Hebrews 8 - Muklom

Jesu anal nia jaqhal raaqkhak ajong tingwa

¹ Í aa thanga bat i, ajong raaq raa ira, hiqtang rangma ajong tingwa tang solwa ang aa bara mungtan na ajong Shkewa tongching jakqha kona tong aa.

² Piq aa ajong asang katáng na som aa eshi katáng sha asing bulang taap ang aa, esha miqna jak eq hun moq angta, Teyhungwa jak eq thalang ta.

³ Thaji ajong tingwa tang solwa sha Shkewa ma jakkot kotma etho pinthong kot rangma shing aa, eshi tungkang o hiqtang ajong tingwa tang solwa relna tho dan kotma chamlilang atha ang ching.

⁴ Jesu mingkang na angta jo tingwa ang moq ang wang ta, chammatakoi Jehudi tang thong na jakkot kot ma tingwa atha.

⁵ Ning aa bara bulang taap na somlo aa esha mungtan aa asing bulang taap mal adak etho ujakhang mal. Moses aa bulang taap hun wey moq jakho Shkewa piq ma batta, “Bari mal raa nang aa haqkan na khi u, eshimal hun thaji shi hun u.”

⁶ Etharin thanga Jesu sha bara tingwa jaksom kapta esha ning jaksom náng eq tho ajong, chammatakoi piq bari raaqkhak ma lang aa esha aking raaqkhak náng eq ajong, chammatakoi anal raaqkhak rangma jaqhal rangtum shing aa.

⁷ Phang raaqkhak jaqmoq angta jo, adak raaqkhak sha raa moq ang wang ta.

⁸ Etharin Shkewa miqtang ma aja ta raaq eq bat aa, Teyhungwa bat aa, “Rangney tang sha uthok sey ang aa Nga Israel miqtang jamoq, etho Judah miqtang jamoq anal raaqkhak shing náng.

⁹ Nga ning tey aa wa jamoq raaqkhak shing táng shimal esha ang moq angna, Bara nga ning jak lo eq ning sha Egypt mung wang lat sol táng tho shing táng, Ning aa i raaqkhak sha kam moq tungkang o, nga ning ching kowang ngik chuwang táng.

¹⁰ Uthok angpha saal o Bari raaqkhak raa nga Israel miqtang jamoq shing náng, esha ira, Nga ithong aa ley tang sha ning thung tang shina shing náng, etho esha ning tin tang shina wit náng, Nga ning Shkewa ang náng, ning i miqtang angna.

¹¹ Ning jaktung na utang eq tho ning him kungthak tey sha eshimal tatal ching ang moq angna, Etho ashey eq ashey ma irimal bat ching ang moq angna, ‘Teyhungwa shi sam inn’. Chammatakoi nijang wang miqlang náng thaji eq nga usam eq phanáng.

¹² Nga ning jaksom tolchak náng, Etho ning ngarey tha tasik mong ang náng.”

¹³ Anal raaqkhak tung aa raaq bat eq Shkewa phang wang raaqkhak aking ta shingta, etho bara aking sha jaksom qhakmoq esha kalo matwang na.