James 3 - Muklom

Jaqhal eq wan

¹ I no nia pho tang, nim wang daqhan tataltey tang nak cham ang aa, chammatakoi hiqtang tataltey tang sha ahal eq phung aa ta nim aa usam eq inn.

² Hiqtang aa daqhan thaja eq som i. Utang tung aa raaq bat na thaja bat moq ang ajo piq sha khakla miqna ang aa; etho thaji hanphung sho jin táng eq aa.

³ Ashey mok nung o ru eq khak eq hiqtang aa thaji mok hanphung sha chammal nuk i eshimal jin thangik eq i.

⁴ Siin inn, waqwan sha tho rapney ajong etho achan rangpong wang pong ajo tho ashey aming ru tungkang o waqwan weytey mongtham o jin thangik eq aa.

⁵ Eshimal hun phali sha tho aming sa etho ajong ajong tung aa raaq tharangka eq raaq aa. Etho siin inn, amaan sa wal wang chamtan ajong jat sha jungti aa.

⁶ Phali sha wal mal. Phali shey hiqtang hanphung sha thanan aa etho thaji hanphung sha tashit aa. Etho eshey hiqtang rollung sha walnáng takat aa.

⁷ Thaji jatngam phan, wo tang, etho jongbal tang, etho jung o tong phan tang sha miqtang jaktáng na jin ang ang aa etho ang hun sey angta.

⁸ Etharin phali sha miqtang wang utang eq tho jaktáng o jin shing moq. Phali sha anaan etho baluk o tho jin táng moq phan; phali sha rollung tathuntey shom mal.

⁹ Phali shey hiqtang Teyhungwa nia Wa sha hiqtang aa tasapsey i; etho eshi phali shey hun hiqtang aa miqdak tang ma manthun ko i, bara Shkewa piq mal hunta.

¹⁰ Ashey nung wang tasapsey nia manthun raaq sha thalat aa. I no nia pho tang, irimal ang ching ang moq!

¹¹ Ashey jungtol wang asim nia akha jung thani sha jin thalat angna i?

¹² I no nia pho tang, phokbang bang wang Olive bangti sha uti angna i? Tia suti bang shiwang phokbang ti sha uti angna i? Eshimal hun sim jungtol shiwang asim jung sha thalat moq.

Mungtan wang asing thunglam

¹³ Nim wang khakla nia asam atol utang aa? Irimal miq eq ujaksom jaqhal wang eshi takhi inn, bara thunglam nia tinthanup jaksom.

¹⁴ Etharin nim aa nim ni nim tin o ngiljo etho ngikjuk shing inn jo, nak japjo inn etho asing shi miiksuk eq alik nak bat inn.

¹⁵ Irimal thunglam raa rangmuntan wang thu moq; etharin ira mingkang, hanngam etho thangwa wang.

¹⁶ Barina ngiljo nia ngikjuk ang aa, eshina tsamnang etho thaji uphan anaan ang aa.

¹⁷ Etharin bari thunglam raa mungtan wang katapha sha phang tho asang ang aa, eshi jio nungmay, tinin, etho tinshit ang aa; eshiwang jaqhal uti ngo qhong aa etho irimal miqtang sha thaji jamoq arum dangjang aa etho takhi eq somtey ang moq.

¹⁸ Kara kottey tang eq nungmay sha qhey jing eq eshiwang asing thalat aa sha kap aa.