James 5 - Muklom

Tanglom tang rangtun eq tong

¹ Tanglom tang tat inn; nim aa uthok ang pha tsamnang o ring eq qhap inn.

² Nim lik aa ngin tha shittik angta etho nim khat tang tha jongbal eq phak chak ta.

³ Nim aa hun aa cha tha ram eq sey phak ta; etho eshi ram shey nim ma miikkhi kona etho wal mal nim hanngam sha phakna. Nim aa uthun saal tang rangma ma lik aa ngin thajoq tin.

⁴ Siin inn! Nim aa pik na langtey ma jakthang ko min ang tin, eshi jakthang sha uring ang chey aa. Eshi jakthang ma langtey qhap sha ajong Teyhungwa naq náng thuta.

⁵ Nim mingkang ro uphan kalaptey etho rapney sungrangtey; nim duk saal ma nim ni nim shi tachiin inn.

⁶ Nim aa jamoq tang tha aja ta raaq eq tatik chak tin; ning nim ma jashit raaq moq.

Tinman nia romtam

⁷ Eshirangma i no nia pho tang, Teyhungwa thok saal náng thula thanan shing inn. Pik o somtey eq mingkang wang thangchan utingo sha tungmang shing eq phang nia uthun rangchey rangma thanan eq ban aa.

⁸ Nim aa tho thanan shing inn etho nim tin na daqhan tungmang shing inn, chammatakoi Teyhungwa thok saal sha arelna.

⁹ I no nia pho tang, nim khaphung moq angma, ashey eq ashey ma nak jappjo inn. Khaphung tey sha katma arelna.

¹⁰ I no nia pho tang, bari rangsamal tang raa Teyhungwa miing wang wanta, ning sha tsamnang na thanan rangma ashey raaq tathaktey ta tathin inn.

¹¹ Siin inn, hiqtang aa barey thanan shing aa ning sungrang ang aa ta tathin i. Hiqtang aa Job thanan tung aa raaq tha utat eq ti etho Teyhungwa uthun na piq ma chamlang kongpha kota sha usam eq i. Teyhungwa manchantey etho tinshit takhi aa.

¹² I no nia pho tang, thaji phey náng eq ajong raaq tha ira, rang nak tum inn, mingkang miing otho, mungtan miing otho, chamtey tangwang miing otho rang nak tum inn. Nim raaq tha “Inn” ta ang ajo inn ta ang ching, etho “Ang moq” ta ang ajo ang moq ta ang ching, etho irimal ang ajo nim Shkewa khaphung khung na ang ching ang moq.

¹³ Nim wang chamtey tin tashit na ang ajo romtam chuk ching; sungrang ang ajo, ning tasapsey sey ching.

¹⁴ Nim wang chamtey atak ang ajo, mondoli miqlang tang sha hal ching etho ning aa Teyhungwa miing wang eshi atak miq o naman jik eq piq rangma romtam chuk ching.

¹⁵ Kam romtam tungkang o atak tey sha ulun angna etho Teyhungwa piq tha tun tashat eq thalang na. Piq aa ngarey somlo ta jo tho piq sha tolchak eq na.

¹⁶ Eshirangma nim aa ashey eq ashey rel o nim ni nim ngarey shi wungbat inn; etho ashey eq ashey rangma romtam chu inn; irimal ang jo nim utak wang uqhal ang nin. Asing miqtang romtam sha rapney arong.

¹⁷ Elijah tho hiqtang mal miq hun angta; rangchey ang moq angma piq aa qhap eq romtam chuta etho pang tom tángko náng thula haq na rangchey moq angta.

¹⁸ Etho piq aa romtam wey chu atho mungtan wang rang tha chey ta etho mingkang sho tingo ta.

¹⁹ I no nia pho tang, nim wang chamtey asing wang chungti ajo miqdak eq ning sha thawel sol ching.

²⁰ Tasik eq inn, chamtey eq chungtik ngarey miq thawel sol ajo, piq aa ashey rollung sha utik wang thalun na etho daqhan ngarey tang sha hop chak na.