inn, ira nga!”

²¹ Ning sungrang eq waqwan kho náng piq tha tun humta etho photla waqwan tha bari náng ning ka chey ta eshináng thuta.

Miqtang aa Jesu tha bi aa

²² Inap mal tho shitim kang na lang tey miqtang aa ashey dang waqwan khita; etho ning aa usam eq ta, Jesu ujiphantey tang jamoq eshi waqwan shina qhung moq angta, etharin ning aa piq tha shingchak eq qhing chuwang ta.

²³ Adak waqwan tang Tiberias wang eshi haq rel shináng thuta, Teyhungwa ma kechu ajong kot jio ning aa banlo tha phaksat sha eshina angta.

²⁴ Ethi rangma miq wan they Jesu etho ujiphantey tang ahung ta khi atho, ning tho waqwan kho sho qhung eq Jesu tha bi eq Capernaum haq náng kata.

Jesu raa rollung banlo

²⁵ Ning aa shitim tha lit eq Jesu jamoq tachong atho batta, “Tatalteywa, nang irináng baluk o thuta phu?”

²⁶ Jesu aa ning ma thawel batta, “Nga nim ma asing asing batphang, nim aa patja jaksom khi tin tungkang o nga raa bi phamin, etharin nim aa banlo phaksat eq phut tin ethi tungkang o nga raa biphin.

²⁷ Shitik ang ching phaksat rangma nak somlo inn, etharin pattuk rollung náng thula tong phaksat rangma somlo inn, bara Miqna Sa nim ma kotpha nin; chammatakoi Shkewa piq ma tarong kota.”

²⁸ Ning aa Jesu ma batta, “Shkewa jaksom rangma íaa chamlang somlo i?”

²⁹ Jesu aa ning ma thawel batta, “Piq aa utang takat ta, piq ma kam sha hun Shkewa jaksom.”

³⁰ Ning aa piq ma batta, “Íaa esha khi eq nang raa kam rangma nang aa chamlang maal takhi phu? Nang aa bari jaksom raa somlo nu?

³¹ Í tey aa wa tang aa shu shu haq na manna phakta; eshina thawit aa, ‘Piq aa phaksat rangma mungtan wang banlo ning ma kota.’”

³² Jesu aa ning ma batta, “Nga nim ma asing sing batphang, Moses aa nim ma banlo sha mungtan wang kot moq angta, etharin Iwa hun nim ma asing banlo mungtan wang kot aa.

³³ Shkewa banlo sha esha hun bara mungtan wang ka eq mingkang ma rollung ko aa.”

³⁴ Ning aa piq ma pitta, “Tangteywa, í ma iri banlo ri salwet kophu.”

³⁵ Jesu aa ning ma batta, “Nga raa rollung banlo. Utang i relnáng kapha, piq baluk otho chamlal timoq angna, etho utang eq nga ma kam phang, piq baluk otho jung lal timoq angna.

³⁶ Etharin nga nim ma batta phang, nim aa nga ukhi eq taphin, etha o tho kam phamin.

³⁷ Iwa ngama chamlang kot taphang, eshi tang thaji sha iching náng kapha na, etho utang i relnáng ka pha, piq sha nga baluk otho phanchak mong ang náng.

³⁸ Chammatakoi nga i tinuk o ang moq, itakattey tinuk tahom ma mungtan wang anim náng kata phang.

³⁹ Itakattey tinuk sha ira, piq aa ngama chamtan miqtang kot taphang, ethi tang shiwang utang tho thamat ching ang moq, etharin uthom saal o ning thaji sha wey thajey sol eq ching.

⁴⁰ Utang eq Miqwasa khi eq piq sha kam ajo, piq aa pattuk rollung kap na ta Iwa tinthin; etho nga piq tha uthom saal o wey thajey náng.”

⁴¹ Ethi rangma Jehudi tang piq ma jap jo ta, chammatakoi piq aa batta, “Bari banlo raa mungtan wang kata pha tha, nga raa.”

⁴² Etho ning aa batta, “Iri miq raa Joseph miqwasa Jesu tha ang moq i? Unu nia uwa hiqtang aa sam eq i. Etho mungtan wang kata phang ta piq aa chammal eq bat aa?”

⁴³ Jesu aa ning ma thawel batta, “Nim jaktung na nak japjo inn.

⁴⁴ Itakattey wa, Iwa irelnáng thok sol moq ang ajo utang tho i relnáng jin kapha moq, etho nga piq tha uthom saal o wey thajey eq náng.

⁴⁵ Rangsamal tang likwit na ira uwit eq ta: ‘Ning Shkewa ching wang tatal chol angna.’ Utang eq Iwa ching wang utat nia tatal eq ta, eshi tang sha i relnáng kapha na.

⁴⁶ Utang eq Iwa sha khi moq; etharin utang Shkewa ching wang, piq aa chen Iwa tha khita.

⁴⁷ Nga nim ma asing sing batphang, utang eq kam shing aa, piq ma pattuk rollung.

⁴⁸ Nga raa hun rollung banlo.

⁴⁹ Nim tey aa wa tang shu shu haq na manna phaksat ta etho utik angta.

⁵⁰ Mungtan wang kata pha banlo phaksat tey tang sha timoq angna.

⁵¹ Rollung banlo bara mungtan wang kata pha, esha nga raa hun. Utang eq eshi banlo shiwang phak ajo salwet piq sha atharang tong na; etho bari banlo raa nga mingkang rollung rangma kotnáng, esha ihanngam.”

⁵² Eshi raaq tha tat eq Jehudi tang jaktung na thadan angta, “Iri miq rey miqtang ma phaksat eq ma chamal eq uhanngam jin kot na?”

⁵³ Jesu aa ning ma batta, “Nga nim ma asing sing batphang, nim aa Miqna Sa hanngam phak min ang nin, etho piq tahi ling min ang inn jo, nim rollung ahung.

⁵⁴ Utang eq ihanngam phak aa etho itahi ling aa, piq ma pattuk rollung; etho nga piq uthom saal o wey thajey náng.

⁵⁵ Chammatakoi ihanngam raa asing phaksat etho i tahi raa asing jung.

⁵⁶ Utang eq ihanngam phak aa etho i tahi ling aa, piq i tinmong na tong aa, etho nga piq tinmong na.

⁵⁷ Chamal atharang Iwa nga takat taphang, etho nga Iwa tungkang o atharang tong ang, eshimal utang eq ihanngam phaksa ajo i tungkang o atharang tong aa.

⁵⁸ Mungtan wang kata pha banlo tha ira, nim tey aa wa tang aa phaksat ta banlo mal ang moq bara nim tey aa wa tang aa phaksa eq tita; utang eq iri banlo raa phak aa, piq pattuk atharang tong na.”

⁵⁹ Iri raaq tang raa piq aa Capernaum haqna synagogue na tatal kam tho batta.

Pattuk rollung raaq tang

⁶⁰ Ujiphantey tang wang daqhan eq iri raaq tat eq batta, “Iri tatal raa rapney hal aa; ira utang eq jin tat na?”

⁶¹ Ujiphantey tang jaktung na japjo ang aa ta Jesu aa utin wang sam eq pitta, “Nim aa iri raaq tungkang o kam raa shingchak ma tathin inn i?

⁶² Miqna Sa sha jakho o barina tong ta, eshináng piq kapha sha nim aa khi inn jo chammal angna?

⁶³ Tsija eq rollung kot aa, hanngam wang chamtho kap min; bari raaq raa nga batphang, esha Tsija nia rollung tho ang ang aa.

⁶⁴ Etharin nim wang kam moq tey atha.” Chammatakoi Jesu aa phang wang samta, utang eq kam moq, etho utang eq piq sha thalo na.

⁶⁵ Etho piq aa batta, “Ethirangma nga nim ma batphang, Iwa chamtey sha irelnáng takat moq ang jo irelnáng jin ka phamoq.”

⁶⁶ Eshi rangham wang ujiphantey tang daqhan uwel ang chuwang ta etho ethi jio piq jiphan moq sey angta.

⁶⁷ Jesu aa asi ani ujiphantey tang thima batta, “Nim tho chuwang angma unuk ang inn i?”

⁶⁸ Simon Peter aa piq ma thawel batta, “Teyhungwa, í utang jamnáng ka ni? Pattuk rollung raaq tang bajak na hun.

⁶⁹ Nang raa Shkewa Asang Miq ta í aa uhan sey ti etho usam sey ti.”

⁷⁰ Jesu aa ning ma thawel batta, “Nga nim asi ani talpha mong angta phang i? Etharin nim wang ashey miq thangwa.”

⁷¹ Piq aa ira Simon Iscariot miqwasa Judas tung aa raaq batta, chammatakoi piq asi ani mong wang ashey angta, etharin jio piq aa Jesu tha dip eq thalo ta.