Hebrews 9 - Muklom

Mingkang bulang taap shumnuk

¹ Phang raaqkhak shina tho shumnuk ma thong atha angta etho shumnuk eq ma katáng tho atha angta.

² Ashey bulang taap hunta, phang khok tho nalpang shingching angta etho asang banlo shingching karatheng angta, iri katáng raa asang katáng ta thamiing ta.

³ Eshi khok jiko kalung thukching jiko ajong asang katáng ta angta.

⁴ Eshina shongnol tachap rangma hun aa cha rongthung angta etho hun aa cha wang jikchol raaqkhak khok angta. Iri bangkhok mong shina manna shingching hun aa cha khap, Aaron kantha bara esho bangjak phang dim ta, raaqkhak thawit chol longlo angta.

⁵ Eshi khok rangkho sho Shkewa phung aa amun tongtey cherubim angta, eshi cherubim uráng sha tinsit katáng o hom ta. Etharin eshi raaq tang tung aa raaq sha thanga lan eq bat mi.

⁶ Iri tangwang tang raa irimal kacha jio tingwa tang ran taap wang nop eq salwet ning jaksom tang sha somta.

⁷ Etharin umong khok shináng ajong tingwa tang solwa hun pang shey o juk shey nop ta; etho tahi som hunga nop moq angta. Etho ungarey rangma etho miqtang eq sam moq wang ngarey somta rangma tahi sha kota.

⁸ Phang bulang taap sha lang ajo ajong asang katáng lam sha takhi moq angna ta Asang Tsija iriwang takhi aa.

⁹ Ira Thaney nap rangham rangma raaqshiton. Bara jakkot nia pinthong kot aa eshiwang shumnuk tey tin khakla jin ang moq ta takhi aa.

¹⁰ Eshi tang sha ling phaksat nia ukhol eq ma thong mal. Iri rangkho kho tang raa Shkewa anal thong shing náng duk hun angna.

¹¹ Etharin Khristo thanga aa jaqhal thaji tang ajong tingwa tang solwa ang eq thu tapha. Piq iriwang ajong nia khakla bulang taap náng nop ta. Eshi bulang taap sha miqna jak eq hunphan ang moq angta etho mingkang eq hunta eshiwang ang moq.

¹² Etho kel tang nia maansa tang tahi som eq nop moq angta etharin utahi tungkang o jukshey lam o ajong asang katáng shináng nopta, etho pattuk rangma lunwan sha kapta.

¹³ Thong na mal sang moq miqtang sha rangkho kho o tasang rangma kel tang nia maanpong tang tahi etho maansa sochakta botkhi sey eshi miqtang han sho wak ta.

¹⁴ Iraa asing angta jo Khristo tahi tungkang o chamtan ajong jaksom sha angna. Piq ni piq tha khakla pinthong ma ang eq pattuk Tsija tungkang o Shkewa relna dan kota. Hiqtang aa atharang Shkewa sha nong ma, utahi wang hiqtang tin sha ngarey jaksom tang wang tasang na.

¹⁵ Phang raaqkhak jakkhung na tongtey miqtang ngarey wang ning sha taqhap rangma Khristo sha tita, eshirangma piq sha anal raaqkhak karatey, irimal ang eq uhal eq ta miqtang eq pattuk sunmaan kapna bara Shkewa ning rangma rangtum ta.

¹⁶ Utang eq utik jima raaqkhak wit shing ta jo eshi miq sha utik angta ta takhi eq ching.

¹⁷ Chammatakoi irimal raaqkhak sha wittey miq atharang náng duk thanghung angna. Piq tik jio hun esha qhakna.

¹⁸ Eshirangma phang raaqkhak sha tho tahi ahung na qhak moq angta.

¹⁹ Moses aa miqtang shima thong thaji raaqkhat sha tatat atho, piq aa kel nia maansa tahi sha som eq, jung jam sho nol eq hyssop bangking etho ashang khatlo shey thong likdap nia miqtang sha wak ta.

²⁰ Etho piq aa batta, “Ira eshi raaqkhak tahi, bari raaqkhat raa Shkewa nim rangma kota.”

²¹ Irimal bulang taap nia shumnuk tangwang thaji shina tahi wak ta.

²² Thong na bat aa thimal, thaji tangwang sha tahi tungkang o tasang ching; etho tahi ahung ngarey sha tolchak moq.

Khristo pinthong tungkang o ngarey tolchak

²³ Mungtan tangwang tang jakhang sha bara mingkang na, eshi tang sha irimal pinthong wang tasang hun eq ching. Etharin mungtan tangwang tang sha iriwang aqhal pinthong wang tasang ching.

²⁴ Khristo sha miq eq hunta bulang taap sho nop moq angta bara asing katáng jakhang angta. Etharin piq hiqtang kaley Shkewa jakho na takhi rangma mungtan náng hun nopta.

²⁵ Chamal ajong tingwa tang solwa eq pangwet adak tahi som eq ajong asang katáng shináng nop ta eshimal Jesu aa piq ni piq kot rangma mungtan náng jukwet wet nop ching raa moq.

²⁶ Etha ang moq ang ajo, mingkang phanghun wang piq sha tak daqhan tsamnang ang wang ta. Etharin Jesu aa ngarey sha thamat rangma piq ni piq sha pinthong kot eq uthun rangham o jukshey takhi ta.

²⁷ Miqna tang sha jukshey utik hun ang ching etho eshi jio khaphung sho lang ching angna.

²⁸ Eshimal hun Khristo sha tho daqhan miqtang ngarey tunsom rangma jukshey pinthong kota etho piq jukshey wey kaphana, esha ngarey rangma ang moq angna etharin bari miqtang rey piq sha ban aa, ning sha thalun rangma angna.