John 20 - Muklom

Changpol máng bungching

¹ Nángtong saal napkha tho, Mary Magdalene long bung náng kata, etho long bung wang takip ta ajong long tha lak chol khita.

² Piq aa Simon Peter etho adak ujiphantey barima Jesu tinma ta, ningni relnáng ka eq batta, “Ning aa Teyhungwa máng tha ubung ching wang hut som chuwan ta, etho íaa sammi, piq máng sha barina shingta.”

³ Etho Peter nia adak jiphantey thalat eq máng bungching konáng kata.

⁴ Ning ni arum rum aa jol chey ta, etharin adak jiphantey wa tha Peter pheynáng eq jakho máng bungching náng thuta.

⁵ Piq bon eq siin atho anup khat tha khita etha otho piq umong náng wang moq angta.

⁶ Simon Peter piq jijio thuta, etho umong náng nop atho ujup ching anup khat tha chen khita.

⁷ Etho Jesu khona thajup ta khatnuplo tha tho ukhi eq ta, eshi khat tha anup khat jamna ang moq angta, etharin eshi khat tha wetchol adak na tashing chey aa tha kap khita.

⁸ Adak jiphantey bara máng bungching náng jakho thoktey wa tho umong náng nopta, etho piq aa khi eq han ta.

⁹ “Jesu tha utik wang ulun ang ching” ta Asang likwit na batta tha ning aa jin sam moq angta,

¹⁰ Etho ujiphantey ni tha ning him náng welta.

Mary Magdalene ma Jesu takhi aa

¹¹ Mary tha máng bungching hang na lang eq qhap ro ang chey ta. Piq qhap eq bon eq máng bungching mong thináng siin ta.

¹² Ani rangkamwa eq apung khat sam eq barina Jesu máng tashing ta eshina ashey tha ukho kotho etho ashey tha ujaa kotho tong atha kap khita.

¹³ Ning ni aa miqnu thima pitta, “Miqnu, nang chamlang ma qhap u?” Miqnu they thawel batta, “Ning aa i Teyhungwa tha tun som chuwan ta etho nga sammong, piq tha barina shing ta.”

¹⁴ Piq jiko náng ngik atho Jesu lang chey atha khita, etharin piq aa Jesu tha sing moq angta.

¹⁵ Jesu aa miqnu thima batta, “Miqnu, nang chamlang ma qhap u? Utang bi u?” Piq aa piksintey ta tathin eq piq ma batta, “Tatalteywa, nang aa piq tha tun som eq tu jo nga ma bat phu, piq thi barina shing tu. Nga ka eq piq sha som chuwan náng.”

¹⁶ Jesu aa piq ma batta, “Mary.” Piq aa uching konáng qhit siin eq Hebrew raaq o “Rabboni” ta batta. Rabboni ta “Tatalteywa.”

¹⁷ Jesu aa piq ma batta, “Nga ri nak lo phu chammatakoi nga thanga náng thula Iwa jamnáng aluk náng wang wey mong. Etharin ino tang relnáng ka eq nang aa ning ma bat u, nga Iwa etho nim wa, etho i Shkewa etho nim Shkewa relnáng aluk náng wàng chey ang.”

¹⁸ Mary Magdalene ka eq ujiphantey tang ma tatat ta, “Nga Teyhungwa tha ukhi eq táng, etho piq aa ngama iri raaq tang raa batta phang.”

Jesu aa ujiphantey tang ma takhi aa

¹⁹ Nángtong saal rangja tho, Jehudi tang ma cho wang, barina ujiphantey tang kalung sak eq tong ta shina Jesu thu eq ning jaktung thina lang eq batta, “Nim ma nungmay cham ang aa.”

²⁰ Ira bat eq ning ma Jesu aa ujakni etho usàm tha ning ma takhi ta. Ujiphantey tang eq Teyhungwa tha khi eq sungrang angta.

²¹ Jesu aa ning ma wey batta, “Nim ma nungmay cham ang aa. Chamal Iwa nga takat taphang, nga tho nim takat phang.”

²² Iri tang raa bat eq ning khom tak tha mot ta, “Asang Tsija thàng inn.

²³ Utang ngarey sha nim aa tolchak inn, ning ngarey sha utol eq chakna; nim aa ning tolchak min ang inn jo, ning sha tolchak moq angna.”

Jesu aa Thomas ma takhi aa

²⁴ Etharin asi ani wang ashey eq, Thomas bara Didymas ta thaming aa, Jesu thu atho piq ujiphantey tang relna ahung angta.

²⁵ Adak ujiphantey tang aa piq ma batta, “Íaa Teyhungwa khiti!” Etharin piq aa batta, “Baluk náng thula nga ujakni na khili maal tha khimong nángduk, etho ijaksi eq thaksut mong nángduk etho usám na paq eq suk ta maal bung sho thak suk mong nángduk nga han mong ang náng.”

²⁶ Saal ashat jio ujiphantey tang himmong na wey angta, etho Thomas ning jamna angta. Etho kalung asak angta; Jesu thu eq ning jaktung sho lang eq batta, “Nim ma nungmay cham ang aa.”

²⁷ Esho piq aa Thomas ma batta, “Ijakni ri siin u, etho ba jaksi rey ijakni ri thaksuk eq siin u, etho ba jak eq isamrang ri thaksuk u. Kam moqtey nak ang u, etharin kamtey ang u!”

²⁸ Ira tat eq Thomas aa batta, “I Teyhungwa nia I Shkewa!”

²⁹ Jesu aa piq ma batta, “Nang aa nga khi eq ta phu, ethirangma nang aa han phu i? Utang eq khi hung aa han aa sha sunmaan!”

Iri likdap ri chamlang ma wit aa

³⁰ Jesu aa adak tho daqhan patja sha ujiphantey tang relna takhi ta, bara iri likdap na wit moq angta;

³¹ Etharin nim aa Jesu raa hun Khristo, Shkewa Miqwasa ta han ma etho han eq piq miing o rollung kap rangma iri tang witta.