Hebrews 3 - Muklom

Jesu sha Moses phey náng eq ajong

¹ Ino ni pho tang, Shkewa asang miq ang eq mungtan rangma haltey miqtang jamoq angma halta phin. Eshirangma Jesu tung aa raaq shi hun tathin tak inn, bara hiqtang apostle etho ajong tingwa tang solwa.

² Moses tho chamal Shkewa him thaji shina ukam eq ching angta, eshimal Jesu tho Shkewa o kam eq ching angta.

³ Chamal him huntey eq him phey náng eq rangka kap aa eshimal Jesu aa Moses phey náng rangka kap ching.

⁴ Chammatakoi thaji him rangma huntey atha, etharin barey thaji hunta esha Shkewa.

⁵ Moses sha Shkewa him thaji na sanga mal kamtey angta, etho Shkewa bari raaq sha bat ma ta eshi raaq shima miikkhi kota.

⁶ Etharin Khristo sha Miqwasa mal Shkewa himna ukam eq ching ang aa. Etho hiqtang aa tintharong eq etho hiqtang tungmang shingchak mi ang ijo hiqtang raa piq him.

Shkewa miqtang ma nángtong

⁷ Req, chammal Asang Tsija bat aa thimal “Thaney aa nim aa piq raaq tat inn jo,

⁸ chammal jat na tari saal tang o Tinqhat rangham o som ta thimal, nim tin nak tachet inn,

⁹ Eshina nga chamlang som táng esha ukhi eq tin jo tho, nim tey aa wa tang aa pang rokbali náng thula tari eq shing ta etho

¹⁰ Iri tungkang o nga eshi rangham miqtang ma kha táng etho bat táng, ‘Ning tin salwet manthan tia, etho ning aa i lam sam moq.’

¹¹ Nga kha eq rangtum táng, ‘Ning i nángtong náng jin nop moq angna.’”

¹² I no ni pho tang, rangtun eq tong inn! Nim ma jashit etho kam moq tey nak cham ang aa, eshiwang nim atharang Shkewa ching wang ngik chuwang inn.

¹³ Etharin chamtan saal náng thula “Thaney saal” ta raa aa, eshi thaji saal shi ashey eq ashey ma tatal eq tin shi tharong inn, irimal ang ajo nim wang chamtey ngarey dipkup náng ka eq tinchet ang min ang nin.

¹⁴ Hiqtang jakho na Khristo miq angti tho, piq jamna kara eq tongti; eshirangma hiqtang eshi kam sha uthun náng thula taching lot ching.

¹⁵ Asang likwit na bat aa thimal, “Thaney aa nim aa piq raaq tat inn jo, chamal tinqhat rangham tho som ta thimal, nim tin shi nak tachet inn.”

¹⁶ Eshina Shkewa raaq tat eq tin qhattey tang utang angta? Ning sha Moses aa Egypt wang thalat soltey thaji miqtang ang moq ang ta i?

¹⁷ Shkewa pang rokbali rangma bari miqtang ma qhat ta? Barey ngarey somta etho jat na tita, ning ma qhat moq angta i?

¹⁸ Nim i nángtong náng kap nop min ang inn ta Shkewa utang ma batta? Barey piq raaq tat moq angta, ning ma bat moq angta ta i?

¹⁹ Irimal hiqtang aa siin i, ning aa han moq tungkang o jin kap nop moq angna.