John 15 - Muklom

Jesu asing suti bang

¹ “Nga asing suti bang, etho Iwa pik siintey.

² Bari bang king sha ijamna etho tingo moq angna, piq aa eshi bang king sha uduk eq chakna etho bari bang king sha tingo angna, piq aa eshi bang king tha ahan cham tingo aa ta uchán eq na.

³ Nga nim ma iraaq bat tungkang o nim asang hun sey.

⁴ Nim i tinmong na tong inn, nga tho nim tinmong na tong ang. Chamal bang king sha suti bang jam sho rap moq ang ajo umongtham jin tingo moq angna, ethimal nim tho i tinmong na tong min ang inn jo jin tingo min ang nin.”

⁵ “Nga suti bang, nim uking uphak. Utang i tinmong na tong aa etho nga piq tinmong na tong ang, piq sha daqhan tingo na, chammatakoi nga wang nim taphal inn jo chamtho jin somlo min ang inn.

⁶ Utang otho i tinmong o tong moq ang ajo, piq sha irimal uking uphak mal bara bichak eq na etho uqhuk ang ti aa, etho uking uphak tang sha thajoq eq walnáng bichak na etho ning sha ujung ang ti na.

⁷ Nim i tinmong o tong inn jo etho iraaq nim tinmong na ang ajo chamlang nuk inn sha chu inn jo tho nim ma ukot eq phanin.

⁸ Nim ahan tingo inn jo Iwa phun amun sha takhi aa, etho irimal ang inn jo nim ijiphantey tang ma ang nin.

⁹ Iwa chamal ngama tinmat shing aa, ethimal nga tho nim ma tinmat taphang; itinmat o tong inn.

¹⁰ Chamal nga Iwa raaqkhat tang tat eq tong ang etho piq tinmat o tong ang, ethimal nim tho iraaqkhat tang tat inn jo i tinmat o tong nin.”

¹¹ “Nga iri raaq raa nim ma bat taphang, irimal ang eq i sungrang nim tinmong o tong na, etho nim sungrang sha ushey angna.

¹² Iraaqkhat ira, chamal nga nim ma tinmat shing phang, eshimal nim atho ashey eq ashey ma tinmat shing inn.

¹³ Nokwa ashey eq adak nokwa tang ma rollung kotchak pheynáng eq ajong tinmat sha adak ahung.

¹⁴ I raaqkhat nim ma kotaphang sha tat inn jo nim i nokwa.

¹⁵ Nga nim raa sanga tang ta thang wang halpha mong sey, chammatakoi utangteywa somlo atha sanga sammoq. Nga nim ma inokwa tang ta raaq taphang. Chammatakoi, nga Iwa ching kowang chamlang tat tang tha nim ma thaji sha bat kotaphang.

¹⁶ Nim aa nga tal pha min ang tin, etharin nga nim tal taphang etho ka eq ahan tingo ang rangma nim raa shing taphang, irimal bangti tang bara alo utong angna. Irimal ang ajo nim aa imiing o Iwa jakwang chamlang chu inn, piq aa nim ma kona.

¹⁷ Ira iraaqkhat sha, nim aa ashey eq ashey ma tinmat shing inn.”

Mingkang eq miiksuk

¹⁸ “Mingkang eq nim miiksuk phin jo nim aa ira tasik inn, piq aa nim náng eq jakho ngama miiksuk shing ta.

¹⁹ Nim mingkang miqtang ang tin jo mingkang eq nim ma tinmat shing wang ta chammatakoi nim sha mingkang ráng, etharin nga nim raa mingkang wang tal taphang etho nim mingkang miqtang ang min sey. Eshirangma mingkang eq nim raa miiksuk phin.

²⁰ Nga nim ma bat eq taphang raaq shi tasik inn, ‘Qha sha tangteywa pheynáng eq ajong ang moq.’ Ning aa nga tahikham taphang jo nim tho tahikham eq phanin, ning aa iraaq tat ajo nim raaq tho utat eq na.

²¹ Etharin iri tang thaji raa ning aa imiing tungkang o nim jamoq somlo na, chammatakoi ning aa nga takat teywa sammoq.

²² Nga kapha mong etho ning jam tho raaq wan mong ang táng jo ning ngarey miq ang moq ang wang ta; etharin thanga ning aa ning ngarey ma jin hut bat moq sey.

²³ Utang eq nga ma miiksuk shing aa, piq aa Iwa ma tho miiksuk shing aa.

²⁴ Utang eq tho som ching ang moq jaksom tha, ning jaktung o nga som mong ang táng jo ning ngarey miqtang ang moq ang wang ta; etharin thanga ning aa nga bari jaksom raa somlo táng esha ukhi eq ta, etha otho ning aa Iwa ini thani tha miiksuk eq taphi.

²⁵ Ira ning thong na thawit ta tha tahom angma ang aa, ‘Ning aa chamtho ahung o nga miiksuk taphang.’”

²⁶ “Etharin Iwa chingko wang Rapnongtey sha nim relnáng nga takat phanáng. Piq Iwa ching wang Asang Tsija. Piq ka eq i tung i raaq nim ma miikkhi kot na.

²⁷ Nim atho i tung i raaq miikkhi kot ching chammatakoi nim phang wang hun ijamna.”