James 4 - Muklom

Mingkang jamoq thanokwa wang rangtun eq tong inn

¹ Nim jamna thamol nia thadan bari wang thutapha? Eshey nim hanngam tinuk wang, bara nim tinmong na thamol aa, eshiwang ang moq i?

² Nim barima nuk inn esha nim aa kap min; eshirangma nim aa tatik inn. Nim ngikjuk shing inn, etha o tho kap min; eshirangma nim thadan ang inn. Nim aa Shkewa ching wang chu min, eshirangma kap min.

³ Baluk o nim aa uchuk eq inn, esho kap min, chammatakoi nim sungrang na thawan rangma jashit mongtham wang chu inn.

⁴ Nim jashit miqtang, mingkang jamoq thanokwa sha Shkewa miiksuk ta nim aa sam min i? Eshirangma chamtey mingkang jamoq thanokwa ma nuk ajo, ning aa ning ni ning sha Shkewa miiksuk tey ma hun aa.

⁵ Asang Likwit na irimal witta raaq sha asing ang moq ta nim aa tathin inn i, “Shkewa aa hiqtang tinmong o Asang Tsija kot aa, eshirangma piq aa hiqtang sha ngikjuk jamoq bi aa.”

⁶ Etharin Shkewa ahan ráng manchan ko aa; eshi tungkang o ira thawit aa, “Shkewa tharangkatey sha miiksuk aa, etharin tinintey ma ráng manchan ko aa.”

⁷ Eshirangma nim Shkewa jakkhung na tong inn. Thangwa sha miiksuk inn etho piq nim rel wang jol chuwang angna.

⁸ Shkewa relnáng thuphin etho piq tho nim rel náng kapha na. Nim ngarey miqtang, nim jak shi khol inn etho thung ahung miqtang, nim tin shi tasang inn.

⁹ Tin tashit inn, etho uqhap ang inn. Nim ngit shi uqhap ma etho nim sungrang shi tin jungnáng ma cham kaley.

¹⁰ Teyhungwa relna tinnin ang inn etho piq aa nim ma kongpha kotna.

Ashey eq ashey ma phung wang rangtun inn

¹¹ I no nia pho tang, ashey eq ashey ma jashit ta nak raaq inn. Chamtey uno nia pho tang sha jashit ta raaq tia phung ajo piq aa thong sha jashit ta raaq aa etho phung aa. Nim aa thong sha phung inn jo esha tat mintey etho esha phung ma tongtey.

¹² Thong kottey etho khaphung tey sha Shkewa hun. Piq ma ulun nia tathun ma tarong atha. Etharin nim himkhung thaktey ma phungtey nang utang aa?

Inapja rollung ma nak tharangka inn

¹³ Nim aa bat inn, “Thaney etha ang moq o inap aa chamtey samhaq náng ka eq eshina pangshey tong ni etho thangsang eq ahan ngin kap ni.” Etharin nim aa iraaq tat inn.

¹⁴ Inap aa chamlang angna sha nim aa sam min. Nim rollung shi chamlang aa? Nim sha ukhu mal, bara chomrey takhi aa, eshi jio takhi moq sey.

¹⁵ Eshi kaley nim aa ira bat ching, “Teyhungwa nuk ajo í atharang tong ni etho esha somlo ni.”

¹⁶ Etharin nim tharangka eq wan inn; irimal thaji tharangka sha jashit.

¹⁷ Eshirangma barey jaqhal jin som ma sam aa etharin esha somlo moq ang ajo, ning rangma ira ngarey.