Hebrews 5 - Muklom

¹ Thaji ajong tingwa tang solwa sha miqtang jaktung wang tal aa, etho piq aa ning kaley ngarey rangma Shkewa ma jakkot nia pinthong kot ching.

² Piq aa sam moq tey etho manthan tiktey jamoq anin dangjang aa chammatakoi piq ni piq sha anin hun.

³ Eshirangma chamal adak miq rangma piq aa pinthong kot aa shimal, piq ni piq rangma tho pinthong ukot eq ching.

⁴ Ajong tingwa tang solwa rangka chamtey eq piq tinnuk o jin tal moq, etharin Aaron tha Shkewa halta shimal, bara Shkewa hal aa piq sha hun ajong tingwa tang solwa.

⁵ Eshimal Khristo atho ajong tingwa tang solwa angma rangka sha piq tinnuk o som moq angta. Etharin Shkewa piq ma batta, “Nang isa Miqwasa, Thaney aa nga ba wa ang táng.”

⁶ Irimal piq aa adak katáng na tho ubat eq ta, “Nang Melchizedek tingwa katáng na, pattuk rangma tingwa.”

⁷ Jesu mingkang na tong kam tho jujong eq etho mukshit takhong eq qhap eq Shkewa ma romtam chuta, barey piq sha utik wang thalun eq wang ta etho Jesu tinnin miq ang eq Shkewa jakkhung na tong tungkang o piq romtam tha utat eq ta.

⁸ Piq Miqwasa ang eq tho, piq aa tsamnang ang eq raaqkhat tat ma tatal ta.

⁹ Etho khakla ang jio, piq raaq tattey thaji rangma pattuk lunwan kottey ma angta.

¹⁰ Etho Shkewa piq sha Melchizedek tingwa katáng na ajong tingwa tang solwa rangma shingta.

Kam wang manthan tiktey rangtun eq tong inn

¹¹ Eshi tung aa raaq í daqhan raaq wan ching, etharin nim ma tatal bat ma ahal, chammatakoi nim aa usam eq ma nuk min.

¹² Rangham o siin ajo nim tataltey tang ang wang tin, etharin thanga tho nim ma Shkewa raaq phang wang wey tatal ching i? Nim ma phaksat kaley thanga tho kaqhit hun kot ching.

¹³ Manpungchi lingtey eq asing nia jashit sing sam moq, chammatakoi piq nijang sa wey.

¹⁴ Phaksat sha miqlang tang rangma barey ning thung ma tatal ko eq jaqhal jashit jin sam aa.