James 2 - Muklom

Ngarey wang rangtun

¹ I no nia pho tang, hiqtang phun amun atha Teyhungwa Jesu Khristo ma hantey tang, miq shi rangkho na siin eq ning jamoq adak adak ang eq nak dangjang inn.

² Tathin inn, ashey tanglom miq sha hun aa cha jaksi khap etho jaqhal khat sha sam eq nim thajoq tong inn shináng thupha etho ashey tangshi miq sha tho jashit khat sam eq thupha.

³ Etho nim aa jaqhal khat samtey sha rangka eq bat inn, “Nang iri jaqhal katáng rina tong u” etho tangshi shima bat inn, “Nang eshina lang u” tia “Ijaa relna haqna tong u.”

⁴ Irimal som inn jo, nim aa eshi jaktung na dandey inn etho jashit thung o khaphung inn.

⁵ I no nia pho tang tat inn, iri mingkang na tangshi tang ma, ning kam o tanglom angma Shkewa tal aa etho barey Shkewa ma tinmat aa, ning ma ukot eq na ta rangtum ta eshi rangmungtan sha ukot eq ma ning sha tal aa.

⁶ Etharin nim aa tangshi tang sha rangka min ang tin. Tanglom tang aa nim tatsam pha min i etho tanglom aa hun nim khaphung him náng sol kat pha min i?

⁷ Nim Teyhungwa miing sha ning aa hun tashit bat moq i?

⁸ Shkewa rangmuntan thong sha tat inn jo, nim thikla som inn. Iri thong raa Asang Likwit na thawit aa, “Nim ni nim ma tinma inn mal himreltey ma tinmat inn.”

⁹ Etharin nim aa miqtang sha rangkho o siin eq adak adak dangjang inn jo ngarey jaksom som inn etho Shkewa thong shey nim sha thong tashittey ta shing aa.

¹⁰ Utang eq thong wang ashey raaq sha tat moq ang ajo piq sha thaji thong tashitey angna.

¹¹ Utang eq iri raaqkhat raa kot ta, “Nang aa sathuk nak somlo u” piq aa iri raaqkhat raa tho ukot eq ta, “Miq nak tatik u.” Eshirangma nim aa sathuk jaksom somlo min ang inn jo tho tatik eq tin jo, nim sha thong dantey ang tin.

¹² Nim aa eshi miqtang mal raaq bat inn etho jaksom tho usom eq inn, bari khaphung sha aqhap thong mal angna.

¹³ Chammatakoi barey tinshit moq, ning khaphung sha tinshit ahung na angna. Tinshit shey khaphung sha jin aa.

Kam nia jaksom

¹⁴ I no nia pho tang, nim wang chamtey tang eq bat aa, í aa ukam eq i; etharin nim jaksom na ira takhi moq ajo chamlang kapna? Irimal kam eq nim sha jin thalun eq na i?

¹⁵ Tathin inn, chamtey no nia pho tang khat hung eq etho phaksat ahung tong aa,

¹⁶ etho nim wang chamtey eq ning ma bat phanin, “Nungmay eq kat inn, jaqhal eq tong inn etho jaqhal eq phaksat inn”, etho tangwang raa hanphung ma ràa aa sha ning ma kot min ang inn jo, chamlang qhal na?

¹⁷ Eshimal hun kam sha tho, jaksom jamoq ang moq ang ajo, irimal kam sha amáng mal.

¹⁸ Etharin chamtey eq batna, “Nang aa ukam eq u etho nga jaksom som ang.” Nang aa ba kam sha ngama jaksom ahung takhi phu, etho nga i kam sha jaksom tungkang o nangma takhi phanáng.

¹⁹ Shkewa ashey dang ta nang aa uhan eq u. Jaqhal raaq! Thangwa tang tho irimal uhan eq aa etho ucho wang mo aa.

²⁰ Miqthom tang, jaksom ahung na kam sha thanghung ta nim aa sam min i?

²¹ Hiqtang wa Abraham aa usa miqwasa Isaac tha rongthung na pinthong kot ma shing eq piq jaksom wang asing miq ma shing moq angta i?

²² Piq kam nia ujaksom jamoq rum eq somlo ta etho piq jaksom wang ukam sha khakla angta ta nim aa ukhi eq tin.

²³ Asang likwit tung aa raaq tha thikla angta, “Abraham aa Shkewa o kam ta etho ira piq rangma asing miq ta wet ta.” Etho piq Shkewa nokwa ta thaming ta.

²⁴ Nim aa usam eq inn, miqna kam wang chen ang moq, jaksom wang tho asing miq ta shing aa.

²⁵ Eshimal hun Rahab sathuk nu atho, baluk o piq aa usitey tang tha uhimnáng thawan eq etho lam dak kona tachuwan eq tho ujaksom wang hun asing miq ta shing moq angta i?

²⁶ Eshirangma chammal tsija ahung hanphung sha amáng, eshimal hun jaksom ahung na kam sha tho amàng.