Hebrews 7 - Muklom

Melchizedek tingwa

¹ Melchizedek sha Salem lungwang etho thaji phey náng eq ajong Shkewa tingwa. Abraham lungwang tang tha jin eq wel chey atho, Melchizedek piq jamoq tachong eq piq ma sunmaan tha kota,

² etho Abraham aa thaji tangwang rangphal esha piq ma kota. Jakho Melchizedek miing sha “Asing lungwang” ta ang aa; etho piq sha “Salem lungwang” ta tho ang ang aa, Salem lungwang ta “Nungmay lungwang.”

³ Melchizedek ma, uwa, unu, utey aa wa tang tho, piq rollung baluk o khong ta etho baluk o thunta ta sammi; etha otho Shkewa sa mal ang eq piq pattuk rangma tingwa ang eq tong aa.

⁴ Piq shi chamtan ajong ta tathin inn. Hiqtang ajong tey aa wa Abraham aa tho lungwang tang jin eq thuta tho chamlang jaqhal kapta eshiwang piq ma phal asi kota.

⁵ Levi phi aa lí tang bara tingwa tang angta, ning miqtang jakwang rangphal qhok ma ning aa thóng wang raaqkhat kapta. Ning thaji sha Abraham phi aa lí ang eq tho, ning aa irimal hun som ching angta.

⁶ Melchizedek Levi phi aa lí wang ang moq angta, etha otho piq aa Abraham ching wang rangphal som ta etho piq sha sunmaan ta barey Shkewa rangtum kapta.

⁷ Barey sunmaan kot aa, piq sha sunmaan kaptey wang ajong ta nàn ching ahung.

⁸ Tingwa tang raaq na utiktey miq eq rangphal sha som aa, etharin Melchizedek raaq na, bara atharang ta asang likwit na battey miq eq rangphal som aa.

⁹ Levi phi aa lí atho, bari rangphal raa som aa, Abraham tungkang o rangphal kota ta hiqtang irima jin raaq ang ni.

¹⁰ Chammatakoi bari rangham sho Melchizedek Abraham jamoq tachong ta, eshi rangham sho Levi sha utey aa wa hanphung na angta.

¹¹ Levi phi aa lí tang sha hun tingwa ma ang ching ta Moses thong na bat aa. Levi phan tingwa tang jaksom sha khakla angta jo adak tingwa bara Melchizedek tingwa katáng na atha etho Aaron tingwa katáng na ahung, esho tingwa sha thok ching ang moq angta.

¹² Tingwa tang katáng sha kaley ajo, thong sha tho kaley ang ching.

¹³ Bari miq tung aa raaq ma iri raaq raa batta, piq sha adak phan ajat wang, utang eq tho eshi phan wang rongthung sha baluk o tho nong moq angta.

¹⁴ Hiqtang Teyhungwa Judah phan wang khongta ta thaji eq usam eq aa etho iri phan ajat wang tingwa thupha na ta Moses aa baluk o tho bat moq angta.

Melchizedek mal adak tingwa

¹⁵ Melchizedek mal ashey tingwa thutapha ta ang ajo iri raaq tang raa aláng rap ang aa.

¹⁶ Piq utey aa wa tang tungkang o tingwa ang moq angta, etharin baluk o tho thun moq rollung tarong wang angta.

¹⁷ Asang likwit na bat aa, “Nang Melchizedek tingwa katáng na, pattuk tingwa.”

¹⁸ Irimal phang thong sha anung nia jaksom qhamoq tungkang o esha shingchak ta.

¹⁹ Chammatakoi Moses thong sha chamtho khakla jin som moq angta. Etho thanga hiqtang ma Shkewa relnáng katma ashey jaqhal tungmang kota.

²⁰ Eshi jamoq Shkewa rangtum atha angta. Adak tang sha tingwa angta tho rangtum ahung angta.

²¹ Etharin rangtum jamoq Jesu sha tingwa angta, etho Shkewa piq tung aa raaq batta, “Teyhungwa arong eq rangtum ta, etho piq aa utin kaley moq angna, ‘Nang pattuk rangma tingwa angnu.’”

²² Iri rangtum tungkang o Jesu jaqhal raaqkhak kottey ma angta.

²³ Adak tingwa tang tho ahan angta, ning tik tungkang o ning aa tingwa jaksom sha jin som moq sey angta.

²⁴ Etharin Jesu pattuk rangma atharang ang tungkang o piq aa tingwa jaksom sha jio kattey ma kot moq.

²⁵ Eshirangma utang Jesu tungkang o Shkewa relnáng kapha, piq aa ning sha jin thalun eq aa, chammatakoi Jesu aa ning rangma Shkewa jamoq wan rangma pattuk atharang.

²⁶ Hiqtang chamlang raa aa esha kottey ajong tingwa tang solwa Jesu atha. Piq sha asang, alik akuk ang moq, tinnin, ngarey miq wang mama etho piq sha mungtan wang aluk na shing aa.

²⁷ Piq sha adak ajong tingwa tang mal ang moq. Piq ma adak tingwa mal salwet jakho ungarey rangma etho eshi jio miq ngarey tang rangma pinthong kot ma raa moq, Jesu aa piq ni piq tha jukshey kot eq pattuk rangma pinthong kota.

²⁸ Moses thong aa arong ang moq miqtang ma ajong tingwa solwa shing aa; etharin thong jio thuta rangtum sha Miqwasa sha ajong tingwa tang solwa ma shingta, bara pattuk rangma khakla hunta.