Hebrews 6 - Muklom

¹ Eshirangma Khristo tung aa raaq phang tatal wang, hiqtang aching tatal konáng ka ni. Utik ang ching jaksom wang tin thawel tung aa raaq etho Shkewa ma kam tung aa raaq,

² junglam nia jak shing tung aa raaq etho utik wang weyjey etho pattuk khaphung tung aa raaq, iri tang raa wey tatal kot ching ang moq.

³ Shkewa nuk ajo, hiqtang aa irimal som ni.

⁴ Utang eq jukshey alit kap sey ta, etho barey mungtan jakkot kap thaktal sey ta etho Asang Tsija jamna utong sey angta,

⁵ etho Shkewa jaqhal raaq etho uthok ang pha rangham tarong thaktal sey ta,

⁶ irimal miqtang kam wang manthan ti ajo, ning sha tin kaley eq jukshey wey jin thawel sol moq, chammatakoi ning aa Shkewa Miqwasa bólq o wey botchak aa etho piq sha miq thim na tharakri aa.

⁷ Bari haq rey rangchey jung sha chip aa etho bari miqtang rey eshina tapuk pal aa ning rangma tung aa cham taqhal kot aa, irimal haq shey Shkewa ching wang sunmaan kap aa.

⁸ Etharin eshina su bang nia jashit pol abang phuk ajo, eshi haq sha thanghung etho manthun kap na etho uthun o wal eq rok chak na.

⁹ Etharin noknu nokwa tang, í aa iri raaq tang bat ijo tho, nim tung aa raaq í aa iri phey náng eq jaqhal raaq tang sho tungmang shing i etho nim ma lunwan sunmaan atha ta í aa usam eq i.

¹⁰ Shkewa aja wang khaphung tey ang moq; piq rangma nim jaksom etho nim tinmat piq aa lakchak moq, esha nim aa piq miqtang nong etho unong eq chey aa sha takhi tin.

¹¹ Nim wang thaji uthun náng thula irimal thung shing rangma í tinuk, irimal ang ajo nim tungmang raaq sha asing angna.

¹² Nim ajung angma í nuk mi, etharin bara kam na etho nan tungkang o rangtum raaq tang kapta, ning mal ang inn.

Shkewa rangtum

¹³ Shkewa Abraham jamoq rangtum rangham tho, rangtum rangma utang tho Shkewa phey náng eq ajong kap moq ang tungkang o piq aa umiing o hun rangtum eq batta,

¹⁴ “Nga asing nang ma daqhan sunmaan kopha náng, etho ba susa tang tachat lot eq náng.”

¹⁵ Abraham aa saal daqhan tinthanan eq banta etho Shkewa rangtum ta tha piq aa kapta.

¹⁶ Miqna eq piq phey náng eq ajong miing o rangtum aa etho ning thaji thadan raaq sha rangtum eq kara kot aa.

¹⁷ Shkewa rangtum miqtang ma chamlang rangtum ta eshiwang kaley moq angna ta takhi ma nukta, eshirangma piq aa rangtum sha tharong ta.

¹⁸ Iri ni raaq raa jin kaley moq etho iri tung aa raaq Shkewa aa jin hut bat moq. Eshirangma hiqtang hom rangma piq relnáng jol i etho hiqtang jakho na shingta tungmang sha som rangma hiqtang rong i.

¹⁹ Iri tungmang raa hiqtang rollung rangma aching nia arong lo i thimal etho esha khatlo mong katáng shináng wang aa.

²⁰ Eshina Jesu aa Melchizedek tingwa katáng sho pattuk rangma ajong tingwa tang solwa ma ang eq, hiqtang rangma jakho náng kata.